Mataio

2 E KIA anau a Iesu i Betelehema i Iudea ra, i te au rā o te ariki ra o Heroda, i na, e au tangata pakari tei aere mai ki Ierusalema, mei te itinga o te rā mai, kua na ko maira,

2 Teiea te Ariki anau ou o te ngati Iuda nei? kite akenei oki matou i tona etu i te itinga o te rā, i aere mai nei matou e araara atu iaia.

3 Kite akera te ariki ra ko Heroda i te reira tuatua, kua taitaia akera aia, ma to Ierusalema katoa.

4 E akaputuputu maira aia i te kau taunga nunui katoa, e te aronga tata tuatua a te au tangata, kua ui atura aia ia ratou i te ngai e anau ei te Mesia.

5 Kua tuatua maira ratou kiaia, Ei Betelehema Iudea nei e anau ei: te pera maira oki te peroveta i te tata anga mai,

6 “E ko koe, e Betelehema, i te enua o Iuda nei, kare koe i te mea ngiti rava i rotopu i te au ariki o Iuda; no roto mai ia koe tetai Tutara, e nana e arataki i toku nei au tangata ia Iseraela.”

7 Kua tiki poiri aturā Heroda i te au tangata pakari, kua ui marie atura ia ratou i te mama anga mai o taua etu ra.

8 Kua akaunga atura aia ia ratou ki Betelehema, na ko atura, Ka aere ka kimi marie i taua tamaiti iti ra; e kia kitea atu ia kotou, e oki mai, e akakite mai kiaku, kia aere katoa atu au e araara atu iaia.

9 E kite akera ratou i ta te ariki ra, aere atura; e i na, te etu ta ratou i kite i te itinga o te rā, kua na mua atura ia ratou, e tae ua atura ki rungao i te nooanga o taua tamaiti iti ra; noo iora.

10 Rai rava akera to ratou rekareka i to ratou kite anga i taua etu ra.

11 E tae atura ratou ki roto i te are, kite atura ratou i taua tamaiti iti ra, e tona metua vaine ko Maria, akatopa iora ratou ki raro, araara atura iaia; kiriti akera i ta ratou apinga, apai atura i te taoonga-rima, te auro, te tapou kakara, e te manongi.

12 E i ako akairimoeia mai ratou e te Atua, auraka e oki atu kia Heroda ra, aere atura ratou ki to ratou uaorai enua na tetai ara ke.

13 E riro atura ratou, kua mama maira tetai angela a te Atu, akairimoe maira ia Iosepha, na ko maira, Ka tu, ka rave i te tamaiti iti, e tona metua vaine, e oro ki Aiphiti; e noo i reira, e kia karangaia atu koe e au; e kimi oki a Heroda i te tamaiti iti e ta.

14 Kua tu akera aia, rave iora i te tamaiti iti e te metua vaine, aere atura ki Aiphiti i te po:

15 Noo atura i reira, e tae akera ki te matenga o Heroda; tika atura ta te Atu i tuatua mai i te peroveta, “I tiki naia e au taku tamaiti i Aiphiti.”

16 E kite akerā Heroda e, kua tapikipikiia aia e te au tangata pakari ra, makitakita rava akera aia, tono atura i te tangata, e ta atura i te aronga tamariki tamaroa katoa i Betelehema, e te au ngai katoa i reira uaorai, ko tei tae ki te rua o te mataiti ra e tei kore, mei te tuatau mairai tana i ui marie i te au tangata pakari ra.

17 Tika atura i reira te tuatua a te peroveta ra a Ieremia, ka na ko mai ei ra e,

18 “E reo tei kitea i Rama, e aue, e te tangi, e te mii maata, ko Rahela i te iriea anga i tana au tamariki, e kare rava akera i na, no te mea kare nei ratou.”

19 E kia mate a Heroda, i na, kua mama maira te angela a te Atu, akairimoe maira ia Iosepha i Aiphiti,

20 Na ko maira, Ka tu, ka rave i te tamaiti iti, e te metua vaine, e ka oki ki te enua o Iseraela: kua mate oki te aronga i umuumu e ta i te tamaiti iti nei.

21 Kua tu akera aia, kua rave iora i te tamaiti iti ra e te metua vaine, oki maira ki te enua o Iseraela;

22 Kia kite ra aia e, tei ia Arekelau te au ei tupau i tona metua ia Heroda i Iudea ra, mataku iora aia kia aere ki reira; e i ako akairimoeia maira aia e te Atua, aere atura aia i te enua i Galilea:

23 E tae atura aia, kua noo iora ki tetai oire ko Nazareta te ingoa, tika atura te tuatua a te au peroveta ra, E karangaia aia i te tangata Nazareta.