1 Korinetia

9 KARE aina au i te aposetolo? kare aina au i te tangata rangatira? kare aina au i kite i to tatou Atu ia Iesu Mesia? kare aina kotou te angaanga naku i te Atu nei?

2 Kare au i te aposetolo i etai ke ra, e aposetolo tikai au ia kotou: ko kotou oki te akairo i toku nei taoonga aposetolo i te Atu nei.

3 Teia taku tuatua ki te aronga e akaapa mai iaku nei,

4 Kare aina e tika ia matou kia kai e kia inu oki?

5 Kare aina e tika ia matou kia arataki aere i te tuaine vaine mou ra, mei tetai papaki aposetolo katoa ra, e mei te au taeake oki o te Atu ra, e mei ia Kepha?

6 E ko au anake aina e ko Banaba tei kore e tika kia kore e rave i te angaanga?

7 Koai ïa tangata e aere ki te tamaki, e tei iaia uaorai te kimi i tana? Koai ïa tangata e tanu i te kainga vine, e kare aia i kai i to taua kainga vine ra? koai oki ïa tangata i angai i te anana, e kare i kai i te u o taua anana ra?

8 Ko ta te tangata aina teia taku e tuatua nei? kare aina te ture i pera katoa mai?

9 Kua tataia oki ki roto i te ture a Mose ra e, “Auraka koe e topiri i te vaa o te puakatoro e takatakai i te sitona ra.” Ko te puakatoro anake ra aina ta te Atua e akono?

10 E no tatou tika aina i pera mai ei aia? No tatou tika ïa i tataiaʼi taua tuatua ra: kia arote te tangata e arote ra ma te tapapa e tikaʼi; e te tangata e pāpā sitona ra kia pera ma te tapapa e tikaʼi, e kia rave aia i tana i tapapa ra.

11 I ruru ana matou i ta te vaerua ia kotou na, e mea maata aina kia kokoti matou i ta kotou au mea no te kopapa nei?

12 Te rave na tetai papaki i taua mea tika ra ia kotou na, kare aina e tika maata rava ia matou? Kare akenei ra matou i rave i taua mea tika nei: te akakoromaki ua nei matou i te au mea katoa nei, kia kore te evangelia a te Mesia kia akateiaaia e matou nei.

13 Kare kotou i kite e ko te aronga i rave i te taoonga tapu ra, ko tei kai ïa i te manga o te iero ra? e ko te aronga i raverave i te atarau ra, ko tei kai i to te atarau?

14 Koia katoa te aronga i tutu i te evangelia nei, kua akonoia e te Atu kia ora ratou i te evangelia.

15 Kare akenei ra au i rave i taua au mea ra: kare oki au i tata i teianei au tuatua, kia peraia mai au: e mea meitaki maata iaku te mate, kia akariro tetai tangata i taku nei paapaa anga ei mea puapinga kore.

16 Tuatua ua rai au i te evangelia, kare oku e akatietie anga: kare oki au e tika kia kore: e ae oki toku kia kore au e tutu i te evangelia!

17 Te rave nei au i taua mea nei ma te ngakau tae, e tutaki ïa taku: i tukuia maira iaku te taoonga i te evangelia nei, kare i tae toku ngakau, kare aku tutaki.

18 Eaa ra oki taku tutaki? teia ïa, kia tuatua au i te evangelia a te Mesia nei, auraka ei oko, auraka au e rave i taua mea tika iaku i te evangelia nei.

19 E tangata rangatira ua rai oki au i te tangata ravarai nei, kua akariro au iaku uaorai ei tavini no te tangata katoa, kia maata taku kia rauka.

20 I te ngati Iuda ra, kua akangati Iuda katoa au, kia rauka iaku te ngati Iuda; i te aronga i raro ake i te ture ra, mei te mea e tei raro katoa ake au i te ture, kia rauka iaku taua aronga i raro ake i te ture ra;

21 I te aronga ture kore ra, mei te mea e kare aku ture, (kare ra mei te mea kare aku e ture i te Atua, tei raro ake ra au i te ture i te Mesia,) kia rauka iaku te aronga ture kore ra.

22 I te aronga apikepike ra, kua riro katoa au ei apikepike, kia rauka iaku te aronga apikepike: kua akaarite au iaku uaorai i te au mea katoa i te tangata ravarai nei, kia ora iaku tetai papaki i taua au ravenga katoa nei.

23 No te evangelia i peraʼi au, kia rauka katoa iaku i ta te evangelia ra.

24 Kare ra kotou i kite e ko te aronga e oro i te taemoemo anga ra, e oro katoatoa ïa, okotai ua ra e rave i te korona: E akaarite i to kotou taemoemo anga, kia rauka te korona.

25 E te tangata ravarai e manono kia riro iaia te re ra, e akono ïa i tei tau i te au mea katoa nei. Kia rauka te korona pe ua i peraʼi ratou; kareka tatou kia rauka ïa te korona pe kore.

26 E teianei te oro nei au, kare ra mei te mea kare i kitea; te moto nei au, kare ra mei te mea e, e moto ki te matangi:

27 Te moto nei ra au i taku kopapa kia vi: ko te riro ua aea oki au, ko tei ako ia etai ke ra, ei tangata kite koreia mai.