Luka

20 E TAE akera ki tetai rā, te apii ra aia i te tangata, e te tuatua ra i te evangelia, i roto i te iero, tei runga ua maira iaia te kau taunga nunui ra, e te au tata tuatua, e te aronga pakari,

2 Kua tuatua maira kiaia, na ko maira, Ka akakite mai kia matou i te tumu i rave ei koe i teianei au mea: e naai i tuku mai i teianei mana kia koe?

3 Kua karanga atura kia ratou, na ko atura, E ui katoa anga taku ia kotou; e akakite mai kotou kiaku:

4 I te bapetizo a Ioane nei, no te rangi mai aina? e na te tangata aina?

5 Kua eumiumi iora ratou ratou uaorai, na ko akera, Kia tuatua tatou, No te rangi mai; e riro aia i te tuatua mai e, Eaa iora kotou i kore ei i akorongo atu iaia?

6 E kia tuatua oki tatou, Na te tangata; ka peîia tatou ki te toka e te tangata tini, te manako tikai ra ratou e, e perovetā Ioane.

7 Kua tuatua maira ratou, Kare matou i kite e noea.

8 Kua karanga aturā Iesu kia ratou, Kare katoa au e akakite atu kia kotou i te tumu i rave ei au i taua au mea nei.

9 Kua akakite atura aia ki te tangata i teianei parabole, Kua tanu iora tetai tangata i te kainga vine, tuku atura ki te aronga unga, e aere atura ki te enua mamao, e roa atura i reira.

10 E tae akera ki te tuatau tikai ra, kua tono maira aia i tetai tavini ki taua aronga unga ra, kia o mai ratou i te kai o taua kainga vine ra: kua pāpā iora taua aronga unga ra iaia, e akaoki atura ma te puapinga kore.

11 Kua tono akaou maira oki aia i tetai tavini ke: kua pāpā katoa iora oki ratou iaia, rave kino atura, e akaoki atura ma te puapinga kore rai.

12 Kua tono maira aia i te toko toru; paruparu iora oki aia i te rave kinoia e ratou, e tuaru atura ki vao.

13 Kua tuatua iora te pu o taua kainga vine ra, Akapeea ra au? Ka tono paa au i taku tamaiti akaperepere: peneiake ko te oo mai ratou iaia kia akara mai.

14 Kia akara maira taua aronga unga ra iaia, kua tuatua iora ratou ratou uaorai, na ko akera, Ko te tangata kainga teia; e aere mai, ka ta tatou iaia, kia riro mai te kainga ia tatou uaorai.

15 Kika maira ratou iaia ki vao i taua kainga vine ra, e tamate rava iora. Ka akapeea maira te pu o taua kainga vine ra ia ratou?

16 Ka riro aia i te aere mai e tamate rava i taua aronga unga ra, ka apai atu ei i te kainga vine na etai ke. E tei te akarongo anga ratou ra, kua na ko akera, Auraka rava ïa.

17 Kua akara atura aia ia ratou, na ko akera, Eaa oki teianei tuatua i tataia ra e, “Te toka i akarukeia e te aronga patu are ra, ko tei akariroia ei toka tiavā?”

18 Ko te inga ki rungao i taua toka ra, e paruparu ïa; kareka te topaia e taua toka ra, e ungaungātiti rava ïa.

19 Kua timata atura te kau taunga nunui, e te au tata tuatua, i te opu iaia i taua ora ra; kua kite oki ratou e, no ratou taua parabole tana i tuatua ra; i mataku ra ratou i te tangata.

20 Kua akara matariki atura ratou iaia, e akaue atura i te tangata ei akara, kia tapikipiki mai ratou e, e aronga tuatua-tika ratou, kia rauka ia ratou tetai manga tuatua ana, kia tuku ratou iaia ki te rima e te mana o te tutara

21 Kua ui atura ratou kiaia, na ko atura, E te Orometua, kua kite matou e, e tuatua-tika taau, kua tika taau e apii nei, e kare koe i akono i to te tangata nei tu, te apii nei ra koe i te tuatua a te Atua ra ma te tuatua-mou.

