1 Samuela

1 Te noo ra tetai tangata no Ramata-zophima, no te maunga ra no Epheraima, ko Elikana tona ingoa, e tamaiti na Ieroboama, te tamaiti a Elihu, te tamaiti a Tohu, te tamaiti a Zuphe no Epherata ra:

2 E toko rua ana puke vaine; ko Hana te ingoa o tetai, e ko Penina te ingoa o tetai: e tamariki ta Penina, kare ra a Hana e tamariki.

3 Kua aere atura taua tangata ra i te au mataiti katoa ki Silo, mei roto atu i tona oire, e apai i te atinga, e e akamori ia Iehova Sabaota. E nga tamariki a Eli toko rua ra, ko Hophini raua ko Phinehaza, ko nga taunga ïa no Iehova i reira.

4 E kia apai a Elikana i te atinga ra, kua oronga aia i te tuanga na tana vaine ra na Penina, e ta te au tamariki tamaroa katoa e te au tamaine nana ra:

5 Kareka ta Hana ra, e tuanga meitaki ïa tana i apai nana; e vaine inangaro a Hana nana: kua pa oki aia ia Iehova.

6 E kua akakoko rava mai tona enemi iaia kia mii, i te mea kua pa aia ia Iehova.

7 I pera rai aia i te au mataiti ravarai kia aere aia ki runga i te are o Iehova ra, akakoko akera aia iaia; aue iora aia, e kare akera i kaikai.

8 I reira oki te tane ra ko Elikana i tuatua ake ei kiaia, E Hana, eaa koe i aue ei? eaa i kore ei koe i kaikai? Eaa i tumatetengaʼi to ngakau? Kare ainei te meitaki maata toku i to te tamariki e kia tino ngauru ua atu ia koe na?

9 E oti akera ta ratou kai anga e ta ratou inu manga i Silo, kua tu akerā Hana ki runga. Te noo ra te taunga ra ko Eli i runga i te nooanga i te pae o tetai pou no te nao o Iehova ra.

10 Kua tumatetenga rava tona ngakau, e kua pure atura kia Iehova, aue rava atura.

11 Kua tia iora aia i te tia, kua karanga atura, E Iehova Sabaota e, kia tika ia koe i te akara mai i te mate o to tavini vaine nei, e kia manako mai koe iaku, kia kore koe e akapoina i to tavini vaine nei, kia oronga maira koe i tetai tamaiti tamaroa na to tavini vaine nei, ei reira au e orongaʼi iaia kia Iehova, e ope rava ake ona puke rā i te ao nei, e kare e reta e tae ki runga i tona upoko.

12 Te tamou ua ra aia i te pure ki mua i te aroaro o Iehova, te akara ua rā Eli i tona vaa.

13 tei te ngakau ra ta Hana tuatua anga, i kamutamuta ua tona vaa, kare ra i kitea tona reo: manako akerā Eli e kua kona aia.

14 Kua karanga aturā Eli kiaia, Mei te aa te roa o to kona anga? e kopae ke atu ia koe i taau wina.

15 Kua tuatua mairā Hana, na ko maira, Kare ïa, e taku pu, e vaine ngakau taitaia ua ra au: kare rai au i inu i te wina e te kava kona, kua riringi ra au i toku vaerua ki mua i te aroaro o Iehova.

16 Auraka koe e tuatua i to tavini vaine nei e e vaine kanga: no te maata anga oki o toku nei tumatetenga, e toku nei aue, taku i tuatua io nei.

17 Kua karanga aturā Eli i reira, na ko atura, Kia ora koe i to aerenga: e kia akatika mai oki te Atua no Iseraela i taau i pati atu iaia ra.

18 Kua tuatua maira aia, Kia kite aroaia mai to tavini vaine nei i mua i to aroaro na. Kua aere iora taua vaine ra i tona aerenga, e kua kaikai iora, e kare atura tona mata i kinokino ra.

19 Kua tu akera ratou i te popongi roa, e kua akamori atura ki mua ia Iehova, oki maira, e tae maira ki to ratou ngutuare i Rama: e kua kite a Elikana i tana vaine ia Hana; e kua manako mai oki a Iehova iaia.

20 E to iorā Hana, e tae akera ki te tuatau tikai ra, kua anau iora aia e tamaroa, tapa iora i tona ingoa ko Samuela; kua tuatua akera oki aia, E mea patiia aia e au ia Iehova ra.

21 Aere atura taua tangata ra ko Elikana, e tona kopu-tangata ravarai, ki runga, e apai i te atinga mataiti, e tana oki i tia ra.

22 Kare rā Hana i tae ki runga; kua tuatua akera oki aia ki tana tane, Kia topa ake ana te u i te tamaiti nei, ka apai ei au iaia ki runga, kia kitea aia ki mua i te aroaro o Iehova, kia noo aia i reira e tuatau ua atu.

23 Kua tuatua maira tana tane ra, ko Elikana, kiaia, Tei tau meitaki ia koe e akapera koe; ka noo e kia akatopaia e koe te u iaia; kia akatupu rā Iehova i tana tuatua. Noo iora taua vaine ra, angai iora i tana tamaiti e topa ua atura te u.

24 E kia akatopaia e e ia te u ra, kua apai atura aia iaia ki runga, e nga puakatoro e toru, e te faraoa okotai epha, e tetai āriki wina, e kua apai atura iaia ki te are o Iehova i Silo: e tamaiti ou rava taua tamaiti ra.

25 Kua ta iora ratou i tetai puakatoro ra, e kua apai akera i taua tamaiti ra kia Eli;

26 E kua karanga atura aia, E taku pu e, te ora ra koe, e taku pu, ko au te vaine i tu ua i vaitata ia koe i ko na, ka pure ei au kia Iehova ra.

27 I pure oki au i teianei tamaiti; e kua oronga mai a Iehova kiaku i taua mea ra i taku i pati atu iaia ra:

28 No reira au i oronga atu ei iaia kia Iehova; no Iehova ïa aia e kia ope rava ona puke rā i te ora anga nei. Kua akamori iorā Samuela ia Iehova i reira ra.