Maseli

5 E TAKU tamaiti, e akono mai i toku nei pakari, e ariu mai i to taringa ki toku nei kite;

2 Kia tāpu marie i toou ra akono, e kia vai marie oki te kite i toou ra vaa.

3 Te topata ua maira oki te meli na te vaa o te vaine akaturi; e maata ua atu te pateka o tona vaa i to te manongi ra:

4 E kavakava ra tona openga mei te au; mei te koke matarua ra te kokoi.

5 Te eke nei tona vaevae ki raro i te mate; te piri nei tona tapuae ki ade.

6 Ko te akamaara aea koe i te ara ora; te tu ke ra tona aerenga, kare e kitea e koe.

7 E tenana, e te au tamariki, e akarongo mai iaku, e auraka e akaruke i te tuatua a toku vaa.

8 Kia atea ke atu toou aerenga iaia; auraka e akavaitata atu ki te ngutupa o tona are:

9 Ko te riro atu aea toou ra inuinu kia etai ke ra, e toou ra au mataiti ki te takinga-kino ra:

10 Ko te nanave aea te tangata ke i taau ra apinga, e ko te riro aea taau ra angaanga ki te are o te tangata ke ra;

11 E tae akera ki te openga, kua mii ua iora koe, kia ngao koe, e kia ikoke roa to kopapa i te maki,

12 E kua na ko iora koe, Eaa ra au i makitakitaʼi i te apii? e taku ngakau i akavaavaaʼi i te ako?

13 E i kore ei i akarongo i te reo o tei apii mai iaku, e kare i ariu i taku taringa ki tei ako mai iaku ra?

14 Me rokoia oki au e te au kino katoa ra, i rotopu i te uipa anga e te akaputuputu anga ra.

15 E inu i te vai i taau uaorai āriki, e te vai taʼe ra no roto i taau uaorai puna.

16 Kia taʼe aere ua na vao taau vai pupui ua, e taau au vai peka, na roto i te au arataa.

17 E vaoo i te reira naau anake uaorai, auraka ei tangata ke ke e rave katoa.

18 Kia akameitakiia taau vai puna: e kia rekareka koe i te vaine o toou ou anga ra.

19 Kia riro aia mei te aili te inangaro! e mei te iale te manea! kia mataora ua rai koe i nga u nona; e kia mareka tamou koe i tona inangaro.

20 Eaa oki koe, e taku tamaiti, i taurekarekaʼi ki te akaturi, e i takavekave ei ki runga i te vaine ke?

21 Tei mua oki i te mata o Iehova to te tangata nei aerenga, e te akamaaraara ra aia i tona katoa ra au aerenga.

22 Te ii nei te rave ara i tana ra au ara, e kua mou aia i te taura o tona ra kino.

23 E mate aia koia kare i apiiia, e no te rai neneva ra, aere ke atura.