Roma

5 E TEIANEI kua akatikaia tatou i te akarongo, e au to tatou i te Atua ra, i to tatou Atu ia Iesu Mesia:

2 Nona oki tatou i o ei ki roto i te akarongo i teianei aroa ua i nooia e tatou nei; e te rekareka ua nei i te tatari anga i te kakā o te Atua.

3 Kare oki te reira anake ua, te rekareka katoa nei ra tatou i te tumatetenga; kua kite oki tatou e, na te au tumatetenga e akatupu i te akakoromaki;

4 E na te akakoromaki e akatupu i te kite; e na te kite e akatupu i te tatari:

5 Kare oki te tatari e taakama mai, no te mea kua riringiia mai te anoano o te Atua ki roto i to tatou ngakau e te Vaerua Tapu i orongaia mai kia tatou nei.

6 I to tatou oki vai paruparu anga i mate ei te Mesia i te tuatau tika ra, no te aronga akono kore i te Atua ra.

7 Kare paa e tika i tetai kia mate no tetai tangata tuatua-tika, e akakoromaki ra paa tetai tangata atu i te mate no te tangata meitaki.

8 Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.

9 E teianei kua akatikaia tatou i tona toto, e maata ua atu to tatou ora iaia i te riri otooto.

10 I akaongiia oki tatou i te Atua, i to tatou vai enemi anga, i te mate o tana Tamaiti; e maata ua atu ïa to tatou ora i te au anga nei i tona ra ora anga.

11 Kare ra oki te reira anake ra, te rekareka nei ra tatou i te Atua, i to tatou Atu ia Iesu Mesia ra, nona i raukaʼi ia tatou taua au anga nei.

12 E teianei no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa;

13 I vai ana oki te ara i te ao nei e tae rava akenei i te ture nei: kare ra te ara i akonoia i te ture kore anga.

14 I mana na oki te mate mei ia Adamu mairai e tae roa akenei ia Mose, e te aronga katoa kare i rave i te ara mei te ara a Adamu ra; e tutu aia no te ka tae mai.

15 Kare ra tei oronga uaia mai e tau i taua ara ra: e manganui oki tei mate i te ara a te tangata okotai ra, e maata ua atura oki te aroa ua o te Atua, e tei orongaia mai e taua aroa ra, i te tae i te tangata e manganui, ia Iesu Mesia i te tangata okotai ra.

16 Kare oki mei ta te tangata okotai i rave i te ara ra tei orongaia mai; no te ara okotai oki te utunga akaapa, kareka tei oronga uaia maira, kia akatikaia maira ïa i te au ara e manganui.

17 No te ara oki a te tangata okotai ra i manaʼi te mate i taua tangata okotai ra; ko te aronga ra i rauka ia ratou te aroa maata, e te tuatua-tika i orongaia maira, e maata ua atu ïa to ratou mana i te ora i te tangata okotai ra, ia Iesu Mesia.

18 E teianei mei te tangata ravarai i taea i te utunga akaapa i te ara a te tangata okotai ra, kua taea katoaia te tangata ravarai i te tika kia ora, i te tuatua-tika a te tangata okotai ra.

19 Mei te tangata katoa e manganui i akariroia ei tangata ara i te akono kore o te tangata okotai ra, manganui oki tei akariroia ei tangata tuatua-tika i te akono a te tangata okotai ra.

20 Akao maira oki te ture kia maata te ara. I te ngai ra i maataʼi te ara ra, kua maata rava atura te aroa ua i reira.

21 Mei ta te ara i tupu akenei e kua mate, kia tupu katoa oki ta te aroa ua i te tuatua-tika, e tae ua atu ki te ora mutu kore, i to tatou Atu ra ia Iesu Mesia.