Isaia

38 TEI taua au rā ra, mate iorā Hezekia i te maki, e maki mate. Kua aere maira te peroveta ra ko Isaia te tamaiti a Amoza kiaia ra, e kua tuatua maira kiaia, Te na ko mairā Iehova, Ka akonokono ana i to ngutuare; ka mate oki koe, kare e ora.

2 Kua ariu akerā Hezekia i tona mata ki te pae paruru, e kua pure iora kia Iehova,

3 E kua na ko atura, Teia taku tuatua kia koe, e Iehova e, e akamaara mai koe iaku i toku nei aerenga ki mua ia koe ma te tuatua-mou, e ma te ngakau tiratiratu, e kua rave au i te mea tika i mua i to mata. Aue iorā Hezekia, e aue maata.

4 Ei reira te tae anga mai o te tuatua a Iehova kia Isaia, na ko maira,

5 Ka aere, ka karanga atu kia Hezekia, Te na ko mairā Iehova, te Atua o to tupuna ra o Davida, Kua akarongo au i taau pure, kua kite au i toou roimata: i na, e kapiti katoa atu au ki toou ra au rā, okotai ngauru ma rima i te mataiti:

6 E naku koe e akaora, e teianei oire katoa, i te rima o te ariki o Asura ra; e naku e tiaki i teianei oire.

7 Teia taau akairo no ko ia Iehova ra, e ka rave rai a Iehova i tana i tuatua maira:

8 I na, te akaoki nei au i te maru ata ki runga i te akairo rā, tei topaia e te rā i te akairo rā o Ahaza, e kia okotai ngauru ake akairo taku e akaoki. Kua oki maira te rā ki muri okotai ngauru akera akairo, i te au akairo i topaia e ia ra.

9 Te tuatua a te ariki o Iuda ra a Hezekia i tata, iaia i maki ra, e kua ora iora i taua maki nona ra:

10 Kua tuatua oki au e, Ei rotopu tikai i oku puke rā, e tomo ei au i te ngutupa o ade: kua ngere au i te toenga o toku ra au mataiti.

11 I karanga ana oki au e, Kare au e kite akaou ia Iehova, ia Iehova oki i te enua o te aronga i ora nei: kare au e kite akaou i te tangata nei, ma te aronga e noo i te ao nei.

12 Kua kiritiia toku nei nooanga, e kua akataka keia iaku nei, mei te puakapa o te tiaki mamoe ra: kua atuatuia e au toku ora mei ta te raranga kakau ra: kua kokotiia au e ia i te mouranga: rā tai uaia au ia koe ra.

13 I akatupua na au e ao ua akera, mei te liona ra aia i te atiati anga i toku nei au ivi: rā tai uaia aua ia koe ra.

14 Mei te susa, mei te agura i nanunanu ei au: i aue ua oki au mei te kupupa ra: kua era ua oku mata i te nānā ua anga ki runga: e Iehova, kua mate au: e tauturu mai koe iaku.

15 E akapeea atu au? Kua tuatua mai oki aia kiaku, e nana uaorai i rave. Toku nei puke mataiti toe, e aere marie rai au, no te mamae maata o toku vaerua nei.

16 E te Atu, no teianei au mea e oraʼi te tangata, tei taua au mea anake rai te ora o toku nei vaerua: kua akakore oki koe i toku maki, e kua akaora mai koe iaku.

17 I na, kua akariroia toku mamae maata ei au: kua tangi maria koe i toku vaerua i roto i te vaarua mate: e kua akaruke koe i taku au ara katoa nei ki muri mai i to tua ra.

18 Kare oki te vaarua e akameitaki mai ia koe, kare oki e tika i te mate kia akapaapaa mai ia koe: kare te aronga e aere ki raro i te vaarua ra e manakonako ki te tuatua-mou naau ra.

19 Na teï ora, na tei ora, nana e akameitaki ia koe, mei iaku nei i teianei rā: na te metua e akakite ki te tamariki i taau ra tuatua-mou.

20 Kua vave a Iehova i te akaora iaku: e imene ei tatou i taku au imene, e ope ua ake te au rā katoa o to tatou ora anga nei i roto i te are o Iehova.

21 Kua tuatua anā Isaia, E rave ratou i tetai kou suke, e ka topiri i te reira ki runga i te maki, e ka ora ïa aia.

22 I tuatua ana oki a Hezekia, Eaa te akairo e ka tae au ki runga i te are o Iehova?