1 Petero

3 KO kotou oki, e te vaine tini e, e kauraro marie i ta kotou au tane ra; kare tetai pae e akarongo i te tuatua ra, kia rauka mai ratou i te akono meitaki o ta ratou au vaine, auraka atu rai te tuatua;

2 I te akara anga mai ratou i to kotou aerenga viivii kore i kapiti katoaia i te mataku.

3 E to kotou akamanea, eiaa ko te manea ki vao ua ra, i te rauru iri ra, e te tatua anga i te auro ra, e te kakau anga i te kakau ra;

4 Ko te tangata ngaro ra ko te ngakau te akamanea, i te manea piro kore ra, ko te ngakau maru e te muteki ua, ko te mea apinga maata ïa ki mua i te aroaro o te Atua.

5 I akapera oki te au vaine tapu i irinaki i te Atua i te akamanea ia ratou uaorai i taito ra, ma te kauraro marie i ta ratou uaorai au tane:

6 Mei ia Sara i akarongo ia Aberahama, i te tuatua anga atu kiaia, E atu: ei tamaine oki kotou nana, kia akono meitaki kotou, e kare i poiterere ua i te mataku.

7 Koia katoa oki kotou, e te au tane, e noo ia ratou ra ma te kite, i te akangateitei anga i te vaine, i te āriki paruparu ra, e ei atu katoa oki i te aroa ua ra i te ora; kia kore ta kotou pure e topa.

8 E teianei, ei ngakau tai to kotou ravarai, i te aroa katoa anga, ei aroa taeake ra, ei ngakau maru, ei ngakau taunga.

9 Auraka e tutaki atu te kino i te kino, e te akakino i te akakino: ei mea ke ra, ei akameitaki ta kotou; kua kitea oki e, ko te mea ïa i karangaiaʼi kotou, kia rauka ia kotou te meitaki.

10 “Ko te anoano oki i te ora ra, e kia meitaki ona puke rā, e tāpu aia i tona arero i te kino, e tona vaa auraka e tuatua i te tuatua pikikaa;

11 E kopae i te kino, e rave i te meitaki; e kimi i te au, e aruaru atu.

12 Tei te aronga tuatua-tika ra to Iehova mata, e tei ta ratou kapiki tona taringa; e mata ke ra to Iehova i te aronga i rave i te kino ra.”

13 E naai kotou e takinga-kino mai, kia aru kotou i te mea meitaki?

14 E kia mate rai kotou i te tuatua-tika ra, e ao rai to kotou: “auraka e mataku i ta ratou i akamataku mai, auraka oki e tumatetenga;

15 Ka akatapu ra kotou i te Atua ra ia Iehova” i to kotou ngakau; e kia tika ua rai ia kotou kia akakite atu ki te tangata katoa e ui mai ia kotou i te manako i roto ia kotou na, ma te maru e te kauraro marie atu:

16 Ei akava-ngakau meitaki to kotou; e ta ratou i akakino mai ia kotou na, mei te mea e, e aronga rave tuatua kino ra, kia akama ratou ko tei tapepe pikikaa ua mai i ta kotou tuatua meitaki i te Mesia ra.

17 E mea meitaki oki, kia tika i te Atua, kia mate kotou i te tuatua meitaki, eiaa i te tuatua kino.

18 I mate na oki te Mesia uaorai i te matenga okotai no te ara, te tangata tuatua-tika no te aronga tuatua-tika kore, kia tae tatou iaia i te Atua ra; i tamate ravaia aia i te kopapa ra, i akaoraia ra e te Vaerua:

19 Ko tana ïa i ako atu i te au vaerua e vai i roto i te tapekaanga i teianei;

20 Ko tei kore i akarongo i muatangana, i te akakoromaki anga roa o te Atua, ka tatari ei aia i te tuatau ia Noa ra, i te tarai anga i te araka ra, i oraʼi e tokotai puke tangata i te vai, koia oki nga tangata toko varu ra.

21 Ko tei tau i te reira ra, ko te bapetizo ïa e ora katoaʼi tatou i teianei, (eiaa i te kopae anga i te viivii o te kopapa nei, i te tuatua ra i te akava-ngakau meitaki ra i te Atua,) i te tuakaouanga o Iesu Mesia ra;

22 Ko tei riro akenei ki runga i te rangi, e tei te rima katau o te Atua ra; e kua tukuia te au angela, e te aronga mana, e te aronga au, ki raro ake iaia.