Koheleta

5 E MATAKITE i to vaevae kia aere ki te are o te Atua ra; e kia rapurapu koe i te akarongo ra, auraka kia rapurapu i te apai i te atinga a te neneva ra; kare oki ratou i maara e, te rave ra ratou i te kino.

2 Auraka to vaa kia viviki, auraka kia rapurapu ua to ngakau i te tuatua ki mua i te aroaro o te Atua: tei te rangi oki te Atua, tei te enua nei oki koe: kia mea ngiti oki taau tuatua kia tuatua.

3 Mei te moemoea no te rai o te angaanga e tupu ei; i kiteaʼi oki te reo o te neneva ra i tana tuatua maata.

4 Kia tia koe i te tia ki te Atua ra, e akamaroiroi i te akatae; kare oki aia e mareka i te neneva ra; e tenana e apai i taau i tia ra.

5 E ngari ake kia kore koe e tia, ko te tia aea koe e kare e akatae.

6 Auraka to kopapa kia ara i to vaa; e auraka koe e karanga ki te karere a te Atua ra, Kua ē teia. Eaa te mea kia akariri atu oki i te Atua ki toou ra reo, e kia akakore aia i te angaanga a to rima ra?

7 Mei te moe putuputu ra oki, e mea puapinga kore ïa, koia katoa te tuatua nei kia akamaataia ra; e tenana, ko te Atua taau e mataku.

8 Kia akara koe i te ao i te takinga-kino angaia ra, e te ruri ke anga i te tuatua-tau e te tuatua-tika i te enua nei, auraka koe e poitirere roa i taua mea ra; ko tei teitei ra oki tei akara i taua tangata teitei ra; e ko tei tu ke rava i te teitei ra tei akara ia raua katoa.

9 Ko tei tupu ki runga i te enua ra, na te tangata katoa ïa: ko te ariki oki no roto rai i te kainga ra tana kai.

10 Ko tei inangaro i te ario ra, kare ïa e mareka i te ario; e tei inangaro i te apinga nui ra, kare ia e mareka i te apinga e kia maata ra. E mea puapinga kore katoa te reira ra.

11 Te maata ra te apinga, te maata katoa ra te aronga i kai: e eaa ta te aronga apinga ra puapinga, mari ra ko te mata te akara ua atu?

12 E meitaki te moe o te tangata rave angaanga ra, iti oti, e rai oti, tana kai: no te ki kopu ra o te tangata apinga nui ra i ngere ei aia i te moe.

13 E kino maata tei kitea iaku i raro ake i teianei rā, i te apinga nui i vaooia ei kino no te pu ra.

14 Te pou nei oki taua apinga ra i te angaanga kino: e e tamaiti tana e anau ra, e kare rava ana puapinga e vaoo i tona rima.

15 Mei iaia oki i anau taaka ua mai mei roto i te kopu mai o tona metua vaine ra; e pera aia kia oki ra, mei iaia oki i aere maira; kare oki ana puapinga i tana angaanga i rave ra, e tikaʼi iaia kia taoi katoa atu i tona rima.

16 Teia katoa oki tetai kino mamae, koia e oki ua ra mei iaia katoa i aere maira: eaa oki tana i rauka, tei angaanga no te matangi ra?

17 E kia akaope ua aia i nga rā nona i te kaikai ma te poiri, e ma te aue maata oki, ma te mamae, e ma te manamanata.

18 I na taku i kite nei: e mea meitaki, e te tau oki i te tangata nei, kia kaikai, e kia inu, e kia rave aia i te meitaki i te au angaanga katoa tana i rave i raro ake i te rā nei, e kia ope rava ake ona puke rā i o maiia mai e te Atua nona ra: ko tana oki teia tuanga;

19 Ko te tangata katoa ta te Atua i oronga mai i te apinga nui e te meitaki ra, kua oronga katoa mai ïa i te kai i taua mea ra; e rave aia i tana tuanga, ka rekarekaʼi i tana ra angaanga: e mea o maiia mai ïa e te Atua.

20 Kare aia e maata rava i te maara i tona ra puke rā i te ora anga nei, kia oronga mai te Atua i te rekareka ki roto i tona ngakau.