Salamo

115 AURAKA kia matou nei, e Iehova, auraka kia matou nei; e tuku atura i te kakā ki toou uaorai ingoa no toou ra aroa, e taau ra tuatua-mou. 2 Eaa e tikaʼi kia tuatua mai te etene e, Teiea to ratou Atua i tenana? 3 Tei te rangi ra to matou Atua, i te rave anga i tana i anoano ra. 4 Ko to ratou ra au idolo ario e te auro, e angaanga ïa na te rima tangata nei. 5 E vaa to ratou, kare ra e tuatua; e mata to ratou, kare ra e akara; 6 E taringa to ratou, kare ra e akarongo; e putaiu to ratou, kare ra e ongi; 7 E rima to ratou, kare ra e rave; e vaevae to ratou, kare ra e aere; Kare rava oki to ratou karaponga e tika kia tuatua. 8 Ko te aronga i anga ia ratou, okotai o ratou tu ma ratou ra, e te aronga katoa i irinaki ia ratou. 9 E Iseraela e, e irinaki koe ia Iehova: koia to ratou tauturu e to ratou paruru. 10 E te ngutuare o Aarona e, e irinaki koe ia Iehova: koia to ratou tauturu e to ratou paruru. 11 Ko kotou tei mataku ia Iehova, e irinaki ia Iehova: koia to ratou tauturu e to ratou paruru. 12 Kua manako mai a Iehova ia tatou, ka akaora aia ia tatou; ka akaora aia i te ngutuare o Iseraela; ka akaora aia i te ngutuare o Aarona. 13 Ka akaora aia i te aronga i mataku ia Iehova, i te aronga rikiriki e te aronga mamaata katoa ra. 14 Ka akamaata ua mai a Iehova ia kotou; ko kotou, e ta kotou au tamariki, 15 Kua akameitakiia kotou e Iehova, i tei anga i te au rangi e te enua nei. 16 Te au rangi ra, na Iehova ïa au rangi; kareka te enua nei, kua oronga mai aia na te tamariki a te tangata nei. 17 Kare oki tei mate e akapaapaa mai ia Iehova; e te aronga katoa e riro ki raro ki te ngai muteki ra. 18 Ka akameitaki ra matou ia Iehova, i teianei, e e tuatau ua atu. Alelu Ia.