Exodo

28 E KAPITI katoa mai kia koe to tuakana ko Aarona, e tana puke tamariki tamaroa katoa, no roto i te tamariki a Iseraela, ei rave i te taoonga taunga i mua iaku, ko Aarona, ko Nadaba e Abihu, ko Eleazara e ko Itamara, nga tamaroa a Aarona ra.

2 Ka anga oki koe i te kakau tapu no to tuakana no Aarona, ei inuinu e ei manea.

3 E tuatua oki koe ki te aronga ngakau pakari ravarai, i tei akakiia e au i te vaerua kite, kia anga ratou i te kakau o Aarona, kia akatakaia aia ei rave i te taoonga taunga ki mua iaku ra.

4 Teia ta ratou kakau e anga; i te tapoki umauma, e te tiputa, e te pona roroa, e te piriaro, e te pare, e te tatua: ko ta ratou ïa kakau tapu e anga no to tuakana no Aarona, e no te au tamariki tamaroa nana ra, kia rave aia i te taoonga taunga ki mua iaku nei.

5 E rave ratou i te auro, e te kakau kerekere, e te purapura, e te muramura, e te orongā.

6 Ka anga ai ratou i taua auro ra, e te kakau kerekere, e te purapura, e te muramura, e te orongā i taviriia ra, ei tiputa, e angaanga na te taunga karape.

7 E nga tapoki-pakuivi ra ka tupaupauia ïa ki rungao, ei nga tapa e rua ka tupaupauiaʼi.

8 E te tatua manea i rungao i mou ei te tiputa, kia okotai rai tu apinga i te anga angaia, e auro rai, te kerekere, e te purapura, e te muramura, e te orongā i taviriia ra.

9 E rave oki koe i nga toka sema e rua, ka kokoti ei i te ingoa o te au tamariki a Iseraela ki rungao:

10 Toko ono puke ingoa ki rungao i tetai toka, e nga ingoa toe e toko ono ra ki rungao i tetai toka, ma te akono i to ratou anau anga.

11 Mei ta te kokoti toka ra, mei tei kokotiia ki runga i te sigilo ra, taau e kokoti i te au ingoa o te au tamariki a Iseraela ki rungao i nga toka ra: e akamou oki koe i nga toka ra ki roto i te āriki auro ra.

12 Ka tuku oki koe i aua nga toka ra ki rungao i nga tapoki-pakuivi i taua tiputa ra, ei toka manakoanga no te tamariki a Iseraela: e na Aarona e apai i to ratou au ingoa ki runga i ona nga pakuivi ki mua i te aroaro o Iehova ei manakoanga.

13 K anga oki koe i nga āriki auro ra;

14 E e rua oki pirianganaoa auro meitaki i nga poo; ei mea koviriviri taau e anga, e tamou oki koe i nga pirianganaoa koviriviri ki nga āriki ra.

15 E anga oki koe i te tapokiumauma tuatua-tau ra, ma te angaanga a te taunga karape; mei te angaanga ki runga i te tiputa taau e anga; ei auro, e te kerekere, e te purapura, e te muramura, e te orongā i taviriia, kia anga koe ra.

16 Kia aiteite nga aro e a; kia okotai angaonu te roa, kia okotai oki angaonu te pararauare, kia okotai angaonu te roa, kia okotai oki angaonu te pararauare, kia tua ruaia oki.

17 E akamou oki koe i te toka ki roto e kia piri, kia a tupāti toka; te tupāti mua ra, ei saradio ïa, e te topazi, e te bereketa; ko te tupāti mua ra ïa.

18 E te rua o te tupāti ra, ei emeradino ïa, e te saphiro, e te ieloma:

19 E te toru o te tupāti ra, ei uakini ïa, e te sebu, e te ametusi:

20 E te a o te tupāti ra, ei berulo ïa, e to sema, e te iasepe: e to ratou akamouanga, ei roto ïa i te auro akamou ei.

21 Ei vairanga ingoa taua au toka nei no te tamariki a Iseraela, tino ngauru ma rua, ko to ratou ïa au ingoa; mei te kokoti anga sigilo ra, ko te toka ko te ingoa, e kia tau ki nga kopu tino ngauru ma rua ra.

