Te Au Akava

16 AERE aturā Samasona ki Gaza, kite atura i tetai vaine akaturi i reira: e kua aere atura kiaia ra.

2 E akakiteia atura to Gaza, karanga atura, Teia mai nei a Samasona. E kua akapini akera ratou iaia, e moetapapa atura iaia i taua po e ao ua akera i vaitata i te ngutupa o te oire, kare i mu e ao ua akera, tuatua akera e, Tei te ao anga ra ka ta ai tatou iaia. 3 Moe iorā Samasona e turuaipo akera; kua tu akera aia ki runga i taua turuaipo ra, kua rave iora i nga pa i te ngutupa o te oire ma nga pou katoa e rua, kiriti akera ïa i te reira ma te tea katoa, kua tuku akera ki runga i ona pakuivi, apai rava atura ki runga i te take maunga i vaitata i Heberona. 4 E i muri ake i te reira kua inangaro aia i tetai vaine i te o ra i Soreka, ko Delila tona ingoa.

5 Kua aere maira te ui tutara o te Philiseti ki runga kiaia, e kua tuatua maira kiaia, E akanauru ake ana koe iaia, kia kite koe i te vairanga o tona ririnui, e te mea e raukaʼi aia ia matou, kia ruru atu matou iaia, kia vi aia: e na matou e oronga atu i te au ario naau, e tataki tai tausani e okotai oki anere ia matou roarai.

6 Kua karanga aturā Delila kia Samasona, Teia taku tuatua kia koe, e akakite mai kiaku i te vairanga o toou ririnui, e te mea e mou ei koe kia ruru e vi ei koe.

7 Kua tuatua mairā Samasona kiaia, Kia ruru ratou iaku i nga kiekie mata e itu kare rai i marō, ka riro au mei te tangata katoa ra i te paruparu i reira.

8 Kua apai maira taua au tutara o te Philiseti i te kiekie mata e itu ki runga kiaia ra, kare rai i marō, e kua ruru iora aia iaia i te reira.

9 Te moetapapa ua ra te tangata tei roto katoa i te pia o taua vaine ra, kua karanga atura aia kiaia, E Samasona, teiao te Philiseti e rave ia koe na. E motu uaorai taua kiekie ra iaia, mei te ao iti vavai e motu kia tukia i te ai ra. Kare atura tona riri i kitea. 10 Kua karanga aturā Delila kia Samasona, I na, kua vare au ia koe, e tuatua pikikaa taau i tuatua mai kiaku; e tenana, teia taku tuatua kia koe, e akakite mai koe kiaku i te mea e mou ei koe kia ruru ra.

11 Kua tuatua maira aia kiaia, Kia ruru ratou iaku ki nga taura ou kare rai i raveia ra, ka riro au mei te tangata katoa ra i te paruparu i reira.

12 Kua rave iorā Delila i nga taura ou, e kua ruru iora iaia i te reira; te moetapapa ua ra te tangata i roto i te pia, kua karanga atura aia kiaia, E Samasona, teiao te Philiseti e rave ia koe na. E kua motu uaorai aua nga taura i runga i nga rima nona, mei te ao tui kakau ra. 13 Kua karanga aturā Delila ki Samasona, Te vare ua nei rai au ia koe, e tuatua pikikaa taau i tuatua mai kiaku nei: e akakite mai koe kiaku i te mea e mou ei koe ra. Kua tuatua maira aia kiaia, Kia raranga katoa koe i nga makave rauru e itu o toku mimiti nei ki roto i tenana kakau.

14 E kua tākai iora aia ki runga i taua titi ra, e kua karanga atura kiaia, E Samasona, teiao te Philiseti e rave ia koe na. Kua ara akera aia i taua moe nana ra, aere ua atura ma te titi o te raranga anga ra, e te kakau katoa ra.

15 Kua karanga atura aia kiaia, Eaa koe i tuatua mai ei e, E inangaro toku ia koe, e kare oki to ngakau iaku nei? ka toru akenei aau pikikaa anga mai iaku, e kare rai koe i akakite mai kiaku i te vairanga o toou na ririnui.

16 E no te mea kua tuatua raurau atura taua vaine ra kiaia kare e rā e tivata, i te akaapoapo anga atu iaia, e mate rava akera tona ngakau i te manamanata;

17 Kua akakite pu tikai aia kiaia i tona ngakau katoa, e kua tuatua maira kiaia, Kare rava e reta i tae mai ki runga i toku mimiti; e Nazira oki au na te Atua mei te kopu mai o toku metua vaine; naringa au i varuia ra, ka kore taua riri noku nei i reira, ka riro au mei te tangata katoa nei i te paruparu i reira.

