Roma

11 E TEIANEI, teia taku tuatua, Kua akaruke aina te Atua i tona iti-tangata? Kare rava ïa. E ngati Iseraela katoa oki au, no te uanga o Aberahama, no te kopu o Beniamina.

2 Kare rai te Atua i akaruke i tona iti-tangata tana i kite mamao ana. Kare kotou i kite i ta te tuatua i tataia ra i tuatua mai kia Elia? ka karangaʼi aia ki te Atua ia Iseraela ra, ka na ko atu ei ra e,

3 “E Iehova, kua ta akenei ratou i te au peroveta naau ra, kua uri i taau au atarau ki raro; e ko au anake nei tei toe, e te kimi mai nei ratou iaku nei kia mate.”

4 Te peea maira ra ta te Atua tuatua anga mai kiaia? “E vaoo iora au i e itu tausani tangata noku uaorai, ko tei kore i tuku i te turi ki raro kia Baala.”

5 Koia katoa oki i teianei, te vai ua nei tetai toenga no te iki anga a te aroa ua ra.

6 E no te aroa ua ra, kare atura ïa i to te angaanga: no reira ra, kare atura te aroa ua i te aroa ua i reira. E no te angaanga ra, kare atura ïa i to te aroa ua: no reira ra, kare atura te angaanga i te angaanga i reira.

7 Eaa oki taua tuatua nei? Kare rai i rauka ia Iseraela tana i kimi ra: kua rauka ra i tei ikiia ra, e kua akamatapoia tetai papaki,

8 (Koia oki tei tataia ra e “Kua tuku mai te Atu i te vaerua moe maata kia ratou, te mata akara kore, e te taringa akarongo kore;”) e tae rava akenei i teianei rā.

9 Kua karanga oki a Davida, “Kia riro ta ratou kaingakai ra ei ereere, e ei kupenga,” ei turorianga, e ei utunga oki na ratou.

10 “Kia avarevare to ratou mata, kia kore e tika kia akara, kia piko oki to ratou tua ki raro eiaa e tukumoe.”

11 E ui ana ra au, Kua turori aina ratou kia inga takiri rava? Auraka rava ïa: kua tae ra te ora ki te etene i taua turori no ratou ra, ei akakoko anga atu ia ratou kia vareae.

12 E teianei, ko taua turori no ratou ra ta to te ao nei ïa puapinga, e to ratou ngere anga to te etene puapinga, ka tangaʼi oki i to ratou maata anga!

13 Ko kotou ko te etene taku e karanga atu nei, te akameitaki nei au i taku taoonga, no te mea ko au te aposetolo a te etene;

14 Peneiake ko te akakoko au i toku ra papaki tangata, kia taemoemo ratou, e kia ora tetai papaki iaku.

15 To ratou akaruke angaia ra, ko te ongi ïa o to te ao, ka tangaʼi oki i te āriki akaou anga ia ratou, kare aina e riro mei te ora no te mate mai?

16 Te tapu ra te popo ra, koia katoa te maata: e te tapu ra te tumu ra, koia katoa te au rara.

17 E i aati keia tetai papaki i taau au rara ra, e ko koe oki ko te rara olive ngangaere ra, ko tei paʼuia ïa ki roto ia ratou ra, e tei ia koe katoa oki te meitaki e te inu o taua olive ra;

18 Auraka koe e akatietie ki runga i te au rara ra: kia akatietie oki koe ra, e akamaara, kare koe tei mou i te tumu, ko te tumu ra tei mou ia koe.

19 E tuatua mai aina koe, I aati keia te au rara kia paʼuia au ki roto.

20 Kua tika ïa: no te akarongo kore i aati keiaʼi ratou, e mou akarongo oki toou. Auraka ei ngakau teitei, ei mataku ra:

21 Kare te Atua i akaperepere i te au rara tikai, kia matakite, ko te kore katoa aea e akaperepere ia koe.

22 E teianei, ka akara na i te takinga-meitaki e te akaperepere kore a te Atua: te akaperepere kore i te aronga i inga ra; kareka ia koe na, ko te takinga-meitaki ïa, kia akono tamou koe i tona takinga-meitaki; kare ra, ka kokoti ke katoaia koe.

23 E ko ratou katoa oki, kia kore ratou e tamou māro i te akarongo kore ra, ka paʼuia mai ïa ki roto: ka tika oki i te Atua kia paʼu akaou ia ratou ki roto.

24 I kokoti keia mai koe no runga i te olive ngangaere ra, e i paʼu keia mai koe ki roto i te olive meitaki: ka tangaʼi oki ia ratou i te rara tikai, e paʼuia mai ïa ki roto i to ratou uaorai olive!

25 Kare au i anoano, e aku au taeake, e kia kore kotou e kite i teianei tuatua ngaro, (ko te pakari aea kotou i to kotou uaorai manako anga,) e kua rokoia Iseraela i te matapo pae tai, e kia o katoa mai te maata katoa o te etene ra.

26 E ora katoatoa atura Iseraela: koia oki tei tataia ra, “Ka tae mai te Akaora mei roto mai ia Ziona, e ka akakore aia i te kino ia Iakoba.”

27 E ko “teia taku koreromotu ia ratou, kia apai ke atu au i ta ratou ra ara.”

28 I te akonoanga i te evangelia nei, kua riro ia ratou ei enemi ia kotou: kareka i te ikianga ra te akaperepereia nei ïa ratou, no to ratou aronga metua ra.

29 Ko ta te Atua oki i oronga ua e tana kapiki anga ra, kare ïa e akakore anga.

30 Mei ia kotou oki kare i akarongo i te Atua i muatangana, e teianei ra, kua aroaia mai kotou i to ratou akarongo kore ra:

31 Koia katoa oki ratou, kua kore akenei e akarongo i teianei, ko kotou i aroaia mai, kia aroa katoaia mai ratou.

32 E akarongo kore anake oki ratou ravarai i ta te Atua tuatua anga, kia aroa mai aia ia ratou katoa.

33 Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e!

34 “Koai oki tei kite i te ngakau o te Atu? e koai ïa tana tumu korero?”

35 Koai oki tei oronga atu i tetai apinga nana, ka o maiia ïa te tutaki kiaia?

36 Nona mai oki, e nana, e nona te au mea katoatoa nei: ei iaia te kakā mutu kore. Amene.