Exodo

33 KUA tuatua mairā Iehova kia Mose, Ka aere, e aere atura koe, ko koe, e te au tangata taau i arataki mai mei te enua maira mei Aiphiti, ki te enua taku i taputou atu kia Aberahama, kia Isaaka, e kia Iakoba, ka na ko ei au ra e, E oronga au i te reira no toou ra uanga:

2 E naku e tono i te angela na mua ia koe; e naku e arumaki ke atu i te ngati Kanaana, e te ngati Amori, e te ngati Heta, e te Perizi, e te ngati Hevi, e te ngati Iebusi:

3 Ki te enua taʼe a vai ua te u e te meli: kare oki au e tae katoa i toou na tere; e au tangata kaki ketaketa oki kotou; ko te pou takiri roa aea kotou iaku i te arataa na.

4 E kite akera te au tangata i te reira tuatua kino, kua aue iora ratou; e kare rava tetai tangata i aao i tona au mea akamanea.

5 Kua tuatua mai ana oki a Iehova kia Mose, E karanga atu ki te tamariki a Iseraela, E au tangata kaki ketaketa kotou: teia au ka aere atu ei ki rotopu ia koe, e ka pou koe iaku, kare e mamia: e tenana, ka kopae ana i to au mea akamanea i rungao ia koe na, kia kite au i taku ravenga ia koe na.

6 Kua kiriti akera te tamariki a Iseraela i to ratou au mea akamanea i te pae maunga ra ko Horeba.

7 E kua apai aturā Mose i te Are, kua patia atura ki vao mai i te puakapa, i te atea ke i taua puakapa ra, e tapa iora te ingoa, Ko te Are uipaanga ra. E te tangata katoa i kimi ia Iehova ra, kua aere ïa ki vao ki te Are uipaanga, i vao mai i te puakapa ra.

8 E kia aere iorā Mose ki vao ki taua Are ra, kua tu anake akera te tangata ki runga, tu ua iora i te au ngutupa o to ratou katoa au puakapa, akara ua atura ia Mose na muri, kia tomo roa atu aia ki roto i taua Are ra.

9 E tei tomo angā Mose ki roto i taua Are ra, kua eke maira taua pou tumurangi ra, kua tu ua iora i te ngutupa o taua Are ra, kua karangaranga iorā Iehova kia Mose.

10 E kia akara akera taua aronga katoa ra i taua pou tumurangi ra i te tu ua anga i te ngutupa o taua Are ra, kua tu anake akera te au tangata katoa ra ki runga, kua akamori ko te tangata katoa i te ngutupa o tona uaorai puakapa.

11 E kua karangaranga ua mai a Iehova kia Mose ko te mata e te mata, mei te tangata e tuatua ua ki tona taunga. E i oki mairai aia ki te puakapa ra: kareka te tauturu uaorai, te tamaiti a Nuna ra, ko Iosua, e tangata ou, kare ïa i akaruke i te Are.

12 Kua karanga aturā Mose kia Iehova, I na, te tuatua maira koe kiaku e, E arataki koe i teianei iti-tangata ki runga: kare ra koe i akakite mai kiaku i taau e unga katoa i toku nei tere: ia koe oki i tuatua mai kiaku e, Kua kite au ia koe i toou ingoa, e kua kite aroaia koe e au.

13 E teianei, teia taku tuatua kia koe, kua kite aroaia au e koe ra, e akakite mai koe kiaku i toou aerenga, e kia kite au ia koe, kia kite aroaia au e koe ra: e akara oki koe e, e iti-tangata noou teianei iti-tangata.

14 Kua tuatua mairā Iehova, e na vaitata katoao au uaorai ia koe, e ka oronga au i te akangaroi anga noou.

15 Kua karanga aturā Mose kiaia, Kia kore koe uaorai e aere katoa ra, auraka matou e aratakiia i teianei.

16 Eaa oki te mea e kiteaʼi e, kua kite aroaia au ma toou katoa nei au tangata e koe? Kare aina tei vaitata katoao koe ia matou nei, e i taka ke ei matou, ko au e toou nei au tangata, i te tangata ravarai o te ao nei?

17 E kua tuatua mairā Iehova kia Mose, Ka pera rai au, taau i tuatua mai ana: kua kite aroaia oki koe e au, kua kite au ia koe i toou ingoa.

18 Kua karanga atura aia, Te pati atu nei au kia koe, e akakite mai koe kiaku nei i toou kakā.

19 Kua tuatua maira aia, a tuku rai au i te meitaki katoa noku ra na mua ia koe, e e tutu au i te ingoa o Iehova na mua ia koe; te aroa nei oki au i taku e anoano i te aroa, e te takinga-meitaki nei au i taku e anoano i te takinga-meitaki.

20 Kua tuatua maira aia, Kare koe e tika kia akara i toku mata; kare rava oki tetai tangata e ora kia akara mai iaku.

21 Kua tuatua mairā Iehova, I na, teianei te ngai i vaitatao kiaku nei, ei turanga noou ki runga i te mato nei:

22 E kia aere toku nei kakā na vaitatao ra, e tuku atu au ia koe ki roto i te akapi mato ra, ka tapoki atu ei au ia koe i toku rima, kia aere au na vaitatao:

23 E ka kiriti oki au i toku rima, e ka kite mai koe i toku tua: kareka toku mata, kare rava ïa e tika kia akaraia.