Luka

12 TE uipa maira te tangata e manomano tini kore, takatakai ua iora i runga ia ratou uaorai, kua na mua atura aia i te tuatua ki tana au pipi, E matakite i te akaopue a te au Pharisea, e pikikaa te reira.

2 Kare oki e mea tapokiia e toe i te akakiteia; kare e mea ngaro e toe i te kitea.

3 Ko tei tuatuaia e kotou i te poiri ra, e akakiteia ïa i te mārama; e tei koumuumuia e kotou ki roto i te taringa i roto i te pia ra, e kapiki uaia ïa ki rungao i te are.

4 E te karanga atu nei au kia kotou, e taku au oa, Auraka e mataku i te aronga e ta mai i te kopapa nei, e oti akera, kare atu ta ratou e rauka.

5 E akakite atura au kia kotou i ta kotou e mataku: Ko tei mate te kopapa iaia, e muri akera, e tika iaia kia uri atu ki te po ra, e mataku kotou iaia; koia ïa, ko taku ïa tuatua kia kotou, Koia ta kotou e mataku.

6 Kare aina taki rima manu rikiriki i okoia i nga asario e rua nei? e kare rai tetai i ngaro i te Atua.

7 E kua ope oki te rauru o to kotou mimiti na i te tatauia. Auraka mari kotou e mataku: e maata to kotou meitaki i to te au manu rikiriki e manganui.

8 Teia rai taku tuatua kia kotou, Ko te aaki iaku ki mua i te aroaro o te tangata nei, e aaki katoa te Tamaiti a te tangata iaia i mua i te aroaro o te au angela no te Atua.

9 Kareka te uuna iaku i mua i te aroaro o te tangata nei, ko te ka uuna katoaia i mua i te aroaro o te au angela o te Atua ra.

10 Ko tei tuatua akakino i te Tamaiti a te tangata nei, e tika kia akakore i tana ara; kareka tei akakino i te Vaerua Tapu, kare rava te reira e akakoreia.

11 E kia aratakiia kotou ki te au sunago e ki mua i te aroaro o te au akava ra, e te au tutara, auraka e taitaia i te tu o ta kotou ei akatika anga atu, e te tu o ta kotou ka karanga atu:

12 Na te Vaerua Tapu e apii mai ia kotou i tei tau kia karanga atu i reira.

13 Kua tuatua maira tetai no taua aronga maata ra kiaia, E te Orometua, e tuatua ake ana koe ki taku tuakana, e tua aia i to maua apinga.

14 Kua karanga atura aia kiaia, E tama, naai au i akariro ei akava e ei tua apinga i o kotou nei?

15 Kua karanga atu rai aia kia ratou, E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.

16 Kua akakite atura aia i teianei parabole, na ko atura, E kainga ua maata to tetai tangata apinga nui:

17 Kua na ko iora aia, i te akaeatu anga ki roto iaia uaorai, Eaa ra au, kare oki aku vairanga e o mai ei toku apinga?

18 Kua na ko akera aia, E akapera au: e vavaʼi au i toku au are kai nei e akatu atu ei ei are mamaata; ei reira akaputuputu ei au i taku kai ravarai e toku apinga:

19 Ka karanga atu ei ki toku vaerua, E taku vaerua e, e apinga maata toou, kua uipa ïa ki te vairanga no te au mataiti e manganui; e akaangaroi marie, e kaikai, e inu, e kia rekareka marie.

20 Kua tuatua maira ra te Atua kiaia, E tera ra neneva e! ei teianei rai po e tiki naia mai ei toou vaerua: noai iora tenana au apinga taau i akaputu na?

21 Ko te tu ïa o te tangata i akaputuputu i te apinga nona uaorai, kare i maata tona apinga i te Atua ra.

22 Kua karanga atura oki aia ki tana au pipi, I ako atu ei au kia kotou i teianei, Auraka e apiapi i to kotou ora, i ta kotou e kai; e te kakau no to kotou kopapa.

23 E maata te ora i te kai, e te kopapa i te kakau.

24 E akamaara i te au kotaa; kare ratou e ruru, kare oki e kokoti; kare ua e are apinga, kare e are kai; i angaiia ra ratou e te Atua. Kare aina e meitaki maata to kotou i to te au manu ra?

25 Koai oki to kotou, e tika kia akaroa atu i tona tu, kia apiapi aia, e okotai ake kubiti?

26 Kare na e tika ia kotou te mea ngiti ua ake, eaa oki kotou i eumiumi atu ei i tetai pae?

27 E akamaara i te au lili, te peea nei to ratou tupu; kare ratou i angaanga, kare oki i iro; e karanga atura au kia kotou, E tae ua atu ki te manea ope o Solomona, kare rai tona manea i arite ki tetai o ratou nei.

28 I pera oki te Atua i te akamanea anga i te rakau rikiriki, akonei te vai ra i roto i te koro, e apopo kua uriia ki roto i te umu; ka tanga atu ei oki ia kotou, e kotou, te aronga akarongo mea ngiti nei!

29 Auraka kotou e ui ua e, i ta kotou e kai, e ta kotou e inu; auraka oki e noo ma te apiapi.

30 Ko ta te au etene oki ïa o teianei ao e kimi nei, ko taua au mea katoa ra; kua kite na to kotou Metua e, kia rauka taua au mea ra ia kotou e tikaʼi.

