Isaia

40 E AKAPUMAANA kotou, e akapumaana kotou i toku ra au tangata, te tuatua maira to kotou Atua.

2 E tuatua maru atu kotou kia Ierusalema, e karanga atu kiaia, Kua ope tona tamaki anga e kua akakoreia tana ara: kua rauka oki iaia i te rima o Iehova te tutaki, kua papa rua te aite i tana ra au ara ravarai.

3 E reo o tetai i te tutu aere anga i te medebara; E akameitaki i te arataa o Iehova: e akatika ua i te medebara i tetai ara metua no to tatou Atua.

4 Kia ope te au o i te akakiia, e kia ope te au maunga e te au tuaivi i te taakaakaia: e akatika uaia te ara mingi, e te au ngai pukupuku ra e akariroia ei mea maniania ua.

5 E akakiteia mai te kakā o Iehova, ka okotai rai kitenga to te tangata ravarai: ko te vaa oki o Iehova tei tuatua mai.

6 Te na ko maira tetai reo, Ka kapiki. Kua karanga atura au, Eaa taku e kapiki? E ngangaere te tangata katoa nei, e tona manea, mei te tiare ïa o te kainga nei.

7 Te mae ua nei te ngaangaere, te maeaea nei te tiare, te arara maira oki te aʼo o Iehova ki rungao ra: e ngangaere tika rai te tangata nei.

8 Te mae nei te ngangaere, te maeaea nei te tiare: kareka te tuatua a to tatou Atua, e tu ïa e rimua.

9 E kake koe ki runga i te maunga teitei, e tei apai mai i te tuatua meitaki ki Ziona nei; ka akateitei na i toou reo ma te ririnui, e tei apai mai i te tuatua meitaki ki Ierusalema nei: ka akateitei na, auraka e mataku; ka karanga atu ki te au oire o Iuda, Ka akara na i to kotou Atua!

10 I na, e aere mai te Atu ra ko Iehova ma te mana, e na tona uaorai rima e akatupu i tana: i na, tei iaia uaorai tana tutaki, e tana angaanga ra tei mua ïa i tona aroaro.

11 E angai aia i tana anana mei te tiaki mamoe ra: e akaputu aia i te au punua i tona rima, e ei runga ratou i tona umauma kia apai, e e arataki marie aia i te au tinana akangote punua ra.

12 Koai tei aite i te moana i tona kapu-rima; e kua anga oki i te rangi i te angaonu; e kua akao oki i te one-pueu o te enua nei ki roto i te aite; e kua aite i te au maunga ra i te aite akateiaa ra, e te au tuaivi ra i te aite tautau?

13 Koai tei aite i te Vaerua o Iehova; mei te mea koia tona tumu korero i apii atu ei kiaia?

14 Koia koai ka akaaiteite ei i te tuatua, e naai aia i apii mai, e i akakite mai i te arataa tuatua-tau ra; e i akakite mai iaia i te pakari, e i akakite mai iaia i te arataa o te karape?

15 I na, e tau te pa enua nei mei te topata okotai no roto i te bakete, e kua manakoia mei te ungaungā one okotai kia rave aia ra.

16 Kare oki Lebanona e rava ei vaie; e to reira au puaka, kare e rava ei atinga karakaratio.

17 E tau te pa enua katoa mei te mea kare ra ki mua iaia; e iti ïa i tona manako i to te kore ua, e te puapinga kore.

18 Koai ta kotou e akaaite ki te Atua? Eaa ta kotou tu kia akatau kiaia?

19 Te akato nei te rave angaanga i te tiki, te vaî nei te taunga ki te auro, e te anga nei i te pirianganaoa ario.

20 Ko tei ngere i te atinga no te putaua, te iki ra ïa i te rakau pe kore; kua kimi iora i te taunga karape, e anga i tetai tiki akatikitikiia e kore e ngaueue.

21 Kare kotou i kite? kare rai kotou i akarongo? kare kotou i akakiteia mai mei te akamata anga mai? kare kotou i kite mei te akatumu anga mai o te enua nei?

22 Nana na tei noo ki rungao i te tua o te enua nei, e mei te kereteki ua te aronga e noo i reira ra iaia; ko tei totoa i te rangi mei te kakau paruru ra, e kua oora oki i te reira mei te puakapa ei nooanga;

23 Ko tei akariro i te ui ariki ei mea puapinga kore: ei mea tarevakaua te au akava o te enua nei iaia.

24 Kare oki ratou i tanu tikaia, kare i ruru tikaia, kare to ratou aka i toro tika ki raro i te one ra: e kare rai aia i pupui tika ki runga ia ratou ra, kua mae takere ratou: e kua riro ke atura ratou i te puaioio, mei te ota ra.

25 Koai ta kotou e akaaite mai kiaku nei? e aite au nei iaai? te tuatua maira Tei Tapu ra.

26 Ka nānā na i to kotou mata ki runga, ka akara: naai te reira i anga? te arataki ra aia i taua au nuku ra ki vao ma te tatauia: kua tapa anakeia to ratou au ingoa e ia; no tona ra ririnui, e te mana maata, i kore ei tetai i ngaro.

27 Eaa iora oki koe i tuatuaʼi, e Iakoba, e i na ko mai ei, e Iseraela e, Kua ngaro toku nei aerenga ia Iehova, e kua kopaeia taku nei tuatua e taku Atua?

28 Kare koe i kite? kare koe i akarongo? e mutu kore to te Atua ra, ko Iehova, ko tei anga i te enua e tae ua atu ki te openga ra; kare aia e paruparu, e kare oki e roiroi; kare oki tona kite e kitea me kimi.

29 Te oronga nei aia i te maroiroi no tei paruparu; e te akamaata nei aia i te maroiroi no tei apikepike.

30 E potopoto te aʼo o te aronga mapu, e mate oki i te roiroi, e te au tangata ou, e inga takiri roa ïa ki raro:

31 Ko te aronga ra e tapapa ia Iehova, e rauka ïa te maroiroi ou; e rere ratou ki runga i te peau mei to te au aeto ra; e oro ratou e kare e roiroi; e aere atu rai oki ratou, e kare ïa e potopoto te aʼo.