Isaia

57 TE MATE nei te tangata tuatua-tika, e kare rava tetai e akamanako; e te apai keia nei te tangata takinga-meitaki, e kare e tangata i kite e, no te kino te ka tupu i apai keiaʼi te tangata tuatua-tika.

2 E aere ïa aia ma te au; e akaangaroi ratou ki runga i to ratou roi, ko tei na te ara tikaoru ua te aere.

3 E akavaitata mai ana ra kotou i ko nei, e te au tama a te vaine purepure ra, e te uanga o te tane akaturi, e te vaine akaturi.

4 Koai ta kotou i aviri na? e i akaaitaʼi kotou i te vaa, e i atoro ei te arero? Kare aina kotou i te tamariki meameaau, e uanga pikikaa?

5 I te akaneneva anga ia kotou uaorai i te idolo i raro ake i te au rakau ruperupe katoa ra; e te ta anga i te au tamariki ki roto i te au o ra, ki raro ake i te ngaangaa mato ra?

6 Tei te au toka maniania o te o ra taau tuanga; ko te reira, ko te reira taau ïa tuanga: ko te reira taau i riringi atu i te atinga inu, e taau i apai i te atinga kai. E rekareka ainei au i te reira au mea?

7 Tei runga i te maunga teitei roa te apai angaia e koe to roi: e kua tae rava koe ki reira, i te apai anga i te atinga.

8 Tei muri mai i te pa, e te kopa ngutupa ra, te vaoo angaia e koe toou manako anga: kua akakite koe ia koe uaorai ki tetai ke kare iaku, kua riro ki runga; kua akamaata koe i to roi; e kua akatau koe i te koreromotu ia ratou; kua inangaro oki koe i to ratou roi; e kua akono i te ngai.

9 Kua apai koe i te manongi no te ariki ra; e kua akamaata koe i to au manongi meitaki ra: e kua tono ke rava koe i taau au karere, e kua taakaaka koe ia koe uaorai e tae ua atu ki ade.

10 Kua roiroi koe i toou ra aerenga mamao: kare ra koe i karanga e, Kare atura e manakonako anga: kua rauka ia koe te mea i oraʼi to rima, i kore ei koe i paruparu roa.

11 Koai oki tena i mataku ei koe na? e koai taau i tumatetenga ra, i pikikaa mai ei koe, e kare i akamaara mai iaku, kare oki i akaeatu i to ngakau na? kare ainei no te mea e muteki anga roa akenei toku, i kore ei koe i mataku mai iaku?

12 E akakite ra au i te tuatua-tika naau ra, e taau ra au angaanga; kare ra aau e puapinga i te reira.

13 Me aue koe ra, na te uipa anga idolo naau ra e akaora ia koe; e peke ke ra ratou ravarai i te matangi; e pueu ke ïa i te aʼo: ko tei irinaki maira kiaku ra, nona ïa te enua, e koia te ka noo ki toku maunga tapu ra.

14 E ka tuatua akeraia, E akāū kotou, e akāū kotou i te one, e anga i te ara, e apai ke i te tukiaanga i te ara o toku ra iti-tangata.

15 Te na ko maira oki Tei Teitei, e Tei akateiteiia, ko tei noo i te ao mutu kore, ko Tapu tona ingoa ra: Ei te ngai teitei e te tapu au e noo ei, e ei iaia oki tei tataraara, e tei akaaka te vaerua ra, ei akamatutu i te vaerua o tei akaaka ra, e ei akamaroiroi oki i te ngakau o tei tataraara.

16 Kare oki au e māro ua rai e tuatau ua atu, kare oki au e akamou ua atu rai i toku riri: ko te kore takiri aea te vaerua ki mua iaku, e te au vaerua i angaia e au ra.

17 No tana ra ara morimori apinga i riri ei au, e kua pāpā atura au iaia: kua uuna au iaku uaorai, e riri akera au; aere ua atura aia ma te ketaketa na te arataa o tona uaorai ngakau.

18 Kua kite au i tona au aerenga, e naku aia e akaora: e naku aia e arataki, e e akaoki atu au i te pumaana nona, e tona katoa ra aronga aue ra.

19 Naku i anga i ta te vaa e ua ra; ei au, ei au no tei te atea ke ra, e no tei vaitata mai, te tuatua mairā Iehova; e naku aia e akaora.

20 E tau ra te aronga kino ra ki te tai oripu ua nei; kare rava oki e akaea anga; na tona au ngaru oki e akapeke i te vari, e te repo.

21 Kare rava o te aronga kino ra e au, te tuatua maira taku Atua.