18 E kite akerā Delila e kua akakite pu mai aia i tona ngakau katoa kiaia, kua tono aia i te karere e tiki i te au tutara o te Philiseti, karanga atura, E aere mai kotou okotai aerenga toe; kua akakite pu mai oki aia kiaku i tona ngakau katoa. Kua aere maira nga tutara o te Philiseti kiaia ra, ma te moni katoa i to ratou rima i te apai anga mai.

19 Kua akamoe iora aia iaia ki runga i ona turi; e kua karanga atura aia ki tetai tangata, e kua akaue atura iaia e varu i nga makave rauru e itu i tona mimiti: e kua timata aia i te akavi atu iaia, kua riro atura oki taua riri nona ra.

20 Kua karanga atura aia, E Samasona, teiao te Philiseti e rave ia koe ra. Kua ara akera aia i taua moe nona ra, e kua tuatua akera, E aere rai au ki vao, e akamaroiroi iaku uaorai mei tei muatangana ra; kare rai oki aia i kite e kua akaruke a Iehova iaia.

21 Kua opu iora te Philiseti iaia, e kua nanao atura i ona mata, e kua kave atura iaia ki raro ki Gaza ra, e kua tapeka iora iaia ki te tapeka veo; e kua taviri iora aia i te sitona i roto i te are tapekaanga ra. 22 E kua tupu akaou akera te rauru o tona mimiti i muri ake i te varu angaia ra.

23 Kua akaputuputu iora te au tutara o te Philiseti e apai i tetai atinga maata na to ratou atua na Dagona, e ei rekareka anga oki; te tuatua ra oki ratou e, Kua tuku mai to tatou atua i to tatou enemi ia Samasona ki to tatou nei rima. 24 E kia akara mai te au tangata iaia ra, kua akapaapaa atura i to ratou atua: kua tuatua akera oki ratou, Kua tuku mai to tatou atua i to tatou enemi ki to tatou nei rima, ko tei ta mai i to tatou e manganui akenei, e i pou ei oki to tatou nei enua. 25 E pereperekavana akera to ratou ngakau, kua tuatua akera, E tiki ia Samasona ei akanavenave ia tatou. Kua tiki atura ratou ia Samasona i roto i te are tapekaanga ra: e kua riro aia ei takatakata na ratou, e kua vaoo iora ratou iaia i te va i rotopu i nga pou o taua are ra. 26 Kua tuatua akerā Samasona ki te tamaiti i mou i tona rima ra, Ka tuku iaku, kia aa ana au i nga pou i mou ei te are nei, e kia irinaki ua ana au ki reira.

27 Kua ki rava taua are ra i te tangata, te tane e te vaine, e te reira te au tutara katoa o te Philiseti; e toru paa tausani o te tangata i te noo anga i runga ra, i te tane ma te vaine, te matakitaki maira ia Samasona i te akanavenave anga ia ratou.

28 Kua tautopa aturā Samasona ia Iehova, karanga atura, E taku Atu e Iehova, e akamaara mai koe iaku, taku ïa pure ia koe, i teianei e akamaroiroi mai koe iaku nei, taku rai ïa pure ia koe, okotai akamaroiroi anga toe ko teia anake nei, e te Atua e, kia tutaki ana au i te Philiseti nei i oku nei puke mata i te tutaki okotai. 29 Kua rave iorā Samasona i nga pou e rua i rotopu i mou ei taua are ra e ko te mou ïa i etaetaʼi ra, tetai i te rima katau, tetai oki i te rima kaui.

30 E kua tuatua akerā Samasona, Kia mate ua atu au i te matenga o te Philiseti nei. Kua piko iora aia ki raro kua akaope akera i te riri, topa iora taua are ra ki raro ki runga i te au tutara, e te tangata tini ravarai i roto ra. E maata ua atura te aronga i mate iaia i taua matenga nona ra, i tei taia e ia i te ora anga ra. 31 Kua aere maira tona ai taeake e te ngutuare katoa o tona metua tane ki raro, kua rave iora iaia, kua apai ki runga, e kua tanu iora iaia i te va i Zora e Esetaola, i te tanumanga o tona metua tane ko Manoa. E rua akera ngauru anga ona mataiti i te akatika anga ia Iseraela.