Genese

19 E TAE atura nga angela toko rua ki Sodoma i te aiai; te noo ua rā Lota i te ngutupa i Sodoma ra: e kite akerā Lota, kua tu akera ki runga, e aere mai e aravei mai ia raua ra; e kua tupou iora aia i tona mata ki raro i te one;

2 E kua tuatua maira, I na, e aku puke rangatira e, e tapae mai ana korua ki roto i te are o to korua nei tavini, taku ïa tuatua, e ka orei i to korua vaevae, e ka noo, e kia ao ra, e tika ïa kia tu ki runga e aere i to korua tere. Kua karanga atura raua, Eiaa; ka noo ua ra maua i te arataa nei e kia ao.

3 Manono roa maira ra aia ia raua; e kua tapae atura raua, aere atura ki roto i tona are; e kua tunu iora aia i te areto akaopue koreia, akanoonoo iora i tetai kainga kai na raua, e kua kai iora raua.

4 Kare ra raua i moe, kua katoatoa maira te tangata, te tangata o taua oire ra, te tangata o Sodoma, ko tei ou, e tei ruaine, kua akapini maira i taua are ra:

5 E kua kapiki maira kia Lota, na ko maira kiaia, Teiea nga tangata i aere tika mai kia koe nei i teianei po? Ka arataki mai ana ia raua ki vao kia matou nei, kia kite matou ia raua.

6 E aere aturā Lota ki vao kia ratou ra, e kua topiri maira oki i te ngutupa,

7 E kua karanga atura, Auraka ana, e taku au taeake, e akapera i tenana ravenga kino:

8 I na, e puke tamaine taku toko rua, kare rai i kite i te tangata; ko taku ïa e arataki mai ki vao kia kotou nei, ka rave ei kotou i ta kotou e anoano ia raua ra, taku ïa tuatua kia kotou na: auraka ra e rave ua atu i eianei puke tangata; i aere mai ei oki raua kia marumaru i toku are nei.

9 Kua tuatua maira ratou, Kia atea atu. E kua na ko maira oki, Na tei tuitarere ua mai aina e akariro iaia uaorai e, ei iaia te tuatua? e maata ua atu ta matou e rave ia koe i teianei i tera ra aronga. E kua kononinoni ua maira ratou ki runga i taua tangata ra, ia Lota, e akavaitata roa maira e vavaʼi i te pa.

10 Kua akatika atura nga tangata ra i to raua rima, kua totō maira ia Lota ki roto i te are kia raua, e topiri atura i te pa.

11 Kua akamatapo atura raua i taua aronga tangata i te ngutupa are ra, ko te tangata rikiriki e te aronga mamaata; e roiroi rava akera ratou i te kimi anga i te ngutupa.

12 Kua karanga atura nga tangata kia Lota, Koai ma ua ake i toou ra i ko nei? Ko taau ra au unonga, e taau ra au tamariki tamaroa, e taau ra au tamaine, ko taau katoa rai i te oire nei, e rave, e arataki ki vao i taua ngai nei:

13 Te rave nei oki maua i teianei ngai e akapou. E ara aue maata ta ratou ki mua i te aroaro o Iehova; e na Iehova maua i tono mai e akapou i te reira. 14 E aere aturā Lota ki vao, kua karanga atura ki aua nga unonga, ko tei akaipoipo i ana puke tamaine, na ko atura, Ka tu e aere ke kotou ki vao i teianei ngai; ka akapou oki a Iehova i te oire nei. Mei te takatakata ua ra aia i nga unonga nana ra.

15 E tei te akirata anga ra, kua tuatua raurau maira nga angela kia Lota, na ko maira, Ka tu ki runga, ka arataki i taau vaine, e nga tamaine toko rua aau i vai nei; ko te mate aea oki koe i te matenga i teianei oire.

16 E te tavarevare ua ra aia, kua opu maira nga tangata ra i tona rima, e te rima o tana vaine, e te rima o nga tamaine nana ra, e akaperepere to Iehova iaia; kua arataki raua iaia ki vao mai i taua oire ra, tuku atura.

