Luka

1 NO te mea e maata akenei tei timata i te akapapa i te tuatua i akatupu tikaia i roto ia tatou nei,

2 Ta ratou i tuku mai kia tatou nei, ta tei kite tikai to ratou mata, mei muatangana mai, e e orometua oki no taua tuatua ra;

3 Ko au katoa oki, no te mea kua kitea puia e au te au tuatua katoa mei muatangana mai, manako akenei e, e mea tika kia tata akapapa atu i taua tuatua ra kia koe na, e Teophilo rongonui,

4 Kia kite rava koe e tuatua-mou tikai te au tuatua i apiiia atu kia koe na. 5 I TE tuatau i te ariki no Iudea ra ia Heroda, te noo ra tetai taunga ko Zakaria te ingoa, no te pupu no Abia: e tana vaine no te au tamaine ïa na Aarona, ko Elisabeta te ingoa.

6 E puke tangata tuatua-tika raua i mua i te aroaro o te Atua, i te akono marie anga i te au akauenga, e te au akonoanga katoa a te Atu, ma te apa kore.

7 E kare a raua tamaiti, no te mea e pā Elisabeta, e kua maata rava to raua mataiti.

8 E te rave ra aia i te taoonga taunga i mua i te aroaro o te Atua, i tei tau i tona ra pupu;

9 E tei iaia atura te akonoanga i te peu a te pupu taunga, i te aere ki roto i te nao o te Atu, e tutungi i te rakau kakara.

10 E te pure ra te tangata tini ravarai ki vao i te ka anga o taua rakau kakara ra.

11 Kua mama maira tetai angela a te Atu kiaia, te tu ua ra i te pae katau i te atarau o te rakau kakara.

12 E kite akerā Zakaria, koiriria akera, e kua rokoia iora aia e te mataku.

13 Kua tuatua maira te angela kiaia, Eiaa e mataku, e Zakaria; kua akarongoia oki taau pure; e ka anau taau vaine, ko Elisabeta, i tetai tamaiti naau, e naau e tapa i tona ingoa ko Ioane.

14 E rekareka maata toou iaia; e manganui te ka rekareka me anau aia ra.

15 E maata oki aia i mua i te aroaro o te Atu; e kare e inu i te wina e te kava kona, ka akakiia ra aia e te Vaerua Tapu, mei te kopu mai o tona metua vaine.

16 E manganui te tamariki a Iseraela tana e akaariu ki te Atu ki to ratou Atua.

17 E na mua aia iaia i te aere ma te vaerua e te mana o Elia, ei akaariu mai i te ngakau o te aronga metua ki te tamariki, e te aronga akarongo kore ki te pakari o te aronga tuatua-tika ra; ei akonokono i tetai pae tangata e tau no te Atu.

18 Kua karanga aturā Zakaria ki te angela ra, Eaa au e kite ei i te reira? e tangata metua oki au, e kua ruaine katoa taku vaine.

19 Kua tuatua maira te angela kiaia, na ko maira, Ko Gaberiela au, e tu au i mua i te aroaro o te Atua; i tonokia mai nei au e tuatua kia koe, e akakite kia koe i taua tuatua meitaki nei.

20 E i na, ka akamurareia koe, e kare e tau i te tuatua, e tae ua atu ki te rā e ope ei teianei tuatua i te tupu, ko koe kare i akarongo i taku tuatua nei, ka tupu ïa kia tae ki tona tuatau.

21 E te tapapa ua ra te tangata ia Zakaria, e te eumiumi ua ra i te mea koia i tavare i roto i te nao ra.

22 E kia tae maira aia ki vao, kare atura i tau iaia kia tuatua atu kia ratou: te kite ra oki ratou e, e orama te kitea e ia i roto i te nao ra; nana uaorai oki i tungou mai kia ratou, e kua murareia atura aia.

