Iobu

9 KUA tuatua mairā Iobu, na ko maira,

2 Kua kite au e, koia tika rai te reira ra: akapeea ra e tikaʼi te tangata nei i mua i te Atua?

3 Kia inangaro aia i te māro mai iaia, tausani ua atu tana kare ua a te tangata nei e okotai iti ake.

4 Te pakari o te ngakau, e te mana o te ririnui: koai tei māro atu iaia, e kua tupu tana?

5 Ko tei apai ke atu i te au maunga, e kare ratou i kite: ko tei tatipoki ia ratou i tona ra riri:

6 Ko tei akangaueue i te enua, e taka ke atura i tona vairanga, e kua ruketekete iora tona au pou:

7 Ko tei akaue i te rā, e kare aia e iti mai; e kua sigiloia e ia te au etu:

8 Koia anake rai tei oora mai i te au rangi ra; e tei takai ki runga i te au ngaru o te moana:

9 Ko tei anga ia Uresa Oriona, e ia Matariki, e te au pia i te pae i apatonga ra.

10 E ravenga maata tana i rave ra, kare e kitea kia kimi e te au mea umereia, kare e ope kia tatau.

11 I na, na ko nei aia iaku nei i te aere, e kare au i kite: e te aere atura, kare ra au i kite iaia.

12 I na, te apai ke nei aia, e naai e akakore? Naai e karanga atu kiaia, Te aa ana koe?

13 Kia kore te Atua e akaanga ke i tona riri, e tupou te aronga tauturu nengonengo i raro ake iaia.

14 Ka tanga atu ei iaku kia karanga atu iaia, ka akatakaʼi taku aronga tuatua ki mua iaia?

15 Iaia ra, e tuatua-tika uaorai taku, kare au e ki atu, ka pure ra au ki taku akava.

16 Angairi au i kapiki, e kua āē maira aia; kare rai au e akatika e kua akarongo mai aia i toku reo.

17 No te mea te aati nei iaku ki te uriia, e te akamaata ara kore ua maira, i taku au puta.

18 Kare aia e vaoo ua iaku kia uti ua ana i toku aʼo, te akaki ua maira oki aia iaku ki te maramara.

19 Kia tuatua au i te ririnui, i na koia tei ririnui: e i te tuatua-tau ra, koai te ka riro mai ei kite naku?

20 Kia akatika au iaku uaorai, na toku vaa au e akaapa: kia karanga iora au, Kare aku ara na te reira e akakite i toku māro.

21 Angairi kare aku ara, kare rai au e akono iaku uaorai: ka akavaavaa rai au i toku ora.

22 Ko tetai rai teia, no reira au i tuatuaʼi e, Te mate nei te apa kore, e te aronga kino, iaia.

23 Kia taia viviki aereia e tetai mate, e kata aia i te timata anga o te aronga ara kore.

24 Kua orongaia te enua ki te rima o te aronga kino: te tapoki nei ra aia i nga mata o to reira ra au akava; e kare ra, teiea iora, e koai aia tei pera?

25 E viviki maata to toku au rā nei i to te orooro: te rere ke nei te reira, e kare i kitea te meitaki.

26 Kua riro ke mei te au pai tere viviki: mei te aeto kia rere mai ki runga i tana kai.

27 Kia tuatua oti au e, Ka akangaropoina atu au i toku maki, ka akatu ke au i taku mata, e ka akapumaana au iaku uaorai;

28 Te mataku nei au i toku nei au tumatetenga katoa, kua kite rai au e, kare koe e tuatua iaku i te ara kore.

29 Kua ara au ra, eaa iora oki te puapinga o taku māro anga?

30 Orei ua rai au iaku ki te vai kiona, e kia tamā au i oku rima ki te pua;

31 E uriia au e koe ki raro i te kopua vari, e e akaviiviiia au e toku uaorai kakau.

32 Kare oki aia i te tangata mei iaku nei, ka karanga atu ei au kiaia, e kia aravei katoa maua i te akavaanga.

33 Kare oki e akaongi ia maua, ka tuku ei i tona rima ki runga ia maua ravarai.

34 Kia rave ke ra aia i tana rakau pāpā iaku nei, e auraka au kia rikarika i te mataku iaia ra:

35 Kua tuatua ïa au i reira, ma te mataku kore iaia; kare ra mei te reira iaku nei.