2 Timoteo

4 E TEIANEI te ako ua atu nei au ia koe ki mua i te aroaro o te Atua, e to te Atu ra ia Iesu Mesia, ko te akava i te ora ra, e i tei mate, kia mama mai aia kia tae ki tona basileia;

2 E akakite ua koe i te tuatua; kia tamou marie rai, i te atianga tau, e te atianga tau kore; e akakite ua i te apa, e ako atu, e akamaroiroi atu, ma te akakoromaki maata e te apii marie anga atu. 3 Te vai atura oki te tuatau e kore ei ratou e āriki i te tuatua-mou; no te navenave o to ratou taringa e akaputu ei ratou i te orometua e tau i to ratou uaorai inangaro;

4 E ariu ke oki to ratou taringa i te tuatua-mou, e anga atu ei ki te tuatua taeke ua. 5 E akamaroiroi ra koe i te au mea katoa ra, e akakoromaki rai i te kino, e rave i te angaanga a te apii evangelia, e rave akaope takiri i to taoonga na.

6 Teia oki toku toto ka taʼe, teia oki au ka riro ke.

7 I kukumi ana au i te kukumianga meitaki, kua oti toku oro anga, i mou marie na au i te akarongo:

8 E teianei te vaioia nei te korona o te tuatua-tika noku, ta te Atu, ta te akava tuatua-tika ra, e oronga mai noku kia tae ki taua rā ra; e kare ra oki ko toku anake ra, ko to te aronga katoa ra i inangaro i taua mama anga mai nona ra.

9 Kia rapurapu koe, kia tae vave mai kiaku nei:

10 Kua akaruke mai oki a Dema iaku, kua anoano maata ki teianei ao, e kua riro ki Tesalonia; kua riro a Kereseke ki Galatia, e ko Tito oki tei Dalamatia ïa.

11 Ko Luka anake ra tei iaku nei. Arataki katoa mai koe ia Mareko; e meitaki oki au iaia i te angaanga i te taoonga nei.

12 Kua tono atu au ia Tukiko i Ephesia na.

13 Te kakau pu taku i vaio i Teroa ia Karepo ra, apai katoa mai kia aere mai koe ra, e te au buka, kia maata atura te au pepa kiri ra.

14 E takinga-kino maata to Alekanedero tupaki veo iaku: na te Atu ïa e akautunga mai iaia i tei tau i tana angaanga:

15 E matakite katoa koe iaia; e patoi maata tona ki ta tatou tuatua.

16 I taua akatika anga naku iaku uaorai i muatangana ra, kare takiri e tangata i tauturu mai iaku nei, akaruke anake atura ïa, eiaa ra te reira kia uriia atu ia ratou ra ei ara.

17 Kua tauturu maira te Atu iaku, kua akamaroiroi maira; kia kitea ravaia te tuatua i ako aereia nei e au, e kia akarongo te au etene katoa; akaoraia iora au i te vaa o taua liona ra.

18 E na te Atu rai e akaora iaku i te au kino katoa ra, e tiaki mai iaku e tae ua atu ki tona basileia i te ao ra: ei iaia te kakā e tuatatau ua atu. Amene.

19 E aroa atu ia Periseka, raua ko Akuila, e te ngutuare o Onesiphoro ra.

20 Kua noo a Eraseto i Korinetia, kareka ko Terophimo kua vaioia e au i Mileto, kua mate i te maki.

21 Kia rapurapu mai oki koe, ko te rokoia i te paroro. Te aroa atu nei ko Eubulo ia koe, e ko Pude, e ko Lino, e ko Kalaudia, e te au taeake katoa nei oki.

22 Ei vaitata katoa te Atu ra ko Iesu Mesia i to vaerua ra. Ei ia kotou katoa na te aroa ua. Amene.