Iakobo

4 NOEA te tamaki e te tauetono maata i roto ia kotou na? kare aina no ko na no to kotou anoano tika kore ra, ko tei tamaki ua ki roto i to kotou au melo na?

2 Te maata ua ra te anoano, e kare rai i rauka: te ta ua na kotou, e te umuumu ua na, e kare rai i rauka: te tamaki na, te karo ua na, e kare akerai, no te mea kare kotou i pati.

3 Te pati ra oki kotou, e kare a kotou i rauka, no te mea te apa na ta kotou pati anga, kia pou i te kaimoumouia e kotou i to kotou anoano tika kore ra.

4 E te au akaturi tane, e te au akaturi vaine, kare kotou i kite e ko te anoano i teianei ao, e enemi ïa i te Atua ra? E teianei ko te anoano e ei oa aia no teianei ao, e enemi ïa tangata no te Atua.

5 Te manako na kotou e, e pikikaa ta te tuatua i tataia ra, e akatupu aina te Vaerua i noo ki roto ia tatou nei i te vareae?

6 Kare, e oronga maira aia i te aroa ua e kia maata mairai. I karanga mai ei aia e, “E patoi mai te Atua i te aronga nengonengo, e oronga maira i te aroa ua i te aronga akaaka.” 7 E tenana e kauraro atu kotou i te Atua. E patoi atu i te diabolo, e nana e rere ke atu.

8 E akavaitata atu ki te Atua, e nana e akavaitata mai kia kotou na. E orei na i to kotou rima, e te aronga rave ara ra; e tamā na i to kotou ngakau, e te aronga ngakau rua na. 9 Ka aue na kotou, ka mii, e kia maringi to kotou roi-mata: kia riro oki to kotou kata ei aue, e to kotou rekareka ei taitaia.

10 Ka taakaaka na kotou ki mua i te aroaro o te Atu, e nana kotou e akateitei.

11 Auraka na kotou, e aku au taeake, e tuatua kino tetai ki tetai. Ko tei tuatua kino i tona taeake, e kua akaapa i tona taeake, kua tuatua kino i te ture, e kua akaapa i te ture: kia akaapa ra koe i te ture ra, kare ïa koe i te akono ture, e akaapa ra.

12 Okotai oki tumu o te ture, e tika iaia kia akaora e tika oki kia tamate rava: koai oki koe ka akaapaʼi koe ia etai e?

13 E teianei, ko kotou ko tei karanga e, E aere tatou akonei e apopo ki roto i te oire ra ko mea, ka oko ei e kia okotai ake mataiti i te oko anga, e kia rauka mai te apinga:

14 Kotou oki ko tei kore i kite i te ka tupu apopo: eaa oki to kotou ora anga nei? e auai ïa, no vaivai ake, e roa poto akera, ngaro atura ïa.

15 E na ko ra kotou e tikaʼi, Kia tika i te Atu ra, e kia roa to tatou aʼo, e rave ïa tatou i teia, e i tera.

16 I tenana ra, te rekareka na kotou i ta kotou tuatua akatietie: e mea kino anake ïa taua rekareka na.

17 E teianei ko te tangata i kite i te rave i te mea meitaki, e kare i rave, kua riro ïa ei ara nana.