Daniela

2 E TAE akera ki te rua o te mataiti i te au Nebukanesa, kua kite iorā Nebukanesa i tetai moe, tumatetenga roa akera tona vaerua, itirere akera aia i taua moe nana ra.

2 Kua akaue atura te ariki i reira, kia kapikiia te aronga pakari, o te au akara etu, e te au purepure, e te au Kaledea, kia akakite mai ki te ariki i taua moe nana ra. E kua aere maira ratou e kua tu maira ki mua i te aroaro o te ariki.

3 E kua karanga atura te ariki kia ratou, E moe taku i moe ana, e kua tumatetenga toku vaerua kia kite au i taua moe ra.

4 Kua tuatua maira te au Kaledea ki te ariki i te reo Arama, E te ariki e, kia ora koe e tuatau ua atu: ka akakite mai ana koe ki to au tavini nei i tenana moe, e na matou e akakite atu i te aiteanga.

5 Kua karanga atura te ariki, na ko atura ki te au Kaledea ra, Teia taku tuatua, kia kore kotou e akakite mai kiaku i taua moe nei, e tona aiteanga katoa ra, ka tipupuia kotou, e e akariroia to kotou au are ei tiringa teita.

6 Kia akakite maira kotou i taua moe nei, e tona aiteanga katoa ra, e apinga ta kotou e rauka iaku nei, e te tutaki, e te ngateitei maata: e tenana, e akakite mai kotou kiaku i taua moe nei e tona aiteanga katoa.

7 Kua tuatua maira ratou, na ko maira, Ka akakite mai ana te ariki ki tona au tavini nei i taua moe ra, e na matou e akakite atu i tona aiteanga.

8 Kua karanga atura te ariki, Kua kite tikai au e, e manga taime ta kotou e anoano kia rauka, no te mea kua kite kotou e, kua riro atu na te tuatua i akonoia e au ra.

9 Kia kore ra kotou e akakite mai kiaku i taua moe nei okotai tu tutaki ia kotou: no te mea kua akakoro kotou i te tuatua pikikaa e te kino e tuatua ki mua iaku nei, e kia topa atu taua tuatau nei: e tenana, e akakite mai kotou kiaku nei i taua moe ra, e kite ïa au i reira e, ka tika ia kotou kia akakite mai i tona aiteanga.

10 Kua tuatua maira te au Kaledea ki mua i te ariki, na ko maira, Kare rava ïa e tangata i runga i te ao katoa nei e tika kia akakite atu i ta te ariki ra tuatua: kare oki e ariki, e te mataiapo, kare oki e tutara, i ui i te tuatua nei tena te tu, ki te aronga pakari, e te au akara etu, e te au Kaledea.

11 E tuatua tu ke roa tena ta te ariki i umuumu mai na, e kare rava ïa tangata e tikaʼi kia akakite atu i te reira ki mua i te ariki, mari ra ko te au atua, ko tei kore i noo i te kopapa tangata nei.

12 No taua tuatua nei i riri ei te ariki, e otooto roa akera te riri, e kua akaue atura kia taia te aronga pakari ravarai i Babulonia.

13 Riro atura taua tuatua ra kia taia te aronga pakari; kua kimi atura ratou ia Daniela e tona au oa ra kia taia.

14 Kua ui meitaki ua aturā Daniela, ma te akono meitaki, ki te rangatira o te au tiaki i te ariki ra ia Arioka, ko tei aere e ta i te aronga pakari i Babulonia.

15 E kua karanga atura aia ki taua rangatira o te ariki ra ia Arioka, na ko atura, Eaa teianei tuatua i akaparuparu uaiaʼi e te ariki Kua akakite akerā Arioka kia Daniela i taua tuatua ra.

16 E kua aere aturā Daniela ki roto, e kua pati atura ki te ariki kia tuku ua mai aia i tetai manga taime, e nana e akakite atu ki te ariki i taua aiteanga ra.

