Ioane

19 RAVE akerā Pilato ia Iesu i reira, e kua pāpā atura iaia.

2 Kua akaei atura te au vaeau iaia i te rakau taratara, ta ratou i atu ra, e kua akakakau atura oki iaia i te kakau muramura,

3 E kua karanga atura, Kia ora na, e te ariki o te ngati Iuda! e kua moto atura oki i tona mata.

4 Kua aere akaou maira oki a Pilato ki vao, kua tuatua maira kia ratou, I na, i arataki mai nei au iaia kia kotou nei, kia kite kotou e, kare ua ona e kino i kitea e au.

5 Kua aere maira oki a Iesu ki vao, ma te ei rakau taratara i te ei anga, e te kakau muramura i te kakau anga. E kua tuatua mairā Pilato kia ratou, Ka akara mai ana i taua tangata nei!

6 E kia akara atura te kau taunga nunui ma te aronga taoonga ra iaia, kua kapiki atura ratou, na ko atura, Ka akasatauro atu, ka akasatauro atu. Kua tuatua mairā Pilato kia ratou, Na kotou uaorai e rave, e akasatauro atu iaia: kareka au, kare oki au i kite i tona kino.

7 Kua karanga atura te ngati Iuda kiaia, E ture ta matou, e ka mate tika aia i taua ture ra, koia i karanga e, e Tamaiti aia na te Atua.

8 E kite akerā Pilato i taua tuatua ra, maata ua atura tona mataku.

9 Oki akaou atura aia ki roto i te are akavaanga, kua karanga atura kia Iesu, Noea a koe na? Kare rā Iesu i tuatua mai kiaia.

10 Kua karanga aturā Pilato kiaia, Kare koe e tuatua mai kiaku? kare koe i kite e, tei iaku te akasatauro ia koe, e tei iaku oki te tuku ia koe?

11 Kua tuatua mairā Iesu, Kare rava oou e mana kia rave mai iaku, naringa kare i orongaia mai toou mana no runga maira: e teianei, ko tei tuku atu iaku ia koe na, ko tana te ara maata.

12 Kua kimi tamou ua mairā Pilato kia tukuia aia; kua kapiki atura ra te ngati Iuda, na ko atura, Kia tuku koe i tenana tangata, kare koe i to Kaisara: ko tei tuatua e koia uaorai te ariki ra, kua patoi atu ia Kaisara.

13 E kite akerā Pilato i taua tuatua ra, kua arataki maira aia ia Iesu ki vao, e noo iora ki runga i te nooanga akava, i te ngai e karangaia ra e e Ngai-Patuia, e Gabata i te tuatua Ebera ra.

14 Ko te rā akamanea anga ïa o te pasa ra, tei te ono paa o te ora ra: kua karanga atura aia ki te ngati Iuda ra, Ka akara mai ana i to kotou ariki.

15 Kua kapiki maira oki ratou, Ka akaruke atu, ka akaruke atu, ka akasatauro atu iaia. Kua karanga aturā Pilato kia ratou, Ka akasatauro atu ainei au i to kotou ariki? Kua tuatua maira te kau taunga nunui, Kare o matou ariki, mari ra ko Kaisara anake ra.

16 Kua tuku atura aia iaia kia ratou ra kia akasatauroia. Kua rave akera ratou ia Iesu, arataki atura.

17 Aere atura aia, ma tana satauro i te apai anga, ki te ngai e karangaia ra e, e Vairanga katu tangata, i te tuatua Ebera ra, ko Golagota ïa:

18 I reira to ratou akasatauro anga iaia, e ko e toko rua puke tangata ke ra, okotai i tetai pae, tetai oki i tetai pae, i rotopu a Iesu.

19 Kua tataia iora e Pilato tetai akakiteanga, kua tuku atura ki runga i te satauro. Teia taua tuatua ra, KO IESU I NAZARETA TE ARIKI O TE NGATI IUDA RA.

20 Kua tatau iora te ngati Iuda e manganui i taua akakiteanga ra; ko te ngai i akasatauroiaʼi a Iesu ra, tei vaitata ïa i taua oire ra: i tataia taua akakiteanga ra i te tuatua Ebera, te Eleni, e te Roma.

21 Kua karanga atura te kau taunga nunui o te ngati Iuda ra kia Pilato, Eiaa e tataia e, Ko te ariki o te ngati Iuda; e na ko ra e, Kua karanga aia e, Ko au te ariki o te ngati Iuda.

