2 Korinetia

9 I TE tuatua i te uipa i te apinga na te aronga tapu ra, auraka atu au e tata atu i te tuatua kia kotou i te reira;

2 Kua kite oki au i te tika o to kotou ngakau, i akapaatu ei au ia kotou i to Makedonia ra, e kua teateamamao to Akaia mei tetai mataiti mairai; e manganui tei maroiroi katoa i taua maroiroi no kotou na.

3 Kua unga atura au i te au taeake, ko te riro aea ta matou akapaatu anga ia kotou i taua mea nei, ei mea puapinga kore; kia teateamamao rai kotou mei taku oki i tuatua akenei:

4 Ko te aere katoa atu to Makedonia nei kia aere atu au ra, ko te rokoia atu e kare kotou i vave, ko te akama aea oki matou (eiaa atu kotou) i taua akapaatu anga tikai nei.

5 I manako ei oki au e mea tika kia ako atu i te au taeake, e ei na mua rai ratou i te aere ia kotou, e akatika mamao ua i taua apinga oronga ua na kotou, i karangaia i muatangana, kia taka marie taua mea ra, ei mea oronga ua, auraka mei te mea umuumuia atu.

6 Teia ra taku tuatua, Ko te ruru ma te akaperepere ra, e kokoti ïa ma te mea ngiti; e ko te ruru ma te akaperepere kore ra, e kokoti ïa ma te maata,

7 E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.

8 E tika oki i te Atua kia akamaata rava atu i te au mea aroa katoa na kotou; kia kore kotou e tivata i te rave i te au angaanga memeitaki katoa ra, i te mea te rai ra te au mea katoa ra ia kotou: (Mei tei tataia ra e,

9 “Kua tua marie aia i tana apinga, kua oronga aia ki te aronga ao; e tika tana tuatua-tika i te vai marie anga.”

10 E teianei, ko tei tuku mai i te ua na te ruru ra, e te manga ei kai, kia tuku mai ïa e kia akamaata oki i ta kotou ua i ruruia ra, e kia akamaata oki i te uua anga o ta kotou tuatua-tika ra.)

11 Kia rai te au mea katoa nei ia kotou, no te au oronga anga katoa, ko tei akatupu ïa i te akameitaki i te Atua ia matou nei.

12 Kua akakiia oki te ngai toe i te aronga tapu, i te rave anga i taua angaanga uipa nei, kare ra ko te reira anake ra, kua maringi ua ra i te rai i te akameitaki i te Atua;

13 Te akameitaki ra ratou i te Atua, i to kotou kauraro marie anga i te evangelia o te Mesia i mouria e kotou na, e to kotou oronga ia ratou, e te tangata katoa oki, ko teianei angaanga uipa to kotou kite;

14 Ma te pure oki ratou ia kotou, e te anoano maata ia kotou no te rai o te aroa ua o te Atua i roto ia kotou na.

15 E teianei, kia akameitakiia te Atua i tona oronga kare e tika kia tuatua ra.