17 Kua aere iorā Daniela ki tona uaorai ngutuare, e kua akakite atura i taua tuatua ra kia Hanania, Misaela, e Azaria, i nga oa nona ra;

18 Kia pati akatenga ratou ki te Atua no te rangi, kia aroaia mai i taua tuatua ngaro ra; e kia kore a Daniela e taia, e tona au oa, ma te au tangata pakari katoa i Babulonia.

19 Akakiteia maira taua tuatua ngaro ra kia Daniela i te orama i te po ra. Kua akameitaki aturā Daniela i te Atua o te rangi.

20 Kua karanga aturā Daniela, na ko atura, Kia akameitakiia to te Atua ra ingoa e tuatatau ua atu: tei iaia oki te pakari e te ririnui:

21 Tei iaia oki te akatu ke i te au atianga e te au tuatau; tei iaia oki te tuku i te au ariki ki raro, e tei iaia oki te akatu i te au ariki ki runga: ko tei oronga mai i te pakari ki te aronga pakari, e te kite ki te aronga i rauka ia ratou te kite:

22 Te akakite nei aia i te au mea oonu e te munangaro: koia tei kite i to roto i te poiri, e tei iaia te mārama i te vairanga.

23 Te akameitaki nei au ia koe, e te akapaapaa nei au ia koe, e te Atua o toku ai metua, ko tei oronga mai i te kite e te ririnui noku, e kua akakite mai koe kiaku i ta matou i pati atu kia koe ra: kua akakite mai oki koe kia matou i ta te ariki ra tuatua.

24 No reirā Daniela i aere ei ki roto kia Arioka ra, tei akonoia e te ariki ei ta i te aronga pakari i Babulonia ra: aere atura aia, e kua na ko atura kiaia; Auraka e ta i te aronga pakari i Babulonia: ko au taau e arataki ki mua i te aroaro o te ariki ra, e naku e akakite i te aiteanga ki te ariki.

25 Kua rapurapu aturā Arioka i te arataki ia Daniela ki mua i te aroaro o te ariki ra, e kua na ko atura kiaia, Kua kitea e au tetai tangata no te au tuikaa no Iuda ra, e nana e akakite i te aiteanga ki te ariki.

26 Kua tuatua maira te ariki kia Daniela, ko Beletesazara te ingoa, na ko maira, E tika ainei ia koe kia akakite mai kiaku i te moe taku i moe ra, e tona aiteanga?

27 Kua karanga aturā Daniela ki mua i te aroaro o te ariki, na ko atura, Taua tuatua ngaro ra ta te ariki i umuumu maira, kare te aronga pakari, te aronga akara etu, te aronga kite, e te aronga purepure, e tika kia akakite ki te ariki;

28 E Atua ra tei te rangi, ko tei akakite mai ïa i te au tuatua ngaro, ko tei akakite mai ïa ki te ariki ra kia Nebukanesa, i te ka tupu i te au rā openga ra. Ko te moe naau ra, e te rika a to upoko i runga i to roi ra, ko teianei ïa;

29 Ko koe ra, e te ariki, i tupu toou manako i runga i to roi na, i te au mea e tupu a muri atu; e koia ko tei akakite mai i te au tuatua ngaro ra kua akakite ïa kia koe i te au mea e tupu a muri atu.

30 Kareka au nei, kare teianei tuatua ngaro i akakiteia mai kiaku nei, no te mea, te maata nei toku pakari i to te aronga katoa e ora nei, kia akakiteia ra te aite anga ki te ariki ra, e kia kite oki koe i te manako i roto i to ngakau na.

31 Te kite ra koe, e te ariki, e i na, tetai tiki maata. Ko taua tiki maata ra, tei tu ke tona kakā, kua tu maira ïa ki mua ia koe; e mea rikarika oki tona tu.

32 Te upoko o taua tiki nei, e auro meitaki ïa; tona umauma e nga rima nona, e ario ïa, tona kopu e nga ūā nona, e veo ïa;

33 Nga vaevae nona ra, e auri ïa, e nga tapuae nona ra, e auri tetai pae, e karakaraea oki tetai pae.

34 Te akara ua ra koe e kokotiia maira tetai toka kare ra e rima, tei tutuki maira ki runga i nga vaevae auri e te karakaraea i taua tiki ra, e pueurikiriki roa akera.