22 Kua tuatua mairā Pilato, Ko tei tataia e au ra, kua tataia rai.

23 E kia akasatauroiā Iesu e te au vaeau ra, kua rave iora i ona kakau ra, kua tua iora e a tuanga, okotai vaeau okotai tuanga; e te pereue katoa ra: kare e tui anga to taua pereue ra, i raranga tapini ravaia.

24 Kua tuatua iora ratou ratou uaorai, Auraka tatou e aeae, ka tua kelero ra, kia kitea te atu: tupu atura te tuatua i tataia ra i reira, ko tei na ko ra e, “Kua tua iora ratou i toku au kakau no ratou, e kua akatopa kelero oki ratou i toku pereue.” I akapera atura te au vaeau ra.

25 E te tu ua ra oki tona metua vaine, e tona taeake, ko Maria te vaine a Keleopa ra, e ko Maria i Magadala ra, i vaitata uaorai i te satauro o Iesu ra.

26 E kia akara iorā Iesu i tona metua vaine, e te pipi akaperepere nana ra, i te tu ua anga i reira ra, kua karanga iora aia i tona metua vaine, E maine, ka akara na i to tamaiti!

27 Kua tuatua iora aia ki taua pipi ra, Ka akara na i to metua vaine. E i reira ra aia te arataki angaia atu e taua pipi ra i tona uaorai ngutuare.

28 E muri akera, kua kite oki a Iesu e, kua ope te au mea katoatoa i te tupu, kua na ko akera, Kua kaki vai au; kia tupu te tuatua i tataia ra.

29 E te vai ra tetai āriki vinega i reira kua ki, kua akaki iora ratou i tetai rimu, koia iora i te rara isopa, topiriia atura ki tona vaa.

30 E kia inu akerā Iesu i taua vinega ra, kua tuatua maira, Kua oti: kua takupe iora tona upoko ki raro, tuku atura i tona vaerua.

31 Kua karanga atura te ngati Iuda kia Pilato, kia aatiia to ratou vaevae, e kia apai keia to ratou kopapa, kia kore e vaioia ki runga i te satauro i te sabati ra, no te mea e rā akamanea anga, e sabati maata oki taua sabati ra.

32 Kua aere maira te au vaeau, kua aati iora i te vaevae o tetai, e to tetai oki, ko tei akasatauro katoaia ra.

33 Kia tae ra ratou kia Iesu ra, kite akera e kua mate aia, kare akera ratou i aati i tona vaevae.

34 Ko atura tetai vaeau i tona kaokao i te korare, taʼe ua maira te toto e te vai.

35 Kua kite tikai te mata o te tangata e tuatua i teianei au tuatua, e tuatua-mou oki tana i tuatua ra, kia akarongo kotou; kua kite oki aia e tuatua-mou tana e tuatua nei.

36 I tupu ei oki teianei au peu, kia tika te tuatua i tataia ra e, “Auraka roa tetai ivi ona kia aatiia.”

37 E te na ko maira oki tetai manga tuatua i tataia ra e, “E akara ratou i ta ratou i ko ra.”

38 E muri akera i taua au tuatua nei, kua karanga aturā Iosepha no Arimatea ra kia Pilato, e rave aia i te kopapa o Iesu e apai ke atu, e pipi oki aia na Iesu, i mou poiri ua ra i te mataku i te ngati Iuda ra: e tika akera ia Pilato. Aere utura aia, apai ke atura i te kopapa o Iesu.

39 E ko Nikodemo oki, ko tei aere mai kia Iesu i te po i muatangana, i aere mai aia ma te vairakau irokia, te manongi, e te aloe, e okotai paa anere te pauna.

40 Kua rave atura ratou i te kopapa o Iesu, vaî atura i te kakau orongā, ma te apinga kakara katoa ra, ko ta te ngati Iuda ïa ravenga kia tanu ra.

41 E koro tei taua ngai i akasatauroiaʼi aia ra; e tei roto i taua koro ra tetai tanumanga ou, kare ua ra e tangata i vaioia ki roto.

42 Kua tuku atura ratou ia Iesu i reira, no te mea e rā akamanea anga no te ngati Iuda ra; tei vaitata ua ra taua tanumanga ra.