17 E kia aratakiia ratou e raua ki vao, kua tuatua maira aia, Kia ngakoikoi kia ora koe; auraka e akara ki muri, eiaa roa e akaea i teia katoa nei ngai atea; e oro ki te maunga, ka pou aea koe.

18 E kua karanga aturā Lota kia raua, Auraka ana, e taku Atu e:

19 I na, kua akaperepereia mai to tavini e koe, e kua akamaata koe i tou aroa anga mai iaku, ko koe i akaora iaku nei; kare rai au e tae ki te maunga, ko te rokoia mai aea au e te kino, mate iora au:

20 I na, teia oki te oire vaitata, kia oro au ki reira, e e oire mea ngiti oki: e tuku ake ana koe iaku ki reira kia ora au: kare aina i te oire mea ngiti?

21 E kua tuatua maira aia kiaia, I na, kua akatika atu au i taau tuatua i tenana, e kare atura taua oire nei taau i tuatua mai ana e mate iaku:

22 Kia ngakoikoi koe i te oro ki reira kia ora; kia tae oki koe ki reira e tikaʼi taku e rave nei. I tapaia te ingoa o taua oire ra ia Zoara.

23 Kua iti akera te rā ki runga i te enua ra, e kua tae a Lota ki Zoara;

24 I akatopa mai ei a Iehova i te teio, e te ai, no ko ia Iehova, no runga i te rangi ki runga ia Sodoma, e Gomora;

25 Tairipoti takiri rava akera i aua nga oire ra, e taua ngai atea katoa ra, e te tangata katoatoa no aua nga oire ra, e te au mea i tupu ki runga i te enua ra.

26 E te vaine a Lota i muringao iaia ra, kua akara aia ki muri, e riro atura aia ei pou tai.

27 Kua tu akerā Aberahama ki runga i te popongi roa, e aere atura ki te ngai i tuia e ia ki mua i te aroaro o Iehova ra:

28 E kua akara tika atura aia ki Sodoma e Gomora, e te enua i taua ngai atea katoa ra, akara atura aia, e i na, peke atura te auai o taua enua ra ki runga, mei te auai umu ra.

29 Kua manako ra te Atua ia Aberahama, ka akapou ei aia i aua nga oire o taua ngai atea ra, e kua tono ke atura aia ia Lota mei rotopu tikai i taua pou ra, ka tairipoti ei aia i taua nga oire i nooia e Lota ra.

30 Kua aere aturā Lota e ana puke tamaine toko rua mei Zoara atu, noo atura ki runga i te maunga; e mataku oki tona kia noo i Zoara: e kua noo atura aia e ana puke tamaine toko rua i roto i tetai ana.

31 E kua karanga atura te tama mua ki te teina, Kua ruaine to taua metua tane, e kare roa e tangata i te enua nei kia aere mai kia taua nei, mei te peu a to te ao katoa nei:

32 Taua e akainu i to taua metua i te wina, ka moe ei taua iaia kia uangaia to taua metua ia taua.

33 E kua akainu iora raua i to raua metua i te wina i taua po ra; e aere atura te tama mua, moe atura i tona metua; e kare aia i kite ua ake iaia i te moe anga mai, e te tu anga ki runga.

34 E ao akera kua karanga atura te tama mua ki te teina, I na, kua moe au inapo i taku metua, e akainu rai taua iaia i te wina i teia katoa nei po; ka aere atu ei koe, ka moe ei, kia uangaia to taua metua ia taua nei.

35 E kua akainu atura oki raua i to raua metua i te wina i te reira katoa po; e kua tu akera te teina ki runga, aere atura e moe atura iaia; e kare aia i kite ua ake iaia i te moe anga mai, e te tu anga ki runga.

36 Nui katoa akera nga tamaine toko rua a Lota ra i to raua uaorai metua tane.

37 E anau atura ta te tama mua ra, e tamaroa, e tapa iora i tona ingoa ko Moabi: ko te metua ïa o te ngati Moabi e teia noaʼi.

38 E anau atura oki ta te teina, e tamaroa rai, e tapa iora i tona ingoa ko Bene-ami; ko te metua ïa o te ngati Amona e teia noaʼi.