Nehemia

8 E TE tangata ravarai kua akaputuputu maira mei te tangata okotai ki roto i te arataa ki mua atu i te ngutupa vai ra; e kua karanga atura ratou ki te tata tuatua ra kia Ezera, e apai mai i te buka ture a Mose, ta Iehova i akaue mai kia Iseraela ra.

2 Kua apai maira te taunga ra ko Ezera i te ture ki mua i te aroaro o taua uipa anga ra, te tane e te vaine, e te aronga katoa, e kite i te tuatua kia tatauia ra, i te rā mua i te marama itu ra.

3 Kua tatau iora aia i taua tuatua ra, i roto i te arataa ki mua atu i te ngutupu vai ra, mei te popongi mairai e avatea ua atura, ki mua i te aroaro o te tane e te vaine, e te aronga katoa e kite ra: akarongo tika atura te taringa o te tangata ravarai i taua buka ture ra.

4 Te tu ua ra taua tata tuatua ra ko Ezera ki runga i tetai paata rakau i angaia e ratou no taua mea ra; e tei tona rima katau ko Matitia ïa te tu anga, e ko Sema, e ko Anaia, e ko Uria, e ko Hilikia, e ko Maaseia: e tei tona rima kaui, ko Pedaia ïa, e ko Misaela, e ko Malekia, e ko Hasuma, e ko Hasebadana, ko Zekaria, e ko Mesulama.

5 Kua eeu akerā Ezera i taua buka ra ki mua i te aroaro o te tangata ravarai ra; te teitei ra oki aia i runga i te au tangata ravarai, e tei te eeu anga aia i taua buka ra, kua tu anake maira te tangata ki runga.

6 Kua akameitaki aturā Ezera i te Atua maata ra ia Iehova. Kua tuatua maira te tangata ravarai, ma te tāki i te rima ki runga, Amene, Amene: kua tupou iora to ratou mimiti ki raro, e kua akamori ia Iehova ma te mata ki raro i te one.

7 E ko Iesua, e ko Bani, e ko Serebia, ko Iamina, ko Akuba, ko Sabetai, ko Hodiia, ko Maaseia, ko Kelita, ko Azaria, ko Iozabada, ko Hanana, ko Pelaia, e te au ngati Levi, na ratou i akakite ki te tangata i te ariteanga o taua ture ra: te ta ua ra te tangata i to ratou ra turanga.

8 Tatau taka meitaki iora ratou i taua buka ra i te ture a te Atua, e kua akakite i te ariteanga, e kite akera ratou i tei tatauia ra.

9 Kua karanga atura te tutara ko Nehemia, e te taunga tata tuatua ra ko Ezera, e te au ngati Levi tei apii i te au tangata, ki te tangata katoa ra, E rā tapu teia no Iehova to kotou Atua ra; auraka e mii, auraka e aue. Kua aue oki te tangata ravarai i te kite anga i te au tuatua a te ture ra.

10 Kua karanga atura aia kia ratou, E aere, e kai i te kai matu, e inu i te vai mangaro, ka akau atu ei i tetai tuanga na te aronga e ngere ra; e rā tapu oki teia no to tatou Atu: auraka e iriea; ko te rekareka ra no ko ia Iehova ra to kotou ïa maroiroi.

11 Kua muteki iora te tangata katoa i te au ngati Levi, na ko atura, Auraka e tuatua, e rā tapu oki teia; auraka kotou e aue.

12 Kua aere atura te tangata ravarai e kai, e inu oki, e akau oki i tetai vaʼi ki tei ngere ra, e rekareka maata oki ratou, no te mea kua kite ratou i te au tuatua i tuatuaia mai kia ratou ra.

13 E tae akera ki te rā rua, kua kuku maira te aronga mataiapo tutara ra no te au tangata katoa ra, te kau taunga, e te au ngati Levi ra, kia Ezera tata tuatua ra, kia kite ratou i te au tuatua i roto i te ture ra.

14 E kitea iora e ratou tei tataia i roto i te ture, ta Iehova i akaue mai ia Mose e, kia noo te tamariki a Iseraela i roto i te au are piritanga e tikaʼi, i te oroa i te marama itu ra;

15 E kia tutu aere ratou e akakite i roto i to ratou au oire katoa, e i Ierusalema, na ko atura, E aere ki te maunga, e rave mai i te au rara olive, e te au rara olive ngangaere, e te au rara maire, e te au kikau nu tamara, e te au rara rakau maata ra, ei aronga are piritanga mei tei tataia ra.

16 Kua aere atura te tangata ki vao, e kua apai maira i taua au mea ra, e kua anga iora te tangata katoa i te au are piritanga no ratou ki runga i to ratou are, e i roto i to ratou au paepae, e i roto i te au paepae i te are o te Atua, e i roto i te arataa i te ngutupa vai ra, e i roto i te arataa i te ngutupa Epheraima.

17 Kua anga iora taua uipa anga kaota ra, i oki mai mei roto i te tuikaa anga ra, i te au are piritanga, e kua noo oki i raro ake i taua au are piritanga ra: kare oki te tamariki a Iseraela i pera mei te tuatau mairai o Iesua te tamaiti a Nuna, e tae ua atura ki taua rā ra. Maata rava akera te rekareka.

18 Tatau iora aia i taua buka ture a te Atua ra i tera rā i tera rā, mei te rā mua mai e tae ua atura ki te rā openga ra. Kua akono atura oki ratou i taua oroa ra e po itu akera; e tae akera ki te rā varu ra, ei uruoaanga tapu ïa, i tei tuatuaia maira.