Tito

1 PAULO, e tavini no te Atua, e e aposetolo oki na Iesu Mesia, i te tuatua i akarongoia e te aronga i ikiia e te Atua ra, e āriki i te tuatua-mou e tau i te akono i te Atua ra;

2 Kia rauka te irinaki i te ora mutu kore, i ta te Atua, ta te kore e tika kia pikikaa, i tuatua oronga mai ou teianei ao;

3 I akakite ua maira i tana tuatua i te tuatau tika nei i te ako, i tukuia mai iaku nei i te akaue a te Atua, a to tatou Ora ra;

4 Kia Tito, i taku tamaiti tikai i te akarongo nei: Ei ia koe te aroa ua, te tangi, e te au, no ko mai i te Atua Metua ra, e te Atu ra ia Iesu Mesia i to tatou Ora.

5 Teia te mea i vaoo ei au ia koe i Kereta na, kia akameitaki koe i tei toe ra, kia akataoonga i te aronga orometua i te au oire katoa ra mei taku i ikuiku ia koe na:

6 Ko te tangata apa kore, vaine okotai ra, e te tamariki akarongo, kare i tapepeia i te kaimoumou, e te akongata.

7 Ei tangata māro i tona uaorai inangaro, auraka e riri ua, auraka te inu maata i te wina, auraka ei tangata momoto, auraka ei morimori apinga i te mea tika kore;

8 Ei tangata ou meitaki i te tangata, e te tau atu i te tangata meitaki, te akono meitaki, te tuatua-tika, te tapu e te noo marie;

9 E te tāpu piri tikai i te tuatua-mou, i apiiia atu iaia ra, kia tika iaia kia apii i te tuatua ora, kia akakite atu i te ara a te aronga i patoi maira.

10 Manganui oki te tangata akono kore e te tuatua puapinga kore e te pikikaa, e maata ua atura i to te peritome:

11 Kia akamutekiia atu ïa aronga e tikaʼi; e kopu-tangata katoatoa oki ta ratou e akatatipake nei, i te apii anga i te tuatua-tika kore, kia rauka te apinga i te mea tika kore ra.

12 Tetai oki o ratou, e peroveta no ratou uaorai, tei tuatua e, “E pikikaa ua rai to Kereta kare e tivata, e puaka taae kino, e karaponga maata akatau ïa.” E kite tuatua-mou taua mea nei.

13 E tenana e ako viviki ua atu koe ia ratou, kia tika to ratou akarongo i te tuatua nei;

14 Auraka e akono i te au tuatua taeke ua a te ngati Iuda ra, e te akauenga a te tangata i akaruke i te tuatua-mou.

15 E mea viivii kore te au mea katoa nei i te aronga viivii kore: kareka i te aronga viivii e te akarongo kore ra, kare rava ïa e mea viivii kore; kua viivii oki to ratou manako e te akava-ngakau katoa.

16 Te karanga nei ratou e kua kite i te Atua; kareka i ta ratou angaanga te uuna nei ratou iaia, e aronga viivii, e te akarongo kore, ko te au angaanga memeitaki ra, kare rava ïa i tau i te reira.