Ioane

20 E TAE akera ki te rā mua o te ebedoma ra, kua aere aturā Maria i Magadala ra i te akirata i te tanumanga, te vai mareureu ua ra, e kite akera kua uri keia te toka i te tanumanga ra.

2 Oro ua maira aia kia Simona Petero ra, e ki te pipi akaperepere a Iesu ra, kua tuatua maira kia raua, Kua apai keia e ratou te Atu i te tanumanga ra ki vao, e kare ua matou i kite i te ngai i vaioia aia e ratou ra.

3 Aere aturā Petero i reira ra ki vao, e taua pipi katoa ra, e aere tika raua i te tanumanga ra.

4 Kua ooro raua ravarai; e emo iorā Petero i taua pipi ra, ko tei tae atu na ïa ki te tanumanga ra.

5 E piko iora aia ki raro, akara atura i te kakau vaî i te vai ua anga; kare ra aia i tomo ki roto.

6 Kua aere mairā Simona Petero i muringao iaia ra, tomo atura ki roto i te tanumanga ra, akara iora i te kakau vaî i te vai ua anga,

7 E te kakau i te vaî i tona upoko ra, kare ïa i vaioia i te vairanga o te kakau vaî ra, i kokopiia e vaio keia ki te vairanga ke.

8 Kua tomo katoa atura tetai pipi, ko tei tae atu na ki te tanumanga ra, ki roto; kite atura aia, e akarongo atura.

9 Kare akerai ratou i kite i te tuatua i tataia ra e, kia tu akaou maira aia mei te mate maira e tikaʼi.

10 Oki akaou atura nga pipi i to ratou ra.

11 Karekā Maria, te tu ua ra ïa i te pae i vaitatao i te tanumanga ra, te aue ua ra; piko iora aia ki raro ma te aue, e akara atura ki roto i te tanumanga ra,

12 Kite atura aia i e toko rua puke angela ma te kakau teatea, i te noo anga ki te ngai i vaioia te kopapa o Iesu ra, i te upoko tetai, e i te vaevae tetai.

13 Kua tuatua maira raua kiaia, Eaa koe i aue ei, e maine? Kua karanga atura aia, No toku Atu i apai keia e ratou nei, e kare au i kite i te vaio angaia e ratou ra.

14 E kia akapera atura aia, e oti akera, kua anga atura aia ki muri, e kite atura aia ia Iesu i te tu ua anga, kare aia i kite e, ko Iesu.

15 Kua tuatua mairā Iesu kiaia, E maine, eaa koe i aue ei? koai taau e kimi na? Maara akera aia e ko te tangata tanu-kai ra, kua na ko atura, E tama, naau aia i apai ke ra, ka akakite mai koe i te vaio angaia e koe na, e naku aia e tiki e apai ke.

16 Kua tuatua mairā Iesu kiaia, E Maria. Kua ariu atura aia, karanga atura, E Raboni, ko tei tuatuaia ra e, E te Orometua.

17 Kua tuatua mairā Iesu kiaia, Auraka koe e akatukia mai iaku; kare rai au i tae ki runga i toku Metua ra: e aere ra koe ki toku au taeake ra, e karanga atu kia ratou e, Te aere nei au ki toku Metua ra, e ki to kotou Metua ra; ki toku Atua, e ki to kotou Atua ra.

18 Aere aturā Maria i Magadala ra, e kua akakite atura ki te au pipi ra e, kua kite aia i te Atu, e nana aia i tuatua mai i taua tuatua ra.

19 E i te aiai o taua rā mua o te ebedoma ra, kua putuputu maira te au pipi, kua topiriia nga pa i te mataku i te ngati Iuda ra, kua aere mairā Iesu i reira ra, tu ua iora i rotopu, kua tuatua maira kia ratou, Kia ora na kotou.

20 I akapera mai aia e kua akakite maira kia ratou i ona rima e tona kaokao. Mareka rava akera te au pipi i te kite anga i to ratou Atu ra.

21 Kua tuatua akaou mairā Iesu kia ratou, Kia ora na kotou: mei te Metua oki i tono mai iaku nei, e tono katoa oki au ia kotou.

22 I akapera aia, e kua akapuangi maira i te aʼo ki runga ia ratou, e kua tuatua maira, Ka āriki mai na i te Vaerua Tapu.

23 Na kotou e akakore i ta ratou ara ra, kua akakoreia ïa; na kotou oki e vaio i ta ratou ara ra, kua vaioia ïa.

24 E tetai no te ngauru ma rua ra, ko Toma, ko te karangaia ia Didimo ra, kare aia i reira ka tae mai ei a Iesu ra.

25 Kua karanga atura te au pipi ra kiaia, Kua kite akenei matou i te Atu. Kua tuatua maira aia kia ratou, Kia kore au e kite i te tu auri i ona rima ra, e kia kore au e tuku i toku maikao-rima i taua tu auri ra, e kia kore oki au e tuku i toku rima ki roto i tona kaokao ra, kare au e akarongo.

26 E po varu akera, tei roto akaou akera te au pipi i te are, e ko Toma katoa oki: kua aere mairā Iesu, kua topiriia na nga pa, kua tu ua maira ki rotopu, kua tuatua maira, Kia ora na kotou.

27 Kua tuatua maira aia kia Toma i reira, Ka akatika mai ana i toou maikao-rima, e ka akara mai ana i oku rima; e ka akatika mai ana i toou rima, ka tuku ei ki roto i toku kaokao: auraka e akarongo ngata, ka akarongo ra.

28 Kua karanga aturā Toma kiaia, na ko atura, E taku Atu, e taku Atua.

29 Kua tuatua mairā Iesu, No te mea te akara mai nei koe iaku nei, e Toma, i akarongo ei koe: e ao to te aronga kare i akara iaku, ka akarongo mai ei.

30 E manganui atu rai te akairo ta Iesu i rave i mua i te aroaro o te au pipi ra, kare i tataia ki teianei buka.

31 Ko teia ra tei tataia, kia akarongo kotou e, ko Iesu te Mesia, te Tamaiti a te Atua; e kia rauka oki to kotou ora i tona ingoa i te akarongo anga.