35 Pueurikiriki katoa atura te auri, te karakaraea, te veo, te ario, e te auro, e riro atura mei te ota i te au ngai pāpā sitona akaū; pueu ke atura i te matangi, e kare atura i te matangi, e kare atura o ratou e vairanga i kitea: e riro atura te toka, i tutuki i taua tiki ra, ei maunga maata, e kapi roa akera te ao katoa nei.

36 Ko taua moe ra ïa, e na matou rai e akakite i te aiteanga o taua moe ra ki mua i te aroaro o te ariki ra.

37 Ko koe, e te ariki, e ariki ïa no te au ariki ra: kua oronga mai oki te Atua no te rangi i te basileia noou, te mana, e te ririnui, e te kakā.

38 E te au ngai katoa i nooia e te tamariki a te tangata nei, te au puaka o te ngangaere, e te au manu o te reva, kua orongaia e ia ki roto i to rima, e kua akariro aia ia koe ei tutara ki runga ia ratou katoa ra. Ko koe taua upoko auro nei.

39 E i muri ake ia koe e tupu ei tetai basileia ke, e iti ake ïa ia koe, e tetai basileia, ko te toru ïa, e veo ïa, ko te ka tutara ïa ki runga i te ao katoa nei.

40 E te a o te basileia, e riro ïa i te maroiroi mei te auri ra: e mei te mea e pueurikiriki e e paruparu te au mea katoa i te auri, e mei te auri e akapueurikiriki i te au mea katoa ra, e akapera tena; e akapueurikiriki e e akaparuparu;

41 E mei taau i kite ra i nga tapuae e te au maikao, e karakaraea potera tetai pae, e auri oki tetai pae, e vevete ïa taua basileia ra, ka vai rai ra te maroiroi auri ki roto, mei taau oki i kite ra i te auri i iro katoaia ki te karakaraea nane ra.

42 E mei nga maikao-vaevae ra, e auri tetai pae, e karakaraea tetai pae, koia katoa taua basileia nei, e riro i te maroiroi tetai pae, e ngaangaa tetai pae.

43 E mei taau oki i kite i te auri e kua irokia ki te karakaraea nane, e riro ratou ki te iropu ua ki te uanga o te tangata nei: kare ra ratou e piri ki tetai ki tetai, mei te auri nei kare e iro ki te karakaraea.

44 E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.

45 Mei taau oki i kite ra e, i kokoti uaia mai taua toka ra no roto i te maunga kare e rima, e na te reira e akapueurikiriki i te auri, te veo, te karakaraaea, te ario, e te auro; te akakite maira te Atua maata ki te ariki i te au mea e tupu a muri atu: e mea tika tikai oki taua moe nei, e te pikikaa kore oki tona aiteanga.

46 Tipapa iorā Nebukanesa ki raro te mata, akamori atura ia Daniela, e kua akaue atura kia apai ratou i tetai atinga kai e te atinga inu kiaia.

47 Kua tuatua maira te ariki kia Daniela, na ko maira, Koia tika rai, e Atua to kotou Atua no te au atua nei, e te Atu no te au ariki nei, e te akakite oki i te tuatua ngaro, i tikaʼi ia koe kia akakite mai i teianei tuatua ngaro.

48 Kua akamaata atura te ariki ia Daniela, e kua oronga atura i te au apinga maata e manganui nana, e akariro atura iaia ei tutara ki runga i te matakeinanga katoa o Babulonia, e koia atura te tutara maata ki runga i te aronga pakari katoa i Babulonia ra.

49 Kua pati aturā Daniela ki te ariki, e kua tuku atura aia ia Sadaraka, Meseka, e Abenego, ei akaaere ïa i te matakeinanga i Babulonia ra: karekā Daniela, noo atura ïa ki roto i te ngutupa o te ariki ra.