Nahuma
2 KUA tae mai tei akapueurikiriki ra ki mua ia koe; tapapa i te punanga, kia matakite i te arataa, e ruru kia piri i te taukupu, e akamaroiroi ia koe uaorai ki te ririnui maata.
2 E akaoki mai oki a Iehova i te meitaki o Iakoba, mei te meitaki katoa o Iseraela: pou uaʼi ratou i tei akapou ra, e kore uaʼi ta ratou au rara vine.
3 Kua akakutekuteia te paruru o te aronga ririnui nona ra; kua kakau te aronga toa ki te kakau kutekute: tei te au kariota te au koke ai ra, i te rā e akonokono ei aia ra; e kua ruruia te au korare.
4 Kua oro a neneva ua te au kariota i te au arataa, kua oro pu ua, anatu ana mai, i te au ngai atea; mei te rama to ratou tu, mei te korapa uira te viviki.
5 Kua akamaara aia i tona aronga ririnui; kua tukiakia aere ratou i to ratou aerenga; kua rapurapu ratou ki te pae atu, e kua akonokonoia te paruru.
6 Kua kiritiia te au ngutupa o te au kauvai ra, e kua taravai ua te are o te ariki.
7 Kua vai taaka uā Huzaba, kua riro i te apai ki runga, ma te au vaine i te aue aere anga mei te aue kukupa ra, ma te papaki i to ratou umauma.
8 Tau ua rai Nineve ki te vai roto, mei ito mai, e ati ra ratou. Te kapiki ra, Ka tu uao na, ka tu uao na; kare ra tetai e akara mai ki muri.
9 Ka noni na kotou i te ario, ka noni katoa i te auro: kare e ope anga te au apinga nui: kua maata ua atu te au apinga inangaroia.
10 Kua putaua aia, kare ua i toe, e kua pou; e kua tae a vai ua te ngakau, e kua pāpā te au turi; e mamae maata tei te au taukupu ravarai, e kua raumatea pu ua te au mata ravarai.
11 Teiea te ana o te au liona? e te ngai i angaiiaʼi te au liona ou? te ngai i aereia e te liona, ma te liona ua ra, e te punua liona, e kare e akamataku mai?
12 Kua aeae te liona i ta te au punua nana e kua rava, e kua kukumi i ta tana ra au liona ua ra, e kua akaki aia i tana au ana ki te kai, e tona au nooanga ki te apinga aru.
13 I na, te patoi atu nei au ia koe, te tuatua mairā Iehova Sabaota ra, e ka taʼu na au i to au kariota i te auai; e e pou to au liona ou ki te koke, e tipu ke atu oki au i taau i noni ra i runga i te enua nei, e te reo o taau au karere kare e kitea akaou.