Mataio

20 E TAU oki te basileia o te ao ra i tetai tangata kainga, ko tei aere atu ki vao i te popongi metua, e ou i te rave angaanga i tona kainga vine.

2 E tika akera tana tuatua i tetai pae rave angaanga e kia taki tai denari i te rā okotai, kua tuku atura aia ia ratou ki reto i tona kainga vine.

3 E tae akera ki te toru o te ora ra, aere atura aia ki vao, kite atura i tetai aronga tangata i te tu ua anga i te okoanga apinga:

4 Kua karanga atura aia kia ratou, Ka aere katoa kotou ki roto i taku kainga vine ra, e te tika ra, naku ïa e o atu na kotou. Aere atura ratou.

5 Aere akaou atura aia ki vao i te ora ono, e te iva ra, kua pera akaou atura.

6 E tae akera ki te ngauru ma tai o te ora, aere atura aia ki vao, kite atura i tetai aronga i te tu ua anga, karanga atura aia kia ratou, Eaa kotou i tu uaʼi ma te angaanga kore i ko nei e ope ua atu te rā nei?

7 Kua na ko maira ratou kiaia, No te mea kare e tangata i ou mai ia matou. Kua karanga atura aia kia ratou, Ka aere katoa kotou ki roto i taku kainga vine ra; e te tika ra, naku ïa e o atu na kotou.

8 E aiai iora, kua karanga atura te tangata kainga ra ki te akaaere nona, E karanga atu i te aronga rave angaanga, e apai atu i ta ratou tutaki, na mua te aronga openga ra e tae ua atu ki tei muatangana.

9 E tae maira tei ouia i te ora ngauru ma tai ra, rauka iora ta ratou, taki tai denari i te tangata okotai.

10 Kia tae maira tei muatangana ra, manako iora ratou e maata atu ta ratou e rauka, taki tai katoa ra a ratou denari i rauka i te tangata okotai.

11 E tei te rave anga ra, kua urutoe iora ratou i te tangata kainga ra,

12 Na ko maira, Okotai ua a teianei aronga openga ora i te angaanga anga, e kua akaarite koe ia ratou kia matou nei, tei akakoromaki i te roiroi e te veravera o te rā.

13 Kua karanga atura aia ki tetai o ratou, na ko atura, E tama, kare i ara taku tuatua ia koe; kare aina taua i akataka i te tuatua e kia okotai aau denari?

14 Ka rave i taau, ka aere: ko toku ïa anoano, mei taau katoa na kia apai atu na te akaopenga nei.

15 Auraka au e akono i toku inangaro i taku uaorai nei? Te kino na toou mata i toku nei meitaki?

16 Ka riro rai te akaopenga ei muatangana, e tei muatangana ra ei akaopenga ïa: toko rai oki tei karangaia, e iti ra tei ikiia.

17 E te aere aturā Iesu ki Ierusalema, e i te ara, kua arataki atura aia i te au pipi raungauru ma rua ra ki te pae, na ko atura ia ratou,

18 I na, te aere nei tatou ki Ierusalema; e e tukuia te Tamaiti a te tangata nei ki te kau taunga nunui e te au tata tuatua, e e akaapa mai ratou iaia kia mate;

19 E tuku oki ratou iaia ki te etene, kia taitoitoia, e kia pāpāia, e kia akasatauroia oki; e tu akaou maira aia i te po toru ra.

20 Kua aere maira te metua vaine o nga tamariki a Zebedaio iaia ra, e ko ana puke tamariki, kua tipapa iora ki mua iaia, kua pati maira i tona inangaro.

21 Kua karanga atura aia kiaia, Eaa toou inangaro? Kua tuatua maira aia kiaia, Kia tae i toou basileia, kia noo aku tamariki nei, tetai ki toou rima katau, tetai oki ki toou rima kaui.

22 Kua karanga aturā Iesu, na ko atura, Kare kotou i kite i ta kotou i pati mai nei. Ka tika aina ia korua kia inu i te kapu taku e vaitata i te inu nei, e kia bapetizoia korua i te bapetizo e bapetizoiaʼi au nei? Kua tuatua maira raua, Ka tika ïa ia maua.

23 Kua karanga atura aia kia raua, E inu tikai korua i taku kapu, e bapetizoia oki i te bapetizo e bapetizoiaʼi au nei; kareka te noo i taku rima katau, e i taku rima kaui, kare ïa e tika iaku kia oronga atu, mari ra no te aronga i akonoia e taku Metua no ratou ra.

24 E kite akera te tino ngauru ra, ki akera ïa i te riri i aua puke taeake ra.

25 Kua karanga aturā Iesu kia ratou ra, e kua na ko atura, Kua kite oki kotou e, te tutara nei te ui mana o te etene ki runga ia ratou, e te aronga mamaata ra, te mana ra ïa i runga i to ratou.

26 Kare ra e tika kia akapera ki roto ia kotou; ko te anoano i te akamaata i o kotou, kia riro ïa ei tavini no kotou;

27 E ko te inangaro kia maata aia i o kotou na, ei tavini akaaka aia no kotou:

28 Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui.

29 E i to ratou akaruke anga i Ieriko, e motuanga tangata maata tei aru mai iaia.

30 E i na, te noo ra e toko rua puke tangata matapo ki te pae arataa, kite akera raua e te aere ra Iesu na reira ua o, kua kapiki maira, na ko maira, E te Atu, e te Tamaiti a Davida, e aroa mai koe ia maua.

31 Kua kauvae atura te tangata tini ia raua, kia muteki oki raua; maata ua atura to raua kapiki, na ko maira, E te Atu, e te Tamaiti a Davida, e aroa mai koe ia maua nei.

32 Tu ua iorā Iesu, kua kapiki atura ia raua, na ko atura, Akapeea atu au kia korua i to korua anoano?

33 Kua na ko maira raua kiaia, E te Atu, kia puera o maua mata.

34 Aroa aturā Iesu ia raua, akatukia atura i to raua mata; puera akera to raua mata i reira ra, e kua aru maira raua iaia.