1 Korinetia

2 IAKU oki i aere atu ia kotou na, e te au taeake, kare au i aere atu ma te tuatua akamanea e te pakari, i te tuatua anga atu kia kotou i te tuatua-akakite a te Atua.

2 Kua akakoro marie oki au e, kare rava aku e tuatua e akakite atu ki o kotou na, mari ra ko Iesu Mesia, ko tei akasatauroia ra.

3 E paruparu oki toku, e te mataku, e te rutetetete maata, ki o kotou na.

4 Kare oki taku tuatua e taku ako anga i te tuatua tarekareka no te pakari o te tangata nei, i te akakite pu tikai ra a te Vaerua e te mana;

5 Kia kore to kotou akarongo e akatumuia i te pakari o te tangata nei, i te mana ra o te Atua.

6 E tuatua pakari ra ta matou i te aronga karape: kare ra te tuatua pakari o teianei ao, e no te aronga tutara o teianei ao, te ka tukuia ki raro ra:

7 Te tuatua nei ra matou i te tuatua pakari a te Atua i te tuatua ngaro ra, ko tei uunaia ra, i akono takereia ra e te Atua ou teianei ao, kia meitaki tatou:

8 Ko tei kore rava i kitea e te aronga tutara o teianei ao: (naringa oki ratou i kite ra, kare ratou e akasatauro i te Atu o te kakā.)

9 Ko tei tataia ra e, “Ko te au mea kare i akaraia e te mata ra, kare i akarongoia e te taringa, kare oki i o ki roto i te ngakau o te tangata ra, ko ta te Atua ïa i vaio no te aronga i inangaro iaia ra.”

10 Kua akakite maira te Atua ia tatou i taua au mea ra i tona Vaerua: e kimi oki te Vaerua i te au mea katoa nei, e te au mea oonu rai o te Atua ra.

11 Koai oki te kite i te au mea a te tangata nei, mari ra ko te vaerua tangata i roto iaia ra? koia katoa te au mea a te Atua, kare rava tetai i kite, mari ra ko te Vaerua o te Atua.

12 E teianei te Vaerua i rauka ia tatou nei, kare ïa to teianei ao, ko te Vaerua ra no ko mai i te Atua ra: kia kite tatou i te au mea i oronga uaia mai e te Atua no tatou nei.

13 Ko te au mea ïa ta matou e tuatua nei, kare ra ma te tuatua apiiia mai e te pakari tangata nei, ko ta te Vaerua Tapu ra i apii mai; i te akaarite anga i ta te vaerua i ta te Vaerua ra.

14 Kare ra te tangata e akono i ta te kopapa nei e āriki mai i ta te Vaerua e te Atua ra: e mea neneva ïa iaia: kare oki aia e kite i te reira, no te mea, i kimiia te reira e te vaerua.

15 Kareka ko tei akono i ta te Vaerua ra, te kite ra aia i te au mea katoa, kare ra aia uaorai i kiteia e te tangata ravarai nei.

16 “Koai oki tei kite i te ngakau o te Atu ra? e naai e apii atu iaia?” Tei ia matou ra te ngakau o te Mesia.