Isaia

45 TE NA ko nei a Iehova ki tei akatainuia e ia ra, kia Kuro, tei tāpuia e au i tona rima katau ra; kia eke te pa enua iaku ki mua i tona aroaro, e kia matara iaku te taukupu o te ui ariki ra; kia kiritiia te au pa eeu rua ki mua iaia, e kare oki te au pa e topiriia:

2 Ko au te na mua ia koe i te aere, e naku e akamarena ua i te au ngai pukupuku ra: e akangaangaa rava au i te au pa veo ra; e te au auri tamou pa ra, naku ïa e tipupu atu.

3 E oronga atu au ia koe i te au apinga no te poiri, e te au apinga i uuna ravaia ki raro i te ngai ngarongaro ra; kia kite oki koe e, ko au ko Iehova; ko te Atua no Iseraela, tei tapa i toou ingoa.

4 No toku tavini, no Iakoba, e no Iseraela taku i iki ra, i tapaia koe e au i toou ingoa: kua paapaa rai au i to ingoa, kore ua rai koe i kite iaku nei.

5 Ko au ko Iehova, e kare atu; kare atu Atua mari ra ko au: naku koe i tatua, kore ua rai koe i kite iaku nei;

6 Kia kite ratou mei te itinga o te rā ra, e mei te opunga mai o te rā, e kare atu, ko au anake ra; ko Iehova au, e kare atu;

7 Naku te mārama i rave, e naku i akatupu i te poiri: naku i akamoe i te au, e naku katoa te kino i anga: naku, na Iehova, i rave i taua au mea katoa nei.

8 Kia topata mai no runga mai, e te au rangi e; e kia riringi mai oki te au tumurangi i te tuatua-tika: kia eeu oki te enua, e kia tupu mai te ora, e kia tupu te tuatua-tika i tenana; naku, na Iehova, i anga i te reira.

9 Aue tona, to tei māro ki Tei anga iaia ra! tetai vaanga kapu potera no tetai au vaanga kapu potera i te one nei. E karanga atu ainei te karakaraea ki te potera, Eaa taau e anga na? e taau ra angaanga e tuatua ainei, Kare ona rima?

10 Aue tona, to tei karanga atu ki te metua tane, Eaa taau e akaanau mai? e ki te metua vaine, Eaa taau e anau nei?

11 Te na ko mairā Iehova, Tei Tapu i Iseraela nei, e Tei anga iaia; E ui mai ainei kotou iaku i te au mea e tupu i taku au tamariki nei? e te angaanga a toku rima, e akaue mai ainei kotou iaku?

12 Naku uaorai te enua nei i anga, e te tangata katoa i rungao, naku rai i anga: e na toku uaorai rima i oora i te rangi; e naku i akaue i to reira au nuku ravarai ra.

13 Kua akatu au iaia i te tuatua-tika, e e akatika ua au i tona katoa ra au arataa: nana e patu i toku oire, e nana e tuku i taku au tuikaa; kare ra to te oko, e kare to te tutaki: te tuatua mairā Iehova Sabaota ra.

14 Te na ko mairā Iehova, Te apinga no Aiphiti, e te oko na Kusa, e to Seba tangata teitei ra, te ka aere mai kia koe ra, ei tangata noou: e aru ratou ia koe; ma te pirianganaoa katoa i te aru anga: e tupou ratou ki raro i mua ia koe; e pati akatenga atu ratou ia koe, i te na ko anga atu e, Tei ia koe tika rai te Atua, e kare atu; kare atu Atua.

15 Koia tika rai, e Atua tangaro koe ia koe uaorai, e te Atua no Iseraela, e te Akaora e!

16 Ka akama ratou, e ka tumatetenga, ratou ravarai ra: e aere anake ratou ma te rapu ua tei tari i te idolo.

17 E ora ra Iseraela ia Iehova, i te ora mutu kore ra: kare kotou e akama, e kare e tumatetenga, e tuatau e tuatau ua atu.

18 Te na ko maira oki a Iehova, ko tei anga i te au rangi ra; koia te Atua, ko tei akaaite i te enua e nana i anga; nana i akatinamou, kare ra aia i anga ei mea puapinga kore ua; kua anga ra aia kia tangataia; Ko au ko Iehova, e kare atu

19 Kare au i tuatua i te ngai ngaro, i te ngai poiri o te enua nei: kare au i tuatua ki te uanga o Iakoba, E kimi puapinga kore ua mai kotou iaku. Ko au ko Iehova, ko tei tuatua i te tuatua-tika, te akakite nei au i te au mea tiratiratu.

20 E akaputu mai kotou, e aere mai; e uipa katoa mai, e tei ora mai no roto i te pa enua ra: e kamakura to te aronga i apai aere i te idolo rakau; ko tei pure ki te atua kare e tika kia akaora mai.

21 E akakite aere, kia akavaitata mai ratou; koia ïa, kia tavaitai oki i ta ratou tuatua anga ra: koai tei akakite mai i taua tuatua nei mei ito mai? koai tei akakite mai mei taua tuatau mairai? kare ainei ko au nei ko Iehova, e kare atu e Atua ko au anake ra? e Atua tuatua-tika e te Akaora; kare atu mari ra ko au.

22 E akara mai kotou iaku, kia ora, e te au openga mai o te enua ra: ko au oki te Atua, e kare atu.

23 Kua taputou au iaku uaorai; kua riro te tuatua no roto i toku nei vaa: e tuatua tika, e kare rava e oki mai; E tuturi te au turi katoa ki raro ki mua iaku, e taputou te au vaa katoa ra.

24 Ka riro i te na ko ra e, Tei ia Iehova anake ra te tuatua-tika, e te maroiroi noku: e e aere mai aia kiaia; ka akama anake ra te aronga katoa i riri mai iaia ra.

25 Ei ia Iehova te au uanga katoa o Iseraela e tikaia mai ei, e ka akatietie ei.