Isaia

52 KA ARA, ka ara; ka kakau ana i to ririnui, e Ziona: ka kakau ana i to kakau manea, e Ierusalema, e tera ra oire tapu e: oti ra ua oki te tomo mai ki roto ia koe ra. te peritome kore, e te viivii.

2 Ka ruru ana i te one-pueu ia koe ra; ka tu ki runga, ka noo ei ki to nooanga, e Ierusalema: e tatara ana ia koe i te ri ki runga i to kaki na, e tera ra tamaine tuikaa a Ziona ra e.

3 Te na ko maira oki a Iehova, I oko kotou ia kotou uaorai i te puapinga kore; ka oko akaouia rai kotou kare ra i te moni.

4 Te na ko maira oki te Atu ra ko Iehova, I aere oki toku ra iti-tangata ki Aiphiti i muatangana e tuitarere ki reira: e kua takinga-kinoia ratou e to Asura ra i te openga nei.

5 E tenana, te na ko mairā Iehova, eaa taku i ko nei i riro puapinga kore uaʼi toku ra iti-tangata? te aoa ra te aronga e tutara ki runga ia ratou, te tuatua mairā Iehova; e te akakino tukumoe koreia nei toku nei ingoa i te au rā katoa.

6 E teianei, e kite toku ra iti-tangata i toku nei ingoa; e teianei, e kite ratou kia tae i te reira rā e, ko au ïa, ko tei tuatua maira: i na, ko au.

7 Te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai mai i te tuatua meitaki ra, o tei tutu aere i te ora ra; o tei tuatua mai kia Ziona, Tei to Atua ra te au!

8 Ka akateitei to au tiaki i to ratou reo; e maeva katoatoa to ratou reo; e akara oki ratou, te mata e te mata, kia akaoki mai a Iehova ia Ziona.

9 Kia purore ua atu te rekareka; kia maeva katoatoa, e te au ngai pou i Ierusalema: kua akapumaana oki a Iehova i tona iti-tangata; kua akaora aia ia Ierusalema.

10 Kua kuku a Iehova i tona rima tapu ki mua i te mata o te pa enua katoa ra: e ka kite te au openga katoa o te enua ra i te ora a to tatou Atua.

11 Ka aere kotou, ka aere kotou, ka aere kotou ki vao; auraka e arapaki ua atu i tetai mea viivii ra; e aere kotou ki vao mei rotopu mai iaia ra; kia mā kotou, e tei apai i te au āriki a Iehova ra.

12 Kare ra kotou e aere rapurapu ua; kare rai e ati aere: ko Iehova oki te ka na mua ia kotou; e te Atua no Iseraela te ka na muri mai ia kotou.

13 I na, e manuia toku tavini; ka akateiteiia aia, ka apaiia aia ki runga, e e akateitei rava akeraia.

14 E aronga maata tei va ua ia koe: kua tu ke oki te akakino anga i tona mata i to te tangata katoa ra, e tona tu i to te tamariki a te tangata nei:

15 Ka pîpî katoa oki aia i te au enua e manganui; e topiri oki te au ariki i to ratou vaa ki mua iaia: e akara oki ratou i tei kore i akakiteia atu ia ratou ra; e tei kore i rongoia e ratou ra, ko ta ratou ïa e kite.