23 E ope akera ana puke rā rave angaanga, aere atura aia ki tona uaorai are.

24 E muri akera, kua to iora tana vaine ko Elisabeta, e noo iora i te ngai ngaro e e rima marama, na ko akera,

25 Ko ta te Atu teia ravenga, ka kite mai ei aia iaku, ei apai ke i te akakino a te tangata nei iaku.

26 E tae akera ki te ono o te marama, kua tonokia maira e te Atua te angela ko Gaberiela, ki tetai oire i Galilea, ko Nazareta te ingoa,

27 Ki tetai paretenia ra, i momokoia na tetai tangata no te kopu-tangata o Davida, ko Iosepha te ingoa; ko Maria te ingoa o taua paretenia ra.

28 E kia tomo mai te angela ki roto ra, kua na ko maira aia kiaia, Kia ora koe, e tei akaperepere ravaia mai e! tei ia koe te Atu, e tei meitaki i te au vaine e!

29 E kite atura aia iaia, koiriria iora aia i tana tuatua, e eumiumi iora tona ngakau i te tu ke o taua aroa ra.

30 Kua tuatua maira te angela kiaia, Auraka e mataku, e Maria; kua kite aroaia mai koe e te Atua.

31 E i na, ka to oki koe, e ka anau taau tamaiti, e naau e tapa i te ingoa ia Iesu.

32 Ka maata aia, e ka tuatuaia i te Tamaiti na Tei Teitei: e na te Atu ra, na te Atua e oronga mai i te terono o tona metua o Davida nona:

33 Ei iaia te au i te kopu-tangata o Iakoba e tuatau ua atu, kare rava ïa e kore tona basileia.

34 Kua karanga aturā Maria ki taua angela ra, Eaa e tikaʼi; kare oki au i kite i te tane?

35 Kua tuatua maira te angela, i te na ko anga mai kiaia, Ka eke mai te Vaerua Tapu ki rungao ia koe, e na te mana o Tei Teitei e tamaru i rungao ia koe; e tuatuaiaʼi oki tenana tamaiti tapu, i te Tamaiti na te Atua.

36 E i na oki, to tuakana ko Elisabeta, kua to katoa aia i tana tamaiti i tona ruaine anga nei: ko te ono oki teia o tona marama, ko tei tuatuaia ra e, e pa.

37 Kare rava oki e mea e kore e tika i te Atua.

38 Kua karanga aturā Maria, I na, ei tavini au no te Atu; kia peraia mai au mei taau i tuatua ana. Riro ke atura te angela.

39 Kua tu akerā Maria i taua au rā ra, e aere viviki atura ki tetai oire no Iudea, i te pae enua maunga;

40 Tomo atura ki roto i te are no Zakaria, aroa atura ia Elisabeta.

41 Tei te akarongo anga atu a Elisabeta i to Maria aroa anga mai, kua rere iora te tamaiti i roto i tona kopu: ki akerā Elisabeta i te Vaerua Tapu;

42 E kua kapiki ua maira te reo, na ko maira, Ko koe tei meitaki i te au vaine nei, e e meitaki oki te uanga o toou kopu.

43 No te aa ra oki au i kiteia mai ei, i aere mai ei te metua vaine o taku Atu kiaku nei?

44 I na oki, tei te o anga mai to reo i te aroa anga mai iaku nei ki roto i toku taringa, kua rere io nei te tamaiti i roto i toku kopu i te rekareka.

45 E ao oki tona to tei akarongo, e akatupuia oki te au mea ta te Atu i akakite mai kiaia ra.

46 Kua akaranga aturā Maria, Kua akamaata toku vaerua i te Atu,

47 E kua rekareka toku ngakau i te Atua i toku Ora.

48 Koia kare i akavaavaa i te akaaka anga o tona tavini: i na oki, mei teianei e tuatua te au uki ravarai iaku e, ko au tei meitaki.

