Ieremia

18 TE TUATUA no ko ia Iehova i tae mai kia Ieremia ra, i te na ko anga mai e,

2 Ka tu, ka aere ki raro ki te are o te potera ra, ei reira au e akakite atu ei ia koe i taku nei tuatua.

3 Kua aere atura au ki raro i te are o te potera ra, e i na, te anga ra aia i tetai mea ki runga i te taviri anga ra.

4 Kino iora te kapu karakaraea i angaia e ia i te rima o te potera ra: kua rave akaou iora aia, ei kapu ke ïa, ta te potera uaorai i inangaro kia anga ra.

5 E kua tae maira te tuatua a Iehova kiaku nei, na ko maira.

6 Kare ainei e tika iaku kia rave, mei ta teianei potera, ia kotou, e te ngutuare o Iseraela e? te tuatua mairā Iehova. I na, mei te karakaraea i roto i te rima o te potera, koia katoa kotou i toku nei rima, e te ngutuare o Iseraela e.

7 Kia tuatua au i tetai enua, e tetai basileia, i te kiriti tumu anga, e te vavaʼi anga ki raro, e te akapou anga;

8 Kia ariu ke maira taua enua, i tuatuaia e au ra, i to ratou ra kino, e tataraara au i taua kino i manakoia e au e tuku ki reira ra.

9 E kia tuatua au i tetai enua, e tetai basileia, i te patu anga ki runga, e te tanu anga;

10 Kia rave ra aia i te kino ki mua i toku aroaro, kia kore e akarongo mai ki toku reo, e tataraara au i taua meitaki ra taku i tuatua e rave kia meitaki aia ra.

11 E teianei, tera taku tuatua, e karanga atu ki te au tangata no Iuda, e te aronga e noo ki Ierusalema, e na ko atu, Te na ko mairā Iehova, I na, te akakoro nei au i te kino ia kotou, e te kimi nei au i te ravenga ia kotou: e ariu mai kotou, ko te tangata katoa i tona uaorai aerenga kino, e kameitaki ana i to kotou au aerenga e ta kotou au ravenga.

12 Kua tuatua maira ratou, Kare ïa o reira manako anga; e aru ra matou i to matou uaorai manako, e rave matou katoa i te inangaro o tona uaorai ngakau kino.

13 E teianei, te na ko mairā Iehova, Ka ui ki te pa enua i tenana, koai tei akarongo i te au mea mei teia te tu? e mea rikarika rava tei raveia e te paretenia a Iseraela nei.

14 E kore ainei te kiona o Lebanona i runga i te mato e taʼe ua mai i te kainga? e marō ainei te au peka vai e taʼe anuanu ra?

15 Kua akangaropoina ra toku iti-tangata iaku, kua tutungi ratou i te rakau kakara i te mea puapinga kore: kua akaturori ratou ia ratou i to ratou aerenga, i te au aerenga taito; kia aere ua na te au mataara, te arataa kare i akāūia ra.

16 Kia akariroia to ratou enua ei mea tanea, e ei akavaavaa anga mutu kore: e va ua te tangata katoa me aere na te pae, e e takirikiri oki i tona upoko.

17 Mei te matangi ra e maoake, ka akapueu au ia ratou ki mua i te enemi; ko te tua taku e akakite atu kia ratou, kare te aro, i te rā e eke ei ratou ra.

18 Kua na ko iora ratou, Ka taki aere tatou, ka kimi i te ravenga ia Ieremia; kare oki te taunga e ngere i te ture, e te tangata pakari i te ako, e te peroveta i te tuatua; aere mai tatou, ka ta iaia i te arero, auraka tatou e akono ua atu i tana tuatua.

19 E akono mai iaku, e Iehova e, e akarongo mai i te reo o taku au enemi nei.

20 E tutakiia mai ainei te meitaki i te kino? kua ko ra ratou i te vaarua no toku vaerua. Akamanako mai koe i toku tu anga ki mua ia koe, ei tuatua i te meitaki no ratou, ei akaanga ke atu i toou riri ia ratou.

21 E teianei, e tuku atu koe i ta ratou au tamariki no te onge, e kia tukuia oki ratou ki te ririnui o te koke: kia akangereia ta ratou au vaine i te tamariki, e kia takaua ratou; kia tukuia to ratou au tangata ki te mate, e kia taia to ratou au tangata ou i te koke i te tamaki anga.

22 Kia akarongoia te aue i to ratou au are, kia tuku viviki mai koe i tetai urupu toa ki runga ia ratou: no te mea kua ko ratou i te vaarua kia rauka au, e kua tuku poiri ratou i te ereere kia ii taku vaevae.

23 Kua kite ua ana ra koe, e Iehova e, i ta ratou au tuatua katoa iaku nei, kia mate au; auraka koe e akakore i to ratou kino, e ta ratou ara i mua i to aroaro ra, auraka e tapara keia; kia tatipokiia ra ratou ki raro ki mua ia koe ra; i te tuatau e riri ei koe ra, e rave koe ia ratou.