22 E tika ainei i te ture kia apai matou i te taūnga na Kaisara, e auraka ainei?

23 Te kite ra aia i ta ratou pikikaa, e kua tuatua maira kia ratou, Eaa kotou e timata mai ei iaku?

24 Ka akakite mai na i tetai denari. Noai te tu e te tuatua i rungao? Kua tuatua maira ratou, No Kaisara.

25 Kua karanga atura aia kia ratou, E apai mari i ta Kaisara kia Kaisara; e ta te Atua ra, e apai ïa ki te Atua.

26 E kare rava akera tetai tuatua tana i tuatua ki mua i te aroaro o te tangata ra i rauka ia ratou: va ua iora ratou i tana i tuatua maira, e muteki atura.

27 Kua aere maira i reira tetai pae o te au Sadukea ra, ko tei tuatua e, kare e tuakaouanga; e kua ui maira ratou kiaia, Na ko maira,

28 E te Orometua e, i tata mai a Mose kia matou nei, “Kia mate te tuakana o tetai tangata, te ora ra te vaine, e kare e tamariki, e akaipoipo te teina i taua vaine ra, e akaanau i te tamariki na te tuakana.”

29 Toko itu puke tamaroa i te kopu-tangata okotai; akaipoipo iora te tama mua i te vaine, e mate atura, kare e tamariki.

30 Kua akaipoipo iora te toko rua i taua vaine ra, e mate katoa atura, kare e tamariki.

31 Kua akaipoipo iora oki te toko toru iaia ra; okotai rai o ratou tu toko itu katoa: i mate anake ratou ma te tamariki kore rai.

32 E i te openga iora, mate katoa atura te vaine.

33 E teianei, kia tae ki te tuakaouanga ra, e riro aia ei vaine naai i taua aronga ra? e vaine oki aia na te toko itu ravarai.

34 Kua karanga aturā Iesu kia ratou, na ko atura, Te akaipoipo nei te tamariki o teianei ao, e te orongaia nei kia akaipoipoia:

35 Kareka te aronga i manakoia e, e tau ia ratou tetai ao ra, e te tuakaouanga mei te mate mai, kare ïa ratou e akaipoipo, kare oki e oronga kia akaipoipoia:

36 Kare oki ratou e mate akaou, e tau oki ratou ki te au angela ra; e tamariki ratou na te Atua ra, e tamariki oki ratou no te tuakaouanga ra.

37 Kareka te tuakaouanga o te aronga i mate, kua akakite mai oki a Mose, iaia i karanga atu i te Atu i te pu ngangaere ra, i “te Atua no Aberahama, e te Atua no Isaaka, e te Atua no Iakoba.”

38 Kare oki aia i te Atua no tei mate, no tei ora ra; te ora katoatoa ra iaia.

39 Kua tuatua maira e tokotai puke tata tuatua, na ko maira, E te Orometua e, e tuatua tika tikai taau.

40 E muri akera, kare rava atura ratou i ui akaou mai kiaia i te mataku.

41 Kua karanga atura aia kia ratou, Eaa te mea i tuatuaiaʼi e, ei tamaiti na Davida te Mesia?

42 Ko Davida uaorai oki tei na ko mai i roto i te buka Salamo ra e, “Kua karanga aturā Iehova ki taku Atu, Ka noo koe ki taku rima katau nei,

43 E kia akariro au i to au enemi ei pange vaevae noou.”

44 E teianei, te tuatua rā Davida kiaia e, e Atu, eaa iora oki aia i riro ei ei tamaiti nana?

45 Kua karanga atura aia ki tana au pipi, te tangata katoatoa i te akarongo anga mai,

46 Kia matakite i te au tata tuatua, ko te anoano i te aaere ma te kakau roroa, e kia aroaia i te au okoanga ra, e te au nooanga teitei i te au sunago ra, e te ngai teitei i te au kaingakai ra;

47 Te pou nei oki ia ratou te ngutuare o te au vaine takaua ra, e te akaroa nei te pure ei pikikaa anga: e mate maata rava oki to ratoa.