Ephesia

5 E TEIANEI ei aru kotou i te Atua, mei te tamariki akaperepere ra;

2 Ei aerenga aroa to kotou mei te Mesia i aroa mai ia tatou ra, e kua oronga mai iaia uaorai ei oko, e ei atinga kakara, i te Atua ra, na tatou.

3 Kareka te akaturi, e te au tuatua viivii ravarai, e te noinoi apinga, auraka rava e akaikiia ki o kotou na, ko tei tau ïa i te aronga tapu;

4 Auraka oki te tuatua kanga ra, e te tuatua rikiriki neneva ra, e te takatakata kino ra, kare ïa e tau; kareka te akameitaki, e tau ïa.

5 Kia kite oki kotou e, kare a te akaturi, e te tangata viivii ra, kare a te noinoi apinga ra, e akamori idolo ïa, kare anake a ratou tuanga i te basileia o te Mesia ra e te Atua.

6 Auraka rava ei tangata e pikikaa mai ia kotou i te tuatua puapinga kore ra; no te reira au mea oki i tae mai ei te riri o te Atua ki rungao i te tamariki akarongo kore.

7 Auraka ra kotou ei rave katoa i ta ratou ra.

8 I poiri ana oki kotou i muatangana ra, i teianei ra, kua mārama kotou i te Atu: kia tau oki to kotou aerenga i te tamariki o te mārama;

9 (Ta te Vaerua e akatupu ra, koia te au mea meitaki ravarai, e te tuatua-tika, e te tuatua-mou;)

10 Kia kitea ia kotou te mea mareka na te Atu.

11 E auraka e kapiti ki te angaanga puapinga kore a te poiri, e ako atura.

12 E mea akama oki kia tuatua i te au mea i rave poiriia e ratou ra.

13 E te au mea kikino ravarai i kitea ra, i kitea ïa i te mārama: ko te mārama oki te akakite mai i te au mea katoa.

14 I tuatua mai ei te Vaerua, “E ara mai na, e tera ra tangata moe, ka tu mai ki runga no te aronga mate mai, e na te Mesia e oronga mai i te mārama ia koe.”

15 E tenana, kia matakite i to kotou aerenga, eiaa mei ta te kite kore, mei ta te aronga pakari ra.

16 Ma te taporoporo marie i te tuatau, no te mea e tuatau kino teia.

17 E auraka kotou ei manako kore, kia kite ra kotou i to te Atu ra anoano.

18 E auraka e kona i te wina, e tupu ei te kanga maata; kia ki ra kotou i te Vaerua;

19 Ma te karangaranga oki kotou kotou uaorai i te salamo e te imene e te peʼe a te Vaerua, e imene oki ma te tau o te ngakau i te Atu;

20 I te akameitaki anga i te Metua ra i te Atua, i te au mea katoa ma te tivata kore, i te ingoa o to tatou Atu nei o Iesu Mesia;

21 Ma te tatomo marie kotou tetai ki tetai ma te mataku i te Atua.

22 E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra.

23 Ko te tane oki te upoko o te vaine, mei te Mesia katoa ra te upoko ïa i te ekalesia; ko te ora oki aia no taua kopapa nona nei.

24 E teianei mei te ekalesia e kauraro i te Mesia nei, koia katoa oki te au vaine ki ta ratou uaorai au tane i te au mea katoa nei.

25 E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko;

26 Kia akatapu aia i te ekalesia, e kia orei i te orei anga vai, i te tuatua ra;

27 Kia tuku aia iaia i mua i tona aroaro ei ekalesia kakā, e te topata kore, e te korokoromingo kore, e te au mea katoa mei te reira te tu; kia tapu ra e te apa kore.

28 E aroa katoa te au tane i ta ratou uaorai au vaine e tikaʼi, mei to ratou uaorai kopapa; ko tei aroa i tana uaorai vaine, kua aroa aia iaia uaorai. 29 Kare ua e tangata e makitakita i tona uaorai kopapa e teia noaʼi oki; kareka e angai e te akaperepere marie; mei ta te Atu i te ekalesia nei:

30 E melo oki tatou no tona kopapa, no tona kiko, e tona ivi.

31 No reira oki “e akaruke ei te tangata nei i tona metua tane e tona metua vaine, ka piri atu ei ki tana vaine, e ka riro oki raua ei kopapa okotai.”

32 E tuatua ngaro maata oki teia: no te Mesia ra taku e tuatua nei e no te ekalesia.

33 E aroa ra te tangata katoa i tana uaorai vaine mei te aroa iaia uaorai; e te vaine oki e kauraro, aia i tana tane.