Ezekiela

47 E MURI akera kua arataki akaou maira aia iaku ki te ngutupa o te are ra; e i na, e vai te taʼe maira na raro mai i te turuki o te are i te pae ki te itinga o te rā ra: te aro oki o taua are ra, tei te pae ïa ki te itinga o te rā, e te taʼe maira te vai na raro ake i te pae katau i taua are ra, i te pae ki apatonga i te atarau ra.

2 Kua arataki maira aia iaku na te ngutupa i te pae ki apatokerau, kua arataki atura iaku i te ara ki vao ra i te ngutupa ki vao i te ara e akara tika atu ki te pae ki te itinga o te rā ra; e i na, e vai te taʼe ra na te pae katau.

3 Kia riro atura te tangata, tei tona rima te ao, ki te pae ki te itinga o te rā ra, kua aite iora aia e okotai akera tausani i te kubiti; e kua arataki iora aia iaku na raro i taua vai ra; kua taea te puku vaevae e te vai.

4 E kua aite iora aia e okotai akera tausani, e kua arataki iora iaku na raro i taua vai ra; kua tonga turi te vai. Kua aite iora aia e okotai akera tausani, e kua arataki iora iaku na raro; kua tae akera ki te taukupu te vai.

5 Kua aite akaou iora aia, e okotai atura tausani, e kua riro atura ei kauvai kare atura e tika iaku kia aere: kua teitei oki taua vai ra, e vai e tika kia kau aere, e kauvai kare e taea kia aere.

6 E kua tuatua maira aia kiaku, E te tamaiti a te tangata na, kua akara ainei koe? Kua arataki maira aia iaku i reira, e kua akaoki atura iaku na te nia o taua kauvai ra.

7 Kia oki iora au, e i na, e manganui rava te rakau tei te nia o taua kauvai ra, tei teia pae e tei tera pae.

8 E kua tuatua maira aia kiaku, Te taʼe tika nei teianei vai ki te enua ki te pae ki te itinga o te rā ra, e tae atura ki raro ki te ngai atea, e riro atura ki roto i te tai, e kua tae atura ki roto ï te tai ra, e ora ïa taua tai ra.

9 E riro ïa e ko te au mea katoa e ora ra, tei keukeu ra, ki te au ngai katoa i taea e taua nga kauvai, e ora anake ïa: e riro te ika i te manganui rava atu, no te mea e tae teianei vai ki reira, e na te reira e akaora, e ora oki te au mea katoa i taea e taua kauvai ra.

10 E riro oki ïa te au ravakai i te tu aere ua ki runga i te reira mei Enigedi e tae rava atu ki Enigalaima; e riro ïa ei tauaki anga kupenga; e riro oki ta ratou ika i to ratou uaorai tu, mei te ika katoa o te tai maata ra, e maata ua atu.

11 Kareka te au ngai varivari no reira, e tona au ngai ruarua ra, kare ïa e ora; e vaioia ïa ei tai.

12 E i te pae kauvai ra ki runga i te nia o te reira, i teia pae e tera pae, e tupu ei te au rakau katoa ei manga, kare oki tona rau e mae, kare oki tona ua e pou: ei ua ou ta te reira e ua mai i tona au marama ra, no te mea i na te ngai-tapu mai to ratou vai i te taʼe anga mai: e riro oki to reira ua ei manga, e tona rau ei vairakau.

13 Te na ko maira te Atu ra ko Iehova; Teia te kotinga, kia noo kotou ki taua enua nei, i te au kopu raungauru ma rua i Iseraela nei: kia rua o Iosepha tuanga.

14 Ka noo katoatoa oki kotou i taua enua ra, i taku oki i taputou e oronga i te reira ki to kotou ai metua ra; ka riro oki taua enua nei ei tuanga no kotou.

15 Teia oki te kotinga o taua enua ra ki te pae ki apatokerau ra, mei te tai maata ra, e te ara ki Hetelona e aere atura ki Zedada;

16 Hamata, Berota, Siberaima, i rotopu mai i te kotinga i Damaseko e te kotinga Hamata; Hazara-katikona i te pae kotinga ra i Haurana.

17 E te kotinga mei te tai mai, ko Hazara-enana ïa, i te kotinga i Damaseko, e Zaphona ki te pae ki apatokerau, e te kotinga ra i Hamata. Ko te pae i apatokerau ïa.

18 E te pae i te itinga o te rā ra, na Haurana kotou i te aite, e na Damaseko, e na Gileada, e na te enua o Iseraela i te pae Ioridana, mei te kotinga mai e tae ua atu ki te pae ki te itinga o te rā ra. Ko te pae ïa i te itinga o te rā ra.

19 E te pae i apatonga ra, mei Tamara mai e tae rava atu ki te vai taumāro anga ra i Kadesa, e tae rava atu ki te kauvai i te tai maata ra. Ko te pae apatonga ïa i te pae ki apatonga.

20 E te pae ki te opunga o te rā ra, ko te tai maata ïa, mei te kotinga e tae rava atu ki te ngai e aere ki Hamata ra. Ko te pae teia ki te opunga o te rā ra.

21 E na kotou e tua i taua enua nei no kotou, kia tau i te au kopu o Iseraela nei.

22 E ka tua kelero kotou i te reira ei nooanga no kotou nei, e no te au tangata ke ke kotoa e kaiau aere i rotopu ia kotou, te ka anau tama i rotopu ia kotou: e riro oki ratou ia kotou mei te mea anau tikai i roto i te au tamariki a Iseraela; ei tuanga katoa to ratou i o kotou, i roto i te au kopu i Iseraela nei.

23 E riro oki, ei te kopu nooia e taua tangata ke ra, ei reira oki tana tuanga kia oronga kotou na, te tuatua maira te Atu ra ko Iehova.