Genese

17 E TAE akera ki te iva ngauru ma iva o to Aberama mataiti, kua mama mairā, Iehova kia Aberama, na ko maira kiaia, Ko au te Atua Mana katoatoa ra; e na mua koe i toku aroaro i te aere, e kia apa koe taau. 2 E e papau au i taku koreromotu kia koe, e e akamaata roa atu au ia koe.

3 E kua tipapa iorā Aberama ki raro te mata; e kua tuatua mairai te Atua kiaia, na ko maira,

4 Ko au teia, i na, tei ia koe taku nei koreromotu, e ka riro koe ei metua no te pa enua e manganui.

5 Kare rava oki e tuatua akaouia ko Aberama toou ingoa; kua akariro oki au ia koe ei metua no te pa enua e manganui.

6 E akamaata roa au ia koe, e akariro au ia koe ei pa enua katoa, e ei ui ariki te ka anau ia koe.

7 E akatinamou au i taku nei koreromotu kia koe, e toou ra uanga a muri ake, e ope roa atu to ratou au uki, ei koreromotu mutu kore; e ei Atua au noou, e no toou ra uanga a muri ake.

8 E te enua taau e noo tangata ke ua ana, ko te enua katoatoa ra ko Kanaana, taku ïa e o atu ei nooanga noou, e no toou ra uanga i muri ake, e tuatau ua atu; e ei Atua au no ratou.

9 E kua tuatua maira te Atua kia Aberahama, E akono tikai koe i taku nei koreromotu, ko koe, e toou uanga a muri atu, e ope roa ake to ratou au uki.

10 Teia oki taku nei koreromotu, ko au e ko kotou, e toou uanga a muri atu, ta kotou e akono; Ko ta kotou au tamaroa katoa ra, ka peritomeia ïa.

11 Ko te kiri i mua ra ta kotou e peritome i to kotou na kopapa; ei akairo no te koreromotu ia tatou nei.

12 Te au tamariki tamaroa katoa i o kotou na, ka peritomeia ïa kia tae ki te po varu ra, e ope ua atu to kotou au uki ra; ko tei anau i roto i te are, e tei okoia ki te moni, te tangata ke katoa ra, kare i e uanga noou ra.

13 Ko tei anau i toou uaorai are, e tei okoia ki te moni naau ra, kia peritomeia ïa e tikai: kia vai rai taku koreromotu ki runga i to kotou kopapa, ei koreromotu mutu kore.

14 E te tane peritome koreia ra, ko tei koe i peritomeia te kiri i mua i tona ra kopapa, ka tipu keia taua tangata ra i tona iti-tangata ra; kua atikau aia i taku koreromotu nei i reira.

15 E kua tuatua mairai te Atua kia Aberahama, Kareka ko taau vaine ra ko Sarai, auraka koe e kapiki i tona ingoa ia Sarai, ko Sara ra tona ingoa. 16 E ka akameitaki au iaia, e ka oronga au i tetai tamaiti iaia naau, e akameitaki rai oki au iaia, e akariro oki au iaia ei pa enua; ei ui ariki te ka anau iaia no te pa enua.

17 Kua tipapa iorā Aberahama i raro te mata, kua kata iora, na ko akera i roto i tona ngakau, E anau ainei ta tei anere tona mataiti tamaiti; e ka anau ainei a Sara, ko tei tae ki te iva o te ngauru anga o tona mataiti?

18 Kua karanga aturā Aberahama ki te Atua, Kia ora oki a Isemaela i mua i to aroaro na e!

19 Kua tuatua maira te Atua, E tamaiti tikai ta taau vaine ta Sara e anau naau; e naau e tapa i tona ingoa, ko Isaaka; e ka akatinamou au i taku koreromotu iaia, no tona uanga a muri atu, ei koreromotu mutu kore.

20 Ia Isemaela ra, kua akarongo au ia koe; i na, kua akameitaki au iaia, e e uua aia, e ka maata roa aia iaku; ei ui ariki tana e anau tino ngauru e rua ara, e akariro au iaia ei enua maata.

21 E akatinamou ra au i taku koreromotu ia Isaaka, ta Sara e anau naau, kia tae ki teianei tuatau i te mataiti i mua nei.

22 Akaoti akera aia i tana tuatua kiaia, aere atura te Atua ki runga, akaruke maira ia Aberahama.

23 Kua rave iorā Aberahama i tana tamaiti ia Isemaela, e tei anau katoa i tona ngutuare, e tei oko katoaia ki tana moni, te au tavini tane katoa i to Aberahama ngutuare; e peritome iora i te kiri i mua i to ratou ra kopapa, i taua rā tikai ra, ta te Atua i tuatua kiaia ra.

24 E iva akera ngauru anga o Aberahama mataiti e iva ara, i peritomeiaʼi te kiri i mua i tona kopapa:

25 E tana tamaiti oki ko Isemaela, okotai akera ona ngauru, e toru ara te mataiti, i peritomeiaʼi te kiri i mua i tona ra kopapa.

26 Okotai o raua rā i peritomeiaʼi a Aberahama, e tana tamaiti ra ko Isemaela:

27 E te au tangata katoa no tona are, ko tei anau i te ngutuare, e tei okoia ki te moni i te tangata ke ra, i peritome katoaia ïa.