Ieremia

30 TE TUATUA no ko ia Iehova ra i tae mai kia Ieremia ra, na ko maira,

2 Te na ko mairā Iehova, te Atua no Iseraela, na ko maira, Ka tata koe i te au tuatua katoa taku i karanga atu kia koe ra ki roto i te buka.

3 I na oki, e tae maira te au rā, te tuatua mairā Iehova, e ruri ke ei au i te tuikaa anga o toku ra iti-tangata, ia Iseraela, e ia Iuda, te tuatua mairā Iehova; e akaoki mai au ia ratou ki te enua i orongaia e au ki to ratou au metua ra, e na ratou e noo i reira.

4 Teia oki te au tuatua ta Iehova i tuatua ia Iseraela, e ia Iuda.

5 Te na ko maira oki a Iehova; E reo rurutakina tei akarongoia e tatou, e mataku, e kare e au.

6 Ka ui ana i tenana, ka akara, e anau mai ainei oki te tane? Eaa ra oki au i kite ei i te tangata katoa, ma te rima i runga i te taukupu, mei tei te mamae anau ra, e te au mata katoa i te purautea anga.

7 Aue! e rā maata taua rā ra, kare rava e aite: ko te tuatau manamanata ïa no Iakoba; e ora ra aia i te reira ra.

8 E riro ïa, kia tae ki taua rā ra, te tuatua mairā Iehova Sabaota ra, e aati au i tona zugo i runga i to kaki na, e to au tapeka e atiati keia e au, e kare oki te au tangata ke e taao akaou mai iaia.

9 E tavini oki ratou ki to ratou Atua ra kia Iehova, e ki to ratou ariki ia Davida, taku e akatu ki runga no ratou ra.

10 E tenana, auraka koe e mataku, e toku tavini, e Iakoba e, te tuatua mairā Iehova: auraka oki koe e mataku, e Iseraela e; i na oki, naku koe e akaora i te ngai mamao ra, e to uanga, mei te enua mai i tuikaaʼi ratou ra; e oki mai a Iakoba, e e akaanga i te roi e e noo marie, e kare e tangata e akamataku mai.

11 No te mea tei ia koe au nei, te tuatua mairā Iehova, ei akaora ia koe: akaope roaʼi au i te au enua katoa tei akapueurikiriki keia atu koe e au ra, kare au e rave akaope ia koe: e ako atura au ia koe ma te tuatua-tau, kare ra e tuku uaia koe ma te ako kore.

12 Te na ko mairā Iehova, E paruparu ora kore toou, e puta maata toou.

13 Kare ua e akatikatika i taau tuatua ei akaora ia koe; kare e vairakau e oraʼi koe na.

14 Kua akangaropoinaia koe e te aronga katoa i inangaro ia koe ra; kare ratou i kimi ia koe; kua ta oki au ia koe ki te ta o te enemi, te pāpā o te taae, no te maata o toou ra kino; e taau ra au ara kua akamaataia.

15 Eaa ko i aue ei i toou ra paruparu? kare toou maki e ora; no te rai o toou ra kino; e kua akamaataia taau ra au ara, i rave ei au i taua au mea ra ia koe.

16 E teianei ko te aronga katoa ra i pou ei koe ra, e pou katoa ïa; e ope roa oki to au enemi katoa i te akatuikaaia; e te aronga i noniiaʼi taau ra, e riro katoa ta ratou ei apinga noni, e ko tei āru ia koe ra, ko te ka orongaia ïa e au kia āruia.

17 E akaoki mai oki au i te ora noou, e naku e akaora i toou au puta, te tuatua mairā Iehova; no te mea kua tapaia koe e ratou, E mea akarukeia, ko Ziona teia tei kore i akonoia e tetai.

18 Te na ko mairā Iehova; I na, e ruri ke au i te tuikaa anga o te au puakapa o Iakoba ra, e tona ra au nooanga te ka aroaia e au; e patuia oki te oire ki runga i tona uaorai tuaivi, e tangataia te are ariki, ko te tu takere rai te tu.

19 E no roto ia ratou te akameitaki i te puroro anga mai, e te reo no te aronga akarekareka ra: e naku oki ratou e akamaata, kare ïa ratou e iti; e naku ratou e akangateitei atu, e kare ïa ratou e varavara.

20 E riro ta ratou au tamariki ra mei tei muatangana ra, e akatinamouia to ratou uipa anga ki mua iaku nei, e te aronga i takinga-kino mai ia ratou, naku ïa e tutaki.

21 E to ratou Akangateitei Okotai ra, no roto ïa ia ratou uaorai, e to ratou Tutara, no roto rai ïa ia ratou uaorai te tupu anga; e naku aia e akatae mai, e e akavaitata mai aia kiaku nei: koai oki teia tei akatae mai i tona ngakau kia akavaitata mai iaku nei? te tuatua mairā Iehova.

22 E ei tangata kotou noku, e ei Atua au no kotou.

23 I na, te puaioio a Iehova te riro atura ma te viviki, e puaioio pou maata ua atu: ei runga i te mimiti o te aronga kino e topa viviki ei.

24 Kare te riri maata o Iehova e oki mai, e kia rave aia, e kia akatupu aia, i tei akakoroia e tona ngakau: kia tae ki te au rā openga ra e kite tikai kotou i te reira.