Mareko

1 KO te akamataanga o te evangelia o te Tamaiti a te Atua, ko Iesu Mesia:

2 Tei tataia ki roto i ta te au peroveta ra, “I na, e tono au i taku karere na mua ia koe, e nana e akameitaki i toou ara;”

3 “E reo no tetai i te tutu aere anga i te medebara, Ka akameitaki i te arataa o te Atu, e akatika ua i tona aerenga.”

4 I perā Ioane i te bapetizo aere anga i te medebara, e te tuatua aere anga i te bapetizo tataraara, kia matara te ara.

5 Kua akaope maira to te enua ra to Iudea, e to Ierusalema, iaia ra, e bapetizo katoatoaia iora e ia i te vai i Ioridana, ma te aaki i ta ratou ara.

6 E uruuru kamela to Ioane kakau, i tatuaia tona taukupu i te kiri puaka; e tāpaki e te meli ngangaere tana kai:

7 E tutu aere atura aia, na ko atura, Te aere mai nei tetai i muringao iaku, e maata tona mana i toku, kare oki au e tau kia tupou ki raro e tatara i te itiki tamaka nona ra.

8 I bapetizo ana oki au ia kotou i te vai: kareka aia, e bapetizo aia ia kotou ki te Vaerua Tapu.

9 I reira to Iesu aere anga mai mei Nazareta mai i Galilea ra, e bapetizoia iora e Ioane i Ioridana.

10 E tei te kake anga mai aia mei raro i te vai; kite akera aia i te rangi i te vetenga angaia, e te Vaerua i te eke anga mai ki rungao iaia mei te kukupa ra.

11 E kua kitea maira oki tetai reo no te rangi mai, i te na ko anga mai, Ko taku Tamaiti akaperepere koe, kua mareka rava au ia koe.

12 Aratakiia atura aia i reira ra e te Vaerua i te medebara.

13 E i reira aia i taua medebara ra, i te timata angaia mai e Satani, e a akera ngauru anga o te rā; e i rotopu aia i te au puaka taae; e kua matuapuru maira oki te au angela iaia.

14 E kia tapekaia rā Ioane, aere aturā Iesu ki Galilea, i te tuatua aere anga i te evangelia o te basileia o te Atua ra,

15 Na ko atura, Kua tae ki te tuatau, kua vaitata mai nei te basileia o te Atua; e tataraara kotou, e ka akarongo i te evangelia nei.

16 E te aere ra aia na te pae roto i Galilea ra, kite atura aia ia Simona e tona taeake ko Anederea i te tuku anga i te kupenga i taua roto ra; (e puke ravakai oki raua.)

17 Kua karanga aturā Iesu kia raua, Ka aru mai korua iaku, e akariro au ia korua ei ravakai tangata.

18 Akaruke iora raua i ta raua puke kupenga i reira, e kua aru maira iaia.

19 E te aere atura aia i tetai ngai itio, kite atura ia Iakobo a Zebedaio ra, e tona taeake ko Ioane, tei runga raua i te boti, te ono ra i ta raua puke kupenga.

20 Kua karanga atura aia ia raua i reira; vaio atura raua i to raua metua ko Zebedaio ki runga i te boti e nga tavini ouia ra, aru atura ia Iesu.

21 Aere atura ratou i Kaperenauma; e tae akera ki te sabati, aere atura aia ki roto i te sunago, apii atura i te tangata.

22 Va ua atura ratou i te tu o tana tuatua; i apii oki aia ma te mana, kare mei ta te au tata tuatua ra.

23 Tei roto oki i to ratou sunago tetai tangata, e vaerua viivii tona; kua kapiki ua maira, Na ko maira,

24 Aue, e Iesu o Nazereta e! Eaa taau ia matou nei? i aere mai aina koe e tamate ia matou? Kua kite au ia koe, ko te Mea Tapu a te Atua ra.

25 Kua kauvae aturā Iesu kiaia, na ko atura, Ka muteki, ka aere ki vao, vaio atu iaia.

26 Kua rave nui iora taua vaerua viivii ra iaia, kapiki ua maira te reo, e oti akera, kua aere maira ki vao.

27 Umere anake iora ratou, e kua eumiumi iora ratou ratou uaorai, na ko akera, Eaa ua teia? eaa oki teianei tuatua ou? te akaue nei aia i te au demoni viivii nei ma te mana, e te akarongo nei ratou iaia.

28 E tutuki atura tona rongo, e pini rava akera taua enua ra ko Galilea, kare i roaia.

29 E tae maira ratou ki vao i taua sunago ra, aere aturā Iakobo raua ko Ioane, e ko ratou ravarai oki, ki roto i te are o Simona raua ko Anederea.

30 Te akāvai ua ra te metua ongoai vaine no Simona ra, kua mate i te vera; kua akakite maira ratou iaia kia Iesu i reira ra.

31 Aere atura aia, rave atura i tona rima, akatu akera iaia ki runga; peke atura te vera i reira, kua matuapuru maira aia ia ratou.

32 E aiai atura, kia topa te rā ra, kua apai maira ratou i te au tangata maki ravarai kiaia, e te aronga i uruia e te au demoni ra.

33 Kua uipa katoa maira to te oire ravarai i te ngutupa.

34 Kua akaora iora aia i te tangata e manganui i tei mate i te au maki katoa, e kua tuaru i te au demoni e manganui ki vao; e kare e tika iaia kia tuatua mai taua au demoni ra; kua kite oki ratou iaia.

35 E popongi akera, tu akera aia ki runga i te akirata, aere atura aia ki tetai ngai motutaa, e kua pure iora aia i reira.

36 Kua aru aturā Simona ma i murio iaia.

37 E kite atura ratou iaia, na ko atura, Te kimi nei te tangata tini ravarai ia koe.

38 Kua tuatua maira aia kia ratou, Ka taki aere tatou i te au oire i vaitata nei, kia apii katoa atu au i to reira; ko toku ia tere i aere mai ei au nei.

39 Kua ako atura aia i roto i to ratou au sunago ravarai i Galilea ra, e kua tuaru oki i te au demoni ki vao.

40 Kua aere maira tetai lepera ra iaia, kua tuturi maira ki muao iaia, kua tuatua meitaki maira kiaia, na ko maira, Kia tika ia koe, e mā au ia koe.

41 Aroa akerā Iesu iaia, akatika atura i te rima, e akatukia atura iaia, na ko atura, Kua tika ïa iaku; kia mā koe.

42 E tei te pera anga atu aia ra, peke atura te lepera nona i reira ra, mā atura aia.

43 Kua ako ua atura aia iaia, tuku atura iaia kia aere:

44 Na ko atura kiaia, Aua koe e tuatua ua ake ki tetai tangata; e aere ra, e akakite ki te taunga ia koe uaorai, e taoi atu no to tamā anga ta Mose i tuatua maira, ei akakite anga atu kia ratou.

45 Aere atura aia ra, e akakite aere i taua tuatua ra, e varia iora, kare atura e tika kia aere akakite ua aia i taua oire ra, noo ua iora i te au ngai motutaa ra; e kua aere maira oki ratou kiaia no te au ngai ravarai.