Angaanga

3 AERE atura oki a Petero raua ko Ioane ki runga i te iero ra i te pure anga i te ora iva.

2 E tetai tangata pirikoki mei te kopu mai o tona metua vaine, kare e rā e tivata i te apaiia e ratou, e tukuia ki te ngutupa o te iero e tuatuaia ra e, e Manea, e pati i te apinga i te aronga e tomo ki roto i te iero ra;

3 E kite akera aia ia Petero raua ko Ioane i te tomo anga ki roto i te iero ra, kua pati maira i te apinga.

4 Kua tiroi matariki aturā Petero e Ioane katoa kiaia, kua na ko atura, Ka akara mai ana ia maua.

5 Kua akara maira aia ia raua, maara akera e, e rauka tona apinga ia raua.

6 Kua karanga aturā Petero, Kare aku ario e te auro; ko taku ra e vai nei, ko taku ïa e oronga atu naau: Ka tu koe ki runga, ka aere, i te ingoa o Iesu Mesia no Nazareta ra.

7 Kua opu atura aia i tona rima katau, akatu akera ki runga; ketaketa atura tona vaevae ma te puku vaevae katoa i reira.

8 Rere ua maira aia ki runga, tu iora, e aaere ua iora; kua tomo atura ma ratou katoa ki roto i te iero ra, rere aere ua atura aia, ma te akameitaki i te Atua.

9 Kua akara atura te tangata ravarai iaia i te aere anga e te akameitaki anga i te Atua.

10 Kua kite oki ratou e, koia tei noo i te ngutupa Manea i te iero, ko tei pati ua i te apinga ra; poitirere atura ratou, va ua iora i te mea i tupu i taua tangata ra.

11 Te tāpu ua ra oki te tangata pirikoki i akaoraia ra ia Petero e Ioane, kua ati maira te tangata tini ravarai kia ratou ki roto i te tomoanga e tuatuaia ra e, no Solomona, ma te umere maata.

12 E kite akerā Petero, kua karanga atura aia ki te tangata tini, E te au tangata no Iseraela nei, eaa kotou i umere ei i teia? eaa kotou i tiroi matariki mai ei ia maua, mei te mea e, no maua te mana e te meitaki i aere ei teianei tangata?

13 Na te Atua o Aberahama, e no Isaaka, e no Iakoba, na te Atua o to tatou ui tupuna ra, i akateitei i tana Tamaiti ia Iesu; ko ta kotou i tuku nei, e kua akaruke i mua i te aroaro o Pilato, iaia i māro ra e, e tuku.

14 Akaruke io nei kotou i te Tapu, e te Tuatua-tika, e pati atura oki i tetai ta tangata kia tukuia mai kia kotou na;

15 I ta io nei oki i te Tumu o te ora, i ta te Atua i akatu mei te mate maira; ko matou nei rai oki te kite.

16 Na tona ingoa oki i akamaroiroi i teianei tangata i te akarongo anga i tona ingoa i ta kotou e akara nei, e ta kotou oki i kite nei: koia ïa, na te akarongo oki iaia i raukaʼi iaia teianei ora maata tikai i mua ia kotou katoa nei.

17 E teianei, e te au taeake nei, kua kite au e, no te kite kore i peraʼi kotou, e to kotou ui rangatira katoa oki.

18 Ko te au tuatua ra ta te Atua i akakite mai i muatangana i te vaa o tana au peroveta katoa ra e, e mate te Mesia, ko tana ïa i akatupu io nei.

19 E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o te Atua ra;

20 E kia tono mai aia ia Iesu Mesia, ko tei tuatuaia i muatangana no kotou.

21 Ei te rangi rai oki aia noo ei e tikaʼi, e tae ua atu ki te tuatau e tupu ei te au mea katoa nei, ta te Atua i tuatua maira i te vaa o te au peroveta tapu katoa nona, mei te muatangana mai o teianei ao.

22 Kua tuatua oki a Mose ki te aronga tupuna ra e, “E akatupu to kotou Atua ko Iehova i tetai peroveta no kotou ei roto i to kotou ai taeake na, mei iaku nei rai te tu; koia ta kotou e akarongo atu i te au tuatua ravarai kia tuatua mai kia kotou na.

23 E te tangata ravarai e kore e akarongo i taua peroveta ra, e pou rava ïa i rotopu i te tangata katoa.”

24 E te au peroveta ravarai i tuatua mai mei ia Samuela mai, kua akakite mamao katoa mai ana ïa i teianei tuatau.

25 Ko kotou oki te tamariki a te au peroveta ra, e te koreromotu ta te Atua i papau atu i to tatou ai tupuna, i te na ko anga mai kia Aberahama ra e, “Ka meitaki te pa enua katoa o te ao nei i toou ra uanga.”

26 Kia kotou ana oki ta te Atua i tono mai i tana Tamaiti ia Iesu, i tana i akatupu nei, kia ora kotou, kia akaruke kotou katoa e ope rava ake i ta kotou tuatua kino.