Iona

3 E KUA oki rua maira te tuatua a Iehova kia Iona, na ko maira,

2 Ka tu, ka aere ki taua oire maata ra ki Nineve, ka tutu aere ei ki reira i te tuatua taku e karanga atu kia koe na.

3 Kua tu akerā Iona ki runga, aere atura ki Nineve, i ta Iehova i tuatua maira. E oire maata oki Nineve ki mua i te Atua, po toru te aerenga e pini ei.

4 Kua akamata aturā Iona i te aere na roto i taua oire ra, po tai akera i te aere anga; kua tutu aere aia, na ko atura, E rua takau rā toe e uritumuiaʼi Nineve.

5 Kua akatika atura te au tangata o Nineve i ta te Atua; e kua tutu atura i te akakore anga i te kai, kua kakau atura i te kakau paoa, mei tei maata i o ratou e tae rava atu ki tei mea ngiti i o ratou.

6 Kua tae oki taua tuatua ra ki te ariki o Nineve, e kua tu akera aia mei runga i tona terono, kua kopae atura i tona uaorai kakau, e kua tapoki iora iaia uaorai ki te kakau paoa, e kua noo iora ki raro i te reu.

7 E tutuia akera te tuatua ki Nineve katoatoa ra, i te akaue a te ariki e tona ra au tangata nunui, i te na ko anga, Auraka rava te tangata e te puaka katoa, te anana puakatoro e te anana mamoe, e tongi ua ake i te kai; auraka e kaikai, auraka oki e inu vai.

8 Kia tapokiia te tangata e te puaka katoa ki te kakau paoa, e kapiki nui atu oki ki te Atua, ka ariu ke mai ei ratou ravarai i tona ra aerenga kino, e te takinga-kino o to ratou rima.

9 Peneiake ko te ariu te Atua, e ko te tataraara, ka ariu ke ei i te otooto anga o tona riri, kia kore tatou e mate.

10 Kua akara maira te Atua i ta ratou angaanga e, kua ariu ke ratou i to ratou aerenga kino, e kua tataraara iora te Atua i te kino tana i karanga ra e tuku mai ki runga ia ratou, e kare akera aia i tuku mai.