Deuteronomi
18 TE kau taunga ngati Levi ra, te kopu katoa o Levi ra, auraka a ratou ei tuanga kainga i o te ngati Iseraela ra: ko te au atinga ai a Iehova, ko te tuanga nana ra, ko ta ratou ïa e kai.
2 Auraka oki a ratou ei tuanga tapere i o to ratou au taeake; ko Iehova oki ta ratou ra tuanga, tana oki i tuatua mai kia ratou ra.
3 Teia ta te kau taunga ra tutaki na te tangata e o mai, na te aronga e apai i te atinga ra, i te puakatoro ra, e te mamoe: e o mai ratou i te ua mua, e nga ngene, e te kopu, na te taunga:
4 Te popo o te sitona naau, to te wina naau, e te inu naau ra, e te pakoti anga mua o te au mamoe naau ra, ko taau ïa e apai nana.
5 Koia oki tei ikiia e to Atua ra e Iehova no roto i to au kopu katoa na, kia tu ua aia e rave i te taoonga i te ingoa o Iehova, koia, e tana au tamariki e tuatau ua atu.
6 Kia aere mai tetai ngati Levi mei roto mai i tetai oire oou, i o Iseraela katoatoa ra, i tana i noo ra, kia aere mai oki aia ma te inangaro katoa o tona ngakau ki te ngai e akonoia e Iehova ra;
7 E rave ïa aia i te taoonga i te ingoa o tona Atua ra o Iehova, mei tona ai taeake katoa ra, mei te au ngati Levi e tu ua i reira ki mua i te aroaro o Iehova ra.
8 Kia okotai rai aite a ratou ra tuanga kai kia kai, ma tei rauka katoa iaia i tana apinga no nga metua i okoia ra.
9 Kia tae koe ki te enua ta to Atua ra ta Iehova e oronga mai noou ra, auraka koe e apii i te rave i te au mea viivii a taua pa enua ra.
10 Auraka rava tetai e kitea i rotopu ia kotou e apai i tana tamaiti e tana tamaine kia na roto i te ai, auraka ei tauraatua, e te akara tumurangi, e te purepure, e te akarakara,
11 E te kebere, e tei kimi i te vaerua kino, e te peu purepure, e tei ui ki tei mate ra.
12 Ko te aronga katoa oki i rave i te reira au peu e aronga viivii ïa na Iehova; e no te reira au mea viivii i tuaru ei to Atua ra ko Iehova ia ratou ki mua ia koe ra.
13 Ei toou Atua tika uaorai koe ei ai Iehova:
14 Ko teianei pa enua e riro ia koe nei, i akarongo ua ana ratou i te aronga akara tumurangi, e te tauraatua; kareka koe ra, kare e tika i to Atua ra ia Iehova kia pera koe.
15 E akatupu to Atua ra ko Iehova i tetai peroveta naau i rotopu ia koe ra, i tetai i te au taeake noou ra, mei iaku nei; koia taau e akarongo:
16 Mei taau oki i inangaro i to Atua ra ia Iehova i Horeba ra, i te rā uruoaanga ra, taau i tuatua ra e, Auraka au kia kite akaou i te reo o taku Atua ra o Iehova, auraka oki au kia kite akaou i teianei ai maata, kia kore oki au e mate.
17 E kua tuatua mairā Iehova kiaku, E tuatua meitaki ta ratou i tuatua maira.
18 Ka akatupu au i tetai peroveta na ratou i to ratou ra ai taeake, mei ia koe na te tu, e ka tuku au i taku tuatua ki roto i tona vaa, e nana e karanga atu kia ratou i te au mea ravarai taku e akaue atu iaia ra.
19 E te kore e akarongo mai i te tuatua naku, tana e tuatua ra i toku nei ingoa, e akautunga atu ïa au iaia.
20 Kareka te peroveta, e tuatua nengonengo ua i te tuatua ma toku ra ingoa, kare taku i akaue iaia e, e tuatua, e ko te tuatua katoa ma te ingoa o te au atua ke ra, ka mate ïa peroveta.
21 E kia tuatua ua koe i roto i toou uaorai ngakau e, Eaa matou e kite ei e, kare ïa tuatua i tei tuatuaia mai e Iehova ra?
22 Kia tuatua mai te peroveta ma te ingoa o Iehova ra, e kare o muri ake, kare i tupu taua tuatua ra, ko te reira taua mea kare i tuatuaia mai e Iehova ra, na taua peroveta ïa i tuatua nengonengo ua ra te reira; auraka koe e mataku iaia.