Isaia

35 TE MEDEBARA, e te ngai vaiavare ua, e rekareka ïa no ratou ra; e rekareka rai te enua ngangaere, e e pua oki mei te tiare.

2 E maata ïa i te pua tiare anga, e rere ua i te rekareka e te imene: e orongaia mai nona te kakā o Lebanona; te manea o Karamela, e o Sarona; e kite te reira i te kakā o Iehova, te manea o to tatou Atua.

3 E akaketaketa na kotou i te rima apikepike, e e akapakari kotou i te turi ru ua ra.

4 E karanga atu kotou ki te ngakau taitaia, Kia maroiroi; auraka e mataku: i na to kotou Atua: e tae mai ïa te akaoko; te tutaki a te Atua ra: koia uaorai te aere mai, e akaora ia kotou.

5 Ei reira e akapueraiaʼi te mata o te matapo ra, e e akapu tataiaʼi te taringa o te turi ra.

6 Ei reira te pirikoki e rererere aere ei mei te aili, e imene mai oki te vaa o te murare: e pupu oki te vai na te medebara, e te au mata vai i te ngai tuamarō ra.

7 E riro te vai pikikaa ua ei roto, e te enua keremarō ra ei vai pupui: i te nooanga o te au taae ra, i te ngai i moe ei, e tupu ei te mauku e te raupo ra.

8 Ei reira oki tetai ara metua, e tetai arataa oki, e karangaia oki te reira, I te arataa tapu; kare rava e tangata viivii e na reira te aere; e riro ra no ratou, no tei aere i te ara ra; auouo ua rai ratou ra, kare ïa e tatipake.

9 Kare o reira e liona; kare oki e puaka taae e tae mai i reira, kare rava tetai e kitea atu ki te reira ngai: ko tei okoia ra te na reira te aere.

10 E ko tei akaoraia e Iehova te ka oki mai, e tae mai ratou ki Ziona ma te imene, e te rekareka mutu kore i rungai i to ratou upoko: e rauka ia ratou te rekareka e te pereperekavana; ko te aue ra, e te mii, e rere ke atu ïa.