31 E kimi ra kotou i te basileia o te Atua, e kapiti katoaia mai taua au mea katoa ra ia kotou.

32 Auraka e mataku, e taku anana iti; e mea anoano na to kotou Metua, i te oronga mai i te basileia no kotou.

33 E oko i to kotou apinga ka oronga atu ei; ei pute piro kore ta kotou uaorai, ei apinga kare e pou ki runga i te rangi, i te ngai e kore e taea e te keia, e kare e pou i te uu.

34 Te ngai oki i vaioiaʼi to kotou na apinga, ka riro katoa i reira to kotou ngakau.

35 Kia tatuaia to kotou taukupu, e kia vai kakā ua ta kotou mori;

36 E kia tau kotou uaorai ki te aronga e tatari i to ratou pu, i te oki anga mai mei te akaipoipoanga; e kia tae mai aia e topāpā maira, kia eeu ratou i te pa kiaia i reira.

37 E ao to te reira au tavini, i te oki mai anga o to ratou pu, te tapapa ra; tikai taku e karanga atu kia kotou na, ka tatua aia i tona taukupu, ka tuku atu ei ia ratou ki te kaingakai ra, e ka raverave atu ei i te kai na ratou.

38 E kia tae mai aia i te rua o te araanga, e i te toru o te araanga, ka rokoia mai ei te pera ra, e ao to te reira au tavini.

39 Kua kite oki kotou, naringa i kite ana te tangata are i te ora e tae mai ei te keia, e ara aia, kare e oronga ua atu i tona are kia vavaʼi uaia na.

40 E teianei kia vai teateamamao rai kotou, no te mea, ei te ora manako koreia e kotou na, e tae mai ei te Tamaiti a te tangata.

41 Kua tuatua mairā Petero kiaia, E te Atu, i tuatua mai aina koe i tenana parabole kia matou anake nei, e ki te tangata katoatoa aina?

42 Kua karanga atura te Atu, Koai te akaaere pikikaa kore e te pakari, i ta te pu e tuku i rungao i tona katoa au tavini, ei tua i ta ratou tuanga kai i te ora mou ra?

43 E ao to te reira tavini, to tei rokoia mai e tona pu, te pera ra.

44 Koia mou taku e karanga atu kia kotou nei, e akariroia aia e ia ei tiaki i te apinga tini ravarai nona.

45 Me tuatua ra te reira tavini i roto i tona uaorai ngakau e. Kare taku pu e tae vave mai; kua akamata atura i te pāpā i te au tavini tane, e te au tavini vaine, e kai iora i te kai, e inu akakona iora i te kava;

46 Kia tae ki te rā manako koreia e ia, e te ora kitea koreia e ia ra, e tae mai ei te pu o taua tavini ra e akataka ke atu ei iaia, ka tuku atu ei i tana tuanga i roto i te aronga akarongo kore katoa ra.

47 E te tavini i kite i te anoano o tona pu, e kare rai i akateateamamao, e kare oki i rave i ta te pu i inangaro ra, e pāpāia ïa, e manganui te pāpāanga.

48 Kareka tei kore i kite ra, rave atura ra i te mea e tau i te pāpā, e pāpā iti ïa tona. Ko te tukuia atu te mea maata ra, e mea maata katoa te umuumuia atu; e ta te tangata oki i tuku atu i te mea maata ra, e mea maata katoa ïa te patiia atu iaia ra.

49 I aere mai au e apai mai i te ai i te ao nei; eaa toku nei inangaro, mari ra kua ka i teianei?

50 E bapetizoanga ra toku e bapetizoiaʼi au nei, e kare rai toku mamae kia oti!

51 Te manako na aina kotou i aere mai au e akatupu i te au i te enua nei? te karanga atu nei au ia kotou, Kare; e maveteanga ra:

52 E teianei kua mavete nga tangata toko rima i te kopu-tangata okotai ra; ko e toko toru ra e tamaki tika mai ki e toko rua, ko e toko rua oki e tamaki mai ki e toko toru:

53 E tamaki te metua tane ki te tamaiti, e te tamaiti ki te metua tane; e tamaki te metua vaine ki te tamaine, e te tamaine ki te metua vaine; e tamaki te metua ongoai vaine ki te unonga vaine, e te unonga vaine ki te metua ongoai vaine.

54 Kua karanga katoa atura aia ki te tangata tini, Kia akara kotou i te tumurangi i te tupu anga i te opunga o te rā, kua na ko iora kotou, Tena ka ua: e koia tika rai.

55 E kia arara mai te matangi e marangai, kua tuatua iora kotou, Ka riro i te pukakā: e riro atura oki i reira.

56 E tera ra aronga pikikaa e! te kite na kotou i te akara i te rangi e te enua nei; eaa i kore ei kotou i kite i teianei tuatau?

57 Eaa oki kotou uaorai na i kore ei i akara i tei tika?

58 Kia aere korua ko taau tangata ou ki te akava ra, aua koe e tavare i te akamareka atu i to korua aerenga ra; ko te kave aea aia ia koe ki te akava ra, ko te tuku atu oki aea te akava ia koe ki te tangata taoonga ra, e ko te uri aea te tangata taoonga ia koe ki roto i te are tapekaanga.

59 E akakite atu au kia koe, Kare rava koe e tukuia mai e ope ua atu i te oko na ia koe, e tae ua atu ki te lepeta openga ra.