Amosa

4 AKARONGO mai ana kotou i teianei tuatua, e te au puakatoro i Basana! i runga i te maunga i Samaria ra; ko tei takinga-kino i te tangata rikiriki, e tei taotaomi i te aronga putaua; ko tei tuatua ki to ratou au atu ra, Ka apai mai ana kia inu matou.

2 Kua taputou te Atu ra ko Iehova i tona uaorai tapu, I na, te vaitata maira te au rā ki runga ia kotou, e ravea keiaʼi kotou ki te matau ii ika ra.

3 E na te ngai ngaa kotou i te tomo ki vao, ratou katoa na te ngaa i mua iaia; e titiriia oki kotou ki vao i te are ariki ra, te tuatua mairā Iehova.

4 Ka aere mai kotou ki Betela nei rave ei i te ara; ei Gilagala e akamaataʼia i ta kotou au atinga i te au popongi katoa ra, e ta kotou ngauru anga i te toru o te au mataiti katoa ra.

5 E apai i te atinga akameitaki ma te akaopue; e tutu aere, e akakite i te au atinga apai ua ko ta kotou ïa e anoano, e te au tamariki a Iseraela, te tuatua maira te Atu ra ko Iehova.

6 I oronga ua atu ei oki au i te nio mā ia kotou i to kotou au oire katoa ra, e te kai kore i to kotou au ngai katoa ra, kare ra kotou i oki mai kiaku nei, te tuatua mairā Iehova.

7 I tāpu ei oki au i te ua ia kotou, te vai ra oki nga marama e toru e akaū ei: e kua akatopa au i te ua ki runga i tetai oire, e kare au i akatopa i te ua ki runga i tetai oire; kua topaia tetai pae e te ua, e te pae kare i topaia e te ua ra, kua mae ïa.

8 Kua aere oki nga oire e rua e e toru oki ki te oire okotai, e inu i te vai, kare ra i pangia te kaki, e kare rai kotou i oki mai kiaku nei, te tuatua mairā Iehova.

9 Kua pāpā au ia kotou ki te pueka e te veravera, to kotou au kainga manga, to kotou au kainga vine, e ta kotou au suke, e ta kotou au olive, kua pou ïa i te anue; e kare rai kotou i oki mai kiaku nei, te tuatua mairā Iehova.

10 Kua akaunga atura au i te maki-mate ki rotopu ia kotou, mei tei Aiphiti ra, kua taia e au to kotou au tangata ou ki te koke, ma ta kotou au oroenua katoa i tuikaaia ra; kua akapeke au i te aunga kino o to kotou au puakapa ki runga i o kotou rua putaiu; e kare rai kotou i oki mai kiaku nei, te tuatua mairā Iehova.

11 Kua uritumuia e au tetai pae o kotou, mei ta te Atua uritumu anga ia Sodoma e Gomora; e mei te komotu ai kotou i kiritiia mai no roto i te ai; e kare akerai kotou i oki mai kiaku nei, te tuatua mairā Iehova.

12 E teianei, e akapera au ia koe, e Iseraela, e no te mea, e akapera au ia koe, ra, e akateateamamao koe i te aravei anga i to Atua, e Iseraela e.

13 I na oki, ko tei anga i te au maunga; e tei akatupu i te matangi ra; e tei akakite ki te tangata nei i tona manako; ko tei akariro i te popongi ei poiri, e tei aaere na runga i te au ngai teitei o te enua nei; ko te Atua Sabaota ra, ko Iehova, tona ingoa.