Angaanga

12 I TAUA tuatau ra, kua akatika maira te ariki ra ko Heroda i tona rima e takinga-kino mai i tetai pae o te ekalesia ra.

2 E kua ta iora ia Iakobo i te taeake o Ioane ki te koke.

3 E kite akera aia e, te meitaki ra te ngati Iuda i te reira, kua umuumu atura aia e opu katoa ia Petero. (Ko te au rā manga akaopue koreia ra te reira.)

4 E rauka iora aia iaia, tuku atura aia iaia ki roto i te are tapekaanga ra, e tuku atura iaia ki te au vaeau tino ngauru ma ono ra ei tiaki iaia: i manako aia e, kia oti te pasa arataki mai ei iaia ki vao i te tangata.

5 Tiakiia iorā Petero i roto i te are tapekaanga ra: kua pure atura te ekalesia i te Atua iaia kare i tukumoe.

6 E vaitata akerā Heroda i te arataki mai iaia ki vao, te moe ua rā Petero i taua po ra i rotopu i ngo vaeau toko rua, i tapekaia ki te auri pirianganaoa e rua; e tei te ngutupa nga vaeau i te tapapa anga i taua are tapekaanga ra.

7 E i na, kua mama maira tetai angela a te Atu ra, e kua kakā maira te mārama ki roto i taua are tapekaanga ra; kua papaki maira aia i te kaokao o Petero, akaara maira iaia, na ko maira, Ka tu viviki. Topa atura nga auri pirianganaoa i tona rima.

8 Kua tuatua maira te angela kiaia, Ka tatua na ia koe, e tākai ana i to tamaka i to vaevae. E kua pera atura aia. Kua tuatua maira aia kiaia, Ka kakau ana koe i to kakau, ka aru mai ei iaku.

9 Kua aru atura aia iaia i te aere anga atu ki vao: kare aia i kite e, e mea tika ta taua angela ra; maara akera e, e orama tana i kite ra.

10 E topa maira ia raua tei mua tiaki ra e te rua oki, tae atura raua ki te pa auri e tae atu ei ki roto i te oire ra; kua amama ua maira taua pa ra kia raua: tomo atura raua ki vao, aere atura e topa maira tetai arataa; akaruke maira te angela iaia i reira.

11 E rako tangata mairā Petero, kua na ko akera aia, Kua kite pu tikai au e, kua tono mai te Atu i tana angela, e kua akaora iaku i te rima o Heroda, e te manako o te ngati Iuda.

12 Akamaara iora aia i taua mea ra, e oti akera, aere atura aia ki te are o Maria te metua vaine no Ioane, ko Mareko tetai ingoa; manganui oki tei putuputu i reira, te pure ra.

13 E te topāpā aturā Petero ki te pa i te tomoanga ra, kua aere maira tetai vaine ko Roda te ingoa e ui e, Koai tena?

14 E kite akera aia i te reo o Petero, kare akera aia i eeu i te pa i te rekareka, oro atura ki roto akakite atura e, te tu ua mairā Petero i te ngutupa akera.

15 Kua tuatua maira ratou kiaia, Kua nenevaia koe. Kua manono atura aia e, Koia tikai. Kua tuatua maira ratou, Ko tana angela ïa.

16 Kua tamou marie aturā Petero i te topāpā anga atu, e kiriti akera ratou i te pa, e kite maira iaia, itirere atura.

17 Kua kamokamo atura aia ki tona rima kia muteki atu ratou, kua akakite atura aia kia ratou i ta te Atu arataki anga mai iaia ki vao i taua are tapekaanga ra. Kua karanga atura oki aia, E akakite atu kia Iakobo e te au taeake i teianei au tuatua. Riro atura aia, aere atura ki tetai ngai ke atu.

18 E ao akera, kare e keu mea ngiti to taua aronga vaeau ra ia Petero.

19 Kua kimi aturā Heroda iaia, e kare akera aia i kitea, kua ui marie atura aia ki te au tiaki, e akaue atura e arataki atu ia ratou e ta. Aere atura aia ki Kaisarea, mei Iudea atu, noo atura i reira.

20 Te riri rā Heroda i to Turia e to Sidona: kua aere katoa maira ratou ki mua i tona aroaro, kua oti akera oki a Belaseto te tiaki i te pia rai o te ariki ra i te akataungaia e ratou, kua pati atura ratou i te au; no te mea, no te enua o te ariki ra te kai i to ratou enua.

21 E tae akera ki te rā i akonoia ra, kua noo mairā Heroda ki runga i te terono, ma te kakau ariki i te kakau anga, e kua korero maira kia ratou.

22 Kua kapiki atura te tangata, E reo ïa no te Atua, kare ïa i to te tangata.

23 Kua ta maira tetai angela o te Atu iaia i reira, no te mea kare aia i oronga atu i te kakā ki te Atua ra: pou atura aia i te kaiia e te iro, e mate atura.

24 Tupu atura oki te tuatua a te Atua, e pararauare rava atura.

25 Kua oki mairā Banaba e Saula mei Ierusalema mai, kia oti to raua tere, arataki katoa maira raua ia Ioane, ko Mareko tetai ingoa ra.