2 Petero

3 E AKU au akaperepere e, te tata atu nei au i te rua o te episetole ia kotou i teianei; ei akaaraara atu i to kotou ngakau pikikaa kore kia manako:

2 Kia maara oki kotou i te tuatua i tuatuaia mai e te au peroveta tapu i muatangana, e te apiiia atu e matou e te au aposetolo a te Atu ra a te Ora:

3 Kia kite ra kotou i teia e, kia tae ki te au rā openga ra, e kitea mai ei e aronga taitoito, i te akono anga i ta ratou uaorai anoano,

4 E te tuatua anga mai e, Teiea ua te aerenga mai nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.

5 Kua inangaro oki ratou i te akangaro i teia e, na te tuatua a te Atua tei anga i te rangi i taito ra, e te enua i vai ki raro i te tai e tei aranga ki runga i te tai:

6 I mate ei te reira enua i te tapoki angaia e te tai:

7 Kareka te rangi e te enua e vai nei, te tāpuia nei ïa e taua tuatua ra no te ai, kia tae ki te rā akavaanga, e te mate o te aronga akono kore i te Atua ra.

8 Auraka na ra e ngaro ia kotou i teianei potonga tuatua, e aku au akaperepere, okotai rai tu i te Atu te rā tai e te mataiti okotai tausani; e te mataiti okotai tausani ra, okotai rai tu e te rā okotai nei.

9 Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.

10 E tae maira te rā o te Atu mei te keia i te po ra: ka peke ke atu oki teianei rangi ma te paku maata, e taravai te au tumu o te enua i te veravera maata, e te enua oki e te angaanga tini ravarai ki runga, ka pou ïa i te ai.

11 E teianei ka pou anake taua au mea katoa nei, mei te aa ra to kotou tu e tikaʼi i te tuatua tapu e te akono i te Atua;

12 I te tatari anga, e te rapurapu anga atu, kia tae mai taua rā o te Atua ra, te rā e ngaro ei te rangi i te tutungiia i te ai, e e taravai ei te au tumu o te enua i te veravera maata?

13 Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika ra.

14 E teianei, e aku au akaperepere e, ko te reira au mea ta kotou e tatari ana, ka akamaroiroi, kia rokoia mai kotou e ia ma te au, ma te topata kore, e te apa kore.

15 E e karanga kotou i te akakoromaki maata o to tatou Atu ra, ko te ora ïa; mei ta to tatou taeake akaperepere ra mei ta Paulo i tata mai ia kotou na, i te pakari i orongaia mai kiaia ra: 16 E tei roto katoa i tana ra au episetole katoa, i te tuatua anga mai i teianei au mea: e e mea kimingata oki tai papaki, ta te aronga apii koreia ra, e te tinamou kore, i ruri ke, mei ta ratou i ruri ke i te au tuatua ravarai i tataia ra, e riro atura oki ei mate no ratou uaorai.

17 E tenana, e aku au akaperepere e, kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra, e inga iora kotou i to kotou maroiroi anga na.

18 Kia tupu ra te aroa ua ia kotou, e te kite i to tatou Atu ra, i te Ora, ia Iesu Mesia. Ei iaia te kakā i teianei e e tuatatau ua atu. Amene.