22 E anga oki koe i nga pirianganaoa auro meitaki koviriviri no te tapoki-umauma i nga poo ra.

23 E anga oki koe i e rua tātai auro ki runga i te tapoki-umauma ra.

24 E momono oki koe i nga pirianganaoa auro koviriviri ra ki roto i nga tātai i nga poo tapokiumauma ra.

25 E nga openga i taua nga pirianganaoa koviriviri ra, e tuku ïa ki roto i nga āriki ra, ka akamou ei ki runga i nga tapoki pakuivi o te tiputa i te pae i mua ra.

26 E anga rai oki koe i e rua tātai auro, ka akamou ei i nga poo ki raro i te tapoki-umauma ra i te tapa i roto ra, i vaitata i te tiputa ra.

27 E anga rai koe i e rua tātai auro, ka akamou ei i nga tapoki-pakuivi o te tiputa ra, i raro ra, i te pae ki mua, i vaitata i te vaʼi i tupaupauia ki te tatua manea o te tiputa ra.

28 E tākai oki ratou i nga tātai o te tapokiumauma ra, i nga tātai o te tiputa i tetai tākai kerekere, kia piri ki te tatua manea o te tiputa, kia kore oki te tapoki-umauma e taka ke i te tiputa.

29 E ei runga i te umauma o Aarona te ingoa o te tamariki a Iseraela vai ei ki runga i te tapoki-umauma tuatua-tau ra, kia aere aia ki roto i te ngai-tapu ra, ei manakoanga tamou ki mua i te aroaro o Iehova ra.

30 E naau oki e tuku i te Urima e te Tumima ki runga i te tapoki-umauma tuatua-tau ra; ei runga i te umauma o Aarona vai ei te reira, kia aere aia ki roto ki mua ia Iehova ra: ei runga ia Aarona te tuatua-tau i te tamariki a Iseraela ki runga i tona umauma, ki mua i te aroaro o Iehova i te au rā katoa ra.

31 Ka anga oki koe i te pona roroa i raro ake i te tiputa, ei kakau kerekere anake ïa.

32 Ei rua to te pae ki runga ra i rotopu: e i avereia te tapa o taua rua ra e pini ua ake, mei te rua o te kakau tamaki ra, kia kore e motu.

33 E ei remuna taau e anga na runga i te tapa ki raro ra, ei kerekere, e te purapura, e te muramura, e pini ua ake taua tapa ra; e te ove auro i roto i te va remuna e pini ua ake.

34 Okotai ove auro okotai remuna, okotai ove auro okotai remuna, na runga i te tapa pona roroa, e pini ua ake.

35 Ei runga ia Aarona te reira, kia rave aia i tana taoonga: kia akarongoia aia kia aere aia ki roto i te ngai-tapu ki mua i te aroaro o Iehova ra, e kia aere mai oki aia ki vao, kia kore aia e mate.

36 E anga oki koe i tetai tarae auro meitaki ra, ka kokoti ei ki rungao, mei te kokoti sigilo ra, KIA TAPU TO IEHOVA.

37 E naau e tamou ki runga i te pare i tetai tākai kerekere; ei te pae ki mua i te pare vaoo ei.

38 Ei runga i te rae o Aarona vaoo ei, kia vai rai ia Aarona te apa a te tamariki a Iseraela, i te au mea tapu ta ratou i akatapu ra, i ta ratou katoa apinga tapu i orongaia ra; kia vaoo tamou marie rai ki runga i tona rae, kia kitea mai ratou e Iehova ra.

39 E e akamanea koe i taua piriaro orongā, e te pare taau e anga ra, ei orongā ïa, kareka te tatua ra, ei angaanga akamanea ïa na te tui.

40 E anga katoa koe i te piriaro no te tamariki a Aarona, e anga oki koe i te tatua no ratou, e te pare taau e anga no ratou, ei inuinu e ei manea.

41 E naau e tuku ki runga i to tuakana ia Aarona, e ki runga katoa i tana au tamariki; e e akatainu koe ia ratou, e e akataoonga oki ia ratou, e e akataka oki ia ratou, kia rave ratou i te taoonga taunga ki mua iaku nei.

42 E tui oki koe i tetai piripou orongā ra, ei tapoki ia ratou: mei te taukupu ra e tae ua atu ki te ūā i te roa ra.

43 Ei runga ïa ia Aarona, e tana au tamariki, kia aere ratou ki roto i te Are uipaanga ra, e kia akavaitata ratou ki te atarau, e rave i te taoonga i roto i te ngai-tapu ra: ko te rave aea oki ratou i te ara, e ko te mate aea: ei akonoanga tamou teia nana, e na tona uanga a muri ake.