2 Tesalonia

2 TE anoano nei ra matou, e te au taeake, i te tuatua i te tae anga mai i to tatou Atu o Iesu Mesia ra, e to tatou putuputu anga i vaitata iaia ra,

2 Kia kore to kotou ngakau e ngaueue vave, kia kore e poitirere, i tetai vaerua atu, e te tuatua, e te leta, mei te mea e no ko nei atu ia matou nei, i te na ko anga atu e, kua vaitata rava te rā o te Mesia ra.

3 Auraka rava kotou e vavare i tetai tangata; ko te akaruke anga ana te ka tupu na mua, e tae ei ki taua rā ra, e e akakiteia mai oki taua tangata ara ra, ko te tamaiti o te mate mutu kore;

4 Ko tei māro mai e te akateitei rava iaia uaorai i te au mea katoa e karangaia e, e Atua, i tei akamoriia ra; e kua noo Atua ua mai aia i roto i te nao o te Atua, i te akakite ua anga mai iaia uaorai e, ko te Atua aia.

5 Kua ngaro aina ia kotou e, iaku rai i noo i o kotou na, kua akakite atu au ia kotou i teianei au tuatua?

6 E teianei, kua kite kotou i te tāpu kia tae ki tona uaorai tuatau tikai e akakiteiaʼi.

7 Te angaanga ua nei rai taua kino ngaro ra i teianei; ko tei tāpu ra i teianei, ka tāpu mairai, e kia apai keia atu aia.

8 Ei reira taua Kino ra e akakiteiaʼi, ko ta te Atu ïa e rave e pou takiri atu i te aʼo o tona vaa, e e akakore takiri atu i te kakā o tona tae anga mai:

9 Ko taua Kino ra e tau tona aerenga mai i te ravenga ririnui a Satani ra, ma te mana e te akairo, e te au ravenga pikikaa tu ke ra,

10 E ma te tuatua-tika kore pikikaa katoa ra, i rotopu i te aronga e mate ra; no te mea kare ratou i āriki i te tuatua-mou ma te inangaro, kia ora ratou.

11 No reira oki te Atua e tuku mai ei i te ririnui o te pikikaa ki runga ia ratou; e e akarongo atu rai ratou i taua pikikaa ra:

12 E e ope takiri ratou i te akaapaia, i tei kore i akarongo i te tuatua-mou, i tei navenave i te tuatua-tika kore ra.

13 Kia akameitaki ra matou i te Atua ia kotou auraka e tivata e tikaʼi, e te au taeake akaperepereia e te Atu ra, no te mea kua ikiia kotou e te Atua mei muatangana mairai, kia ora i te akatapu a te Vaerua e te akarongo i te tuatua-mou:

14 I kapikiiaʼi oki kotou e ia i ta matou nei evangelia, kia rauka te kakā o to tatou Atu ra o Iesu Mesia.

15 Ka tu marie rai, e te au taeake, e mou piri tikai oki i te au mea i tukuia atu kia kotou na, ta kotou i apii ra, i te tuatua o te vaa ra, e i ta matou ra oki leta.

16 E teianei, na to tatou Atu ko Iesu Mesia uaorai, e te Atua, ko to tatou Metua ra, ko tei aroa mai ia tatou nei, e kua oronga mai oki i te rekareka mutu kore, e te irinakianga meitaki i tona aroa ua,

17 E akapumaana mai i to kotou ngakau, e e akatinamou oki ia kotou i te au angaanga e te au tuatua memeitaki katoa ra.