Angaanga

2 E TAE rava atura ki te rā Penetekose, kua taki ruru marie akera ratou katoa i te ngai okotai ma te inangaro okotai.

2 E kare akera i mamia, ko te aruru maira no runga mai i te rangi, mei te matangi viviki maata ra; kua ki rava akera te are i nooia e ratou ra.

3 E kua mama maira te arero manga kia ratou, mei te ai ra te tu, e to iora ki rungao ia ratou katoa ra.

4 E ki akera ratou ravarai i te Vaerua Tapu, kua tuatua iora i te tuatua ke, i ta te Vaerua i oronga mai i te tuatua kia ratou ra.

5 E te noo ra oki te tangata ngati Iuda akono i te Atua i Ierusalema, no te pa enua ravarai i raro ake i teianei rangi.

6 E tutuki atura taua rongo ra, kua uipa maira te tangata ravarai, e va ua iora, no te mea i akarongo atura taua au tangata katoa ra, i ta ratou uaorai tuatua tikai i te tuatua angaia mai.

7 Poitirere rava atura ratou katoa, ma te umere, na ko iora ratou ratou uaorai, I na, kare aina ratou e tuatua nei i to Galilea anake?

8 Eaa ra oki teia i akarongo ei tatou ravarai nei i te reo, tonao tonao, i anau ei ra?

9 I to Paretia, e to Madai, e to Elama, e te aronga e noo i Mesopotamia, e i Iudea, e to Kapadokia, to Ponoto, e to Asia,

10 To Pherigia, e to Pamephulia, to Aiphiti, e to Libia, i te pae e topiri tika mai ki Kurene, e te tangata ke oki no Roma, ko te ngati Iuda oki e te akarongo ou mai,

11 To Kereta e to Arabia, i te akarongo anga atu tatou ia ratou i te tuatua anga mai i te peu taka ke a te Atua i to tatou uaorai nei au reo tikai.

12 Kua va ua iora ratou katoa, e kua ekoko iora, na ko akera ki tetai ki tetai, Eaa ra teia?

13 Kareka tetai pae ra, na ko maira ïa i te aviri anga, Kua ki teianei au tangata i te wina venevene.

14 Kua tu akera rā Petero ki runga, e te ngauru ma tai katoa ra, kua akateitei ua atura i tona reo, karanga atura kia ratou, E te au tangata o Iudea nei, e te aronga katoa e noo i Ierusalema nei, kia kite mai kotou i teia, e ka akarongo mai ana i taku nei tuatua.

15 Kare oki teianei au tangata i kona i ta kotou e manako na, ko te toru rai oki teia o te ora i teianei rā.

16 Ko tei tuatuaia maira teia e Ioela peroveta ra e,

17 “Kia tae ki te au rā openga ra, (te tuatua maira te Atua,) e riringi atu ei au i taku Vaerua ki rungao i te tangata ravarai; e na ta kotou au tamariki tamaroa, e te au tamaine, e totou mai, e ka kite oki to kotou au tangata ou ra i te orama, e to kotou au tangata ruaine oki e moemoeaia ïa:

18 E riringi atu au i taku Vaerua ki rungao i toku au tavini, e toku au tavini vaine, i te reira au rā, e ka totou mai ratou;

19 E akakite oki au i te mea umere ki runga i te rangi, e te akairo ki raro i te enua: te toto, e te ai, e te kou auai oki:

20 Ka riro te rā ei poiri, e te marama ei toto, e tae ei ki taua rā mataku maata o te Atu ra:

21 E riro oki e, ko te kapiki i te ingoa o te Atu ra, e ora ïa.”

22 E te au tangata o Iseraela nei, e akarongo mai kotou i teianei tuatua, ia Iesu no Nazareta, ko te tangata no ko mai i te Atua i akakiteia mai kia kotou nei i te au angaanga mana, e te mea umere, e te au akairo, ta te Atua i rave iaia i rotopu ia kotou nei, kua kite katoa oki kotou uaorai.

23 Koia ra i tukuia mai ia kotou i te akakoro mou, e te akono mamao anga a te Atua, i raukaʼi ia kotou, akasatauro iora, e tamate takiri atura i te rima o te akono kore ra:

24 Koia oki ta te Atua i akatu mai nei, kua matara oki iaia te tapeka o te mate, no te mea kare rava oki aia e mou i te reira.