49 E ravenga maata oki ta Tei mana ra iaku nei; e ingoa tapu tona.

50 E e vai rai tona aroa ki te aronga e mataku iaia ra, i tera uki, i tera uki.

51 Kua akakite aia i te marōrō o tona rima, kua akangaoro aia i te manako ngakau o te aronga nengonengo.

52 Kua uri aia i te aronga mana ki raro i to ratou nooanga, e kua akateitei i te aronga akaaka.

53 Kua akaki aia i te aronga i ngere i te meitaki, e te aronga apinga nui kua akaokiia e ia ma te kore.

54 Kua tauturu aia i tona tavini ia Iseraela, i te akamaara anga i tona aroa;

55 Tana oki i tuatua mai i to tatou ai tupuna ra, kia Aberahama, e tona uanga e tuatau ua atu.

56 Noo aturā Maria ki o Elisabeta ra e toru marama, oki maira ki tona ngutuare.

57 E tae akera ki to Elisabeta ra tuatau tikai e anau ei tana, kua anau akera tana e tamaroa.

58 E kite akera tona kopu-tangata, e te au tangata tupu ra e, e takinga-meitaki maata to te Atu kiaia, rekareka akera ratou ma ia katoa.

59 E tae akera ki te po varu, kia aere mai ratou ki te peritome anga i taua tamaiti ra; i inangaro ratou i te tapa iaia ia Zakaria, i te ingoa o tona metua.

60 Kua tuatua maira tona metua vaine, na ko maira, Eiaa, e tapa ra iaia ia Ioane.

61 Kua karanga atura ratou kiaia, Kare rava toou kopu-tangata i tapaia i te reira ingoa.

62 Kua tungou atura ratou ki te metua tane, i tana ingoa i anoano i te tapa iaia.

63 Kua pati maira aia i tetai tataanga tuatua; e tata iora ki rungao, na ko akera, Ko Ioane tona ingoa. Kua umere ua iora ratou ravarai.

64 E putata akera tona reo i reira, e matara akera tona arero, kua tuatua iora aia ma te akameitaki i te Atua.

65 Kua rokoia to reira uaorai e pini ua ake e te mataku; e tuatua aereia iora taua au tuatua ra e pini rava ake i te pae enua maunga ra i Iudea.

66 E te aronga i kite i taua au tuatua ra, akaeatu marie iora i roto i to ratou ngakau, na ko akera, E riro ei aa teianei tamaiti? E tei iaia te rima o te Atu.

67 E kua ki akera tona metua ko Zakaria i te Vaerua Tapu, kua totou iora, na ko akera,

68 Kia akameitakiia te Atu, te Atua no Iseraela; kua akono mai oki aia, e kua akaora i tona tangata;

69 E kua akatupu i tetai tara akaora no tatou, i te kopu-tangata o tona tavini ra o Davida:

70 Ko tana oki i tuatua mai i te vaa o tona au peroveta tapu mei tupua mai:

71 Ei akaora ia tatou i to tatou au enemi, e i te rima o te aronga katoa e riri mai ia tatou nei;

72 I te akono meitaki anga i to tatou ai tupuna, i te akamaara anga i te koreromotu tapu nana;

73 I te taputou tana i taputou ki to tatou metua kia Aberahama e,

74 E oronga mai aia no tatou, i akaoraia i te rima o to tatou au enemi, kia akamori tatou iaia ma te mataku kore,

75 Ma te tapu, e te tuatua-tika, ki mua i tona aroaro, e ope rava ake to tatou puke rā i te ora anga nei.

76 E ko koe na, e teianei tamaiti, ka tuatuaia koe e peroveta no Tei Teitei: na mua oki koe i te mata o te Atu i te aere, ei akameitaki i tona aerenga;

77 Ei akakite i tona tangata i te ora, i te akakore anga i ta ratou ara,

78 I te ngakau aroa o to tatou Atua, i taea mai ei tatou e te mārama no runga mai;

79 Ei akamārama i te aronga e noo i te poiri, e i te ngai maru-mate, ei arataki oki i to tatou vaevae na te ara au.

80 E kua tupu atura taua tamaiti ra, e maroiroi atura te ngakau: e noo oki i te medebara, e tae ua akera ki te rā i akakite uaʼi aia iaia uaorai ki to Iseraela.