Salamo

83 AURAKA koe e muteki ua, e te Atua e; auraka koe, e te Atua, e noo ua, ma te tuatua kore.

2 I na oki, te mutamuta nei to au enemi; e te aronga i riri mai ia koe ra, kua akateitei i te upoko.

3 Kua kimi ratou i te ravenga pakari i toou ra au tangata, kua akataka oki ratou i te tuatua i te aronga i uunaia e koe ra.

4 Kua tuatua ratou, E aere mai tatou e tipu ke atu, auraka ratou kia riro ei enua; e auraka te ingoa ra o Iseraela kia manako akaouia atu.

5 Kua uipa katoatoa i ta ratou tuatua anga; kua koreromotu ra ratou ia koe;

6 Te au puakapa o Edoma, e te ngati Isemaela; to Moabi, e to Hagara;

7 To Gebala, e to Amona, e to Amaleka; to Philiseti, e to Turia katoa ra.

8 Kua kapiti katoa Asura ia ratou: kua riro ei rima no te au tamariki a Lota ra. Sela.

9 E akapera koe ia ratou mei taau i rave ia Midiana; mei ia Sisera, mei ia Iabina i te kauvai ra ia Kisona.

10 Mate iora oki ratou i Eni-dora, riro atura ei teita no te enua.

11 E akariro i to ratou aronga mamaata mei ia Oreba, e mei ia Zeeba; e to ratou ui ariki ravarai mei ia Zeba, e mei ia Zalamuna;

12 Ko tei karanga e, Tatou e rave i te au nooanga o te Atua no tatou uaorai.

13 Akariro koe ia ratou, e taku Atua, mei te teita ra; mei te ngangaere i mua i te matangi.

14 Mei te vaorakau e pou i te ai ra, e mei te maunga e mura i te ai;

15 E akapera koe i te aruaru ia ratou i te uriia noou ra, e akatumatetenga ia ratou i te puaioio noou ra.

16 E akaki i to ratou mata ki te akama, kia kimi ratou i toou ra ingoa, e Iehova.

17 Kia akama ratou e kia raungara e tuatau ua atu; kia rokoia ratou e te ngarangara, e kia mate atu:

18 Kia kite ratou e, ko Iehova toou ingoa, e ko koe anake Tei Teitei i te enua katoa nei.