25 Te na ko maira oki a Davida iaia, “Kua tuku au ia Iehova ei mua ua rai iaku, tei toku rima katau oki aia, kia kore au e ngaueue:

26 I marekaʼi toku ngakau, e te rekareka nei toku arero; ka moe katoa oki toku kopapa nei ma te tiaki:

27 Kare oki koe e vaoo i toku vaerua i ade; kare oki koe e tuku i to Mea Tapu ra, kia kite i te pe.

28 Kua akakite mai koe iaku i te ara ora; ka akaki mai koe iaku i te rekareka i to mata.”

29 E tāma, e te au taeake, e tuatua na atu na au kia kotou i te pateriarika ia Davida, kua mate oki aia, e kua tanumia, e te vai ua nei rai tona tanumanga i o tatou nei, e tae rava akenei ki teianei rā.

30 No te mea ra e peroveta, kua kite oki aia, kua tuatua mai te Atua kiaia ma te taputou e, e akatu aia i te Mesia i tona uanga i te akono anga i te kopapa ra, ei noo ki runga i tona terono;

31 Koia ra i kite takere ana i te reira, i tuatuaʼi i te tuakaouanga o te Mesia, kare tona vaerua e vaooia i ade, e kare tona kopapa i tuku uaia kia kite i te pe.

32 Ko taua Iesu nei rai ta te Atua i akatu akenei ki runga, ko matou katoa nei oki te kite.

33 E teianei, kua akateiteiia aia i te rima katau o te Atua, e kua rauka maira i te Metua te Vaerua Tapu i tuatuaia maira, kua riringi mai aia i teia, i ta kotou e akara nei, e ta kotou e akarongo nei.

34 Kare oki a Davida i tae ki runga i te rangi, te na ko maira oki aia uaorai, “Kua tuatuā Iehova ki taku Atu, Ka noo koe ki taku rima katau nei,

35 E kia akariro au i to au enemi ei pange vaevae noou.”

36 E teianei, kia kite tikai te kopu-tangata ravarai o Iseraela e, kua akariro mouia aia e te Atua ei Atu e ei Mesia, ko taua Iesu nei rai ta kotou i akasatauro nei.

37 E kite akera ratou i taua tuatua ra, puta atura to ratou ngakau, e kua tuatua maira kia Petero ma te au aposetolo katoa, E tāma, e te au taeake nei, e akapeea matou nei?

38 Kua karanga aturā Petero kia ratou, E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara; e ka orongaia mai ïa te Vaerua Tapu kia kotou.

39 No kotou oki te tuatua i tuatuaia maira, e no ta kotou tamariki, e no te aronga katoa oki i te atea ke ra, ko ta te Atu ta to tatou Atua e karanga atu.

40 E manganui rai tana tuatua i karanga atu, e ako atura, na ko atura, Kia ora kotou i teianei uki māro.

41 E te aronga katoa i āriki marie i tana tuatua, bapetizoia iora ïa; e kapiti katoaia maira kia ratou e toru katoa paa tausani i taua rā ra.

42 Kua mou piri tikai atura ratou i ta te au aposetolo i apii ra, e te kapiti katoa anga atu, e te vavaʼi anga i te manga, e te pure anga oki.

43 E rokoia iora ratou ravarai e te mataku, e manganui te mea umere e te akairo i raveia e te au aposetolo ra.

44 Uipa akera taua aronga katoa ra i te ngai okotai, e kapiti ua akera oki to ratou apinga.

45 E kua oko atura oki ratou i to ratou kainga e te apinga, e tua iora oki na ratou ravarai, e tau katoatoa akera.

46 E noo tamou iora ratou ra ki roto i te iero ra, i te au rā katoa, ma te inangaro okotai, e te vavaʼi anga i te manga, i tera are, i tera are, kai iora oki ratou i te kai ma te rekareka, e ma te tavaitai ua te ngakau;

47 I te akameitaki anga i te Atua, e ma te kiteia mai e te tangata ravarai. E te aronga i akaoraia ra, kua kapitiia ïa e te Atu i te ekalesia ra, kare e rā i tukua.