Mika

7 AUE oki au nei e! kua riro oki au mei te mea e kua akaputuputu ratou i te kai mou, mei te mea e kua koi akaope i te ua vine; kare ua e kaui toe kia kai, kare e suke para i kakiia e toku vaerua ra.

2 Kua mate te tangata meitaki i runga i te enua nei, e kare ua e tangata tiratiratu i rotopu i te au tangata nei; te moetapapa anake ra ratou ki te toto; te arumaki ra te tangata ravarai i tona uaorai taeake ki roto i te kupenga.

3 Kua vave tikai to ratou rima kia rave i te kino; kua pati te ariki, e te akava katoa, i te oko; e kua tuatua te tangata nui i te inangaro o tona ngakau, e kua tavaitai ratou i te taruri ke.

4 Kua aite tei meitaki ia ratou ki te rakau taratara, tei tiratiratu ra e ngari ake te koro rakau taratara; te vaitata maira te rā o toou ra au tiaki, e te tutaki anga ia koe; ei teianei e tupu ei to ratou tumatetenga.

5 Auraka kotou e akarongo ua atu ki te oa, auraka e irinaki ki te oa tumanava; e tiaki marie i te ngutupa o to vaa ki tei moe ki roto i to keke ra.

6 E akakino oki te tama i te metua tane; e tu mai te tamaine e patoi i tona metua vaine, te unonga vaine e patoi i tona metua ongoai vaine ra; to te tangata nei au enemi, ko te au tangata ïa o tona uaorai ngutuare.

7 E akara ra au ia Iehova, e tapapa au i te Atua o toku nei ora; e akarongo mai taku Atua iaku nei.

8 Auraka koe e rekareka ki runga iaku, e taku enemi: inga uaorai au, e tu akaou rai au ki runga, noo uaorai au ki roto i te poiri, e riro a Iehova ei mārama noku.

9 E akakoromaki au i te riro o Iehova, no te mea kua ara au iaia; e kia akatika aia i taku nei tuatua, e kia rave aia i te tuatua-tau iaku nei; e arataki aia iaku ki te mārama: e kite au i te tuatua-tika nana ra.

10 Ei reira taku enemi e kite ei, e e ngaro aia i te akama, ko tei tuatua mai kiaku e, Teiea to Atua ko Iehova? e kite taku mata iaia; ei teianei aia e takatakaiiaʼi mei te vari i te au arataa ra.

11 I te rā e patuiaʼi taau ra au koro, ei taua rā ra e topa ke atu ei tei akaueia nei;

12 I taua rā ra e aere mai ei ratou kia koe mei Asura mai e te au oire o Aiphiti, mei Aiphiti mai e tae ua atu ki te kauvai, mei tetai tai e tae rava atu ki tetai tai, e mei tetai maunga e tae rava atu ki tetai maunga.

13 Ka tanea ra te enua no te aronga i noo i reira, no te ua o ta ratou au ravenga.

14 E akaangai i to au tangata ki te tokotoko naau, i te anana ra i taau ra tuanga; tei noo meamea ua ki roto i te vaorakau ra, i rotopu tikai i Karamela; ei Basana, e ei Gileada, ratou kaikai ei, mei tei te au rā taito ra.

15 Mei tei te au rā i aere mai ei koe mei te enua ra mei Aiphiti, ka akakite ei au iaia i te au mea umereia.

16 E akara te pa enua, e e akama i to ratou ririnui katoa; e tapoki ratou i te vaa ki te rima; e turi oki to ratou taringa.

17 E mitimiti ratou i te one-pueu mei te ovi ra; e ruketekete ratou i roto i to ratou au pipini anga mei te au mea totoro o te enua nei; e mataku ratou i to tatou Atua ra ia Iehova, e e mataku oki ratou ia koe.

18 Koai ïa Atua e tau ia koe ra, i te akakore anga i te tuatua kino, e te tutaki kore anga i te ara, a te toenga o tana ra tuanga? kare aia e akamou i tona riri e tuatau ua atu, no te mea, e mea rekareka iaia te aroa.

19 E tangi akaou mairai aia ia tatou, e akavi mairai aia i to tatou au kino; ka riro koe i te titiri i ta ratou au ara ravarai ki raro roa i te au ngai oonu o te moana.

20 E aronga mai koe i te tuatua-mou kia Iakoba, e te aroa kia Aberahama, i taau i taputou mai ki to matou ai metua mei te